TALAIIGA (#12303)

E fakalauefa-gia a Tou igoa, O toku Atua, ona ko te mea te la ko oti ne fakaasi ne Koe i te Aso te la ko te Tupu o Aso, ko te Aso te la ne fakasalalau ne Koe ki Au Tino filigia mo Au Pelofeta i Tau Tapeleti tafasili i te takutakua, ko te Aso te la ne avatu ne Koe ate gali o te matagofie o Ou igoa katoa ki luga i mea faiite katoa. E takutakua a tena faka-manuiaaga o so se tino tela e agai tonu atu a ia kia Koe, kae ulu atu ki Tou nofomai, kae maua a sikuga leo o Tou leo.  
  
Au e akai totuli kia Koe, O toku Aliki, mai i luga i te igoa o Ia Te la e tamilomilo i te faka-aloalo o te maalo o Ou igoa, te la ka fesoasoani a Koe mo te alofa kia latou ko la e pele kia Koe ke faka-maalu a Tau muna i loto o Au tavini, kae o faka-salalau ki tua atu a Ou tavaeega i loto i Au mea faiite, ko te fiafia mo lifu p Tau faka-asiiga ke fakafonu a agaaga ola o latou katoa ko la I Tau lalolagi.  
  
Ona ko latou ne takitaki gia ne Koe, O toku Aliki, ki te vai ola o Tou alofakaimalie, talia aka, mai i luga I Tou maukoloa lauefa, ko te mea ke se taofigia a latou ki tua mai ia Koe; kae ona ko oti ne kalagina ne Koe ki koga koga o Tou kalauna-a- tupu, sa afuli gina a latou mai i Tou nofo mai, mai i luga i Tou alofa-atafai.  Tuku ifo kia matou a mea ko la ka fai a latou ke motu katoatoa mai i so se mea na ko Koe, kae fai aka latou ke mafai o lele ki luga i te ea o Tou nofo pili mai, i se auala te la e se mafai lele loa ne te fanaka ki luga o te kau teke, io me ko fakatauuga a latou ko la ko se talitonu i Tou Fuaitino tafasili ite maluga mo te mafi.

-Bahá'u'lláh
-----------------------

TALAIIGA (#12304)

Tavaeega e ia Koe, Te Aliki toku Atua!  Au e fakamolemole kia Koe, mai i Tou Igoa te le e seki ai aka loa se tino kai ttau o lavegia, kae ko tena taaua e seki ai se agaaga ola kai maua ne ia o fua, Au e akai totuli kia Koe, mai i luga a Ia Te la Ko te Ulu o te Vai o Tau Fakaasiiga mo te Aso malulu o Au fakailoga, ke fai a toku loto mo fai a te koga nofo o Tou alofa mo te masausau o Koe.  Sui aka, i ei, ki Tou Vasa tafasili i te takutakua, te la mai i ei ka tafe mai a te vai ola o Tou atamai mo vaitafe foliki manino o te fakamalugaga o Koe mo te tavaeega.  
  
A lima o toku fuaitino e molimau ki Tou faka-tasitasi, a kote laulu o Toku ulu e folafola atu a te maalosi o Tou nofoaiga-a-tupu mo te mafi.  Ko oti au ne tu i te mataloa o Tou alofa-kaimalie mo te fakaotioti o te loto maulalo mo te takavale katoatoa, kae piki atu ki te kapa o te gatu o Tou alofa maukoloa, kae fakammau oku mata i luga i te sikulagi o Au mea-alofa.  
  
Fakasino aka ne Koe mo au, O toku Atua, a mea ko la ne takutakua i ei a Tou afioga, kae feasoasoani mai kia au, mai i Tou alofa maalosi, ko te mea ke talai a Tau Fakatokaaga ko mate ke lele mai ki tua i olotou koga tausi, kae tele atu ki mua ia Koe, mo te mautinoa tonu ia Koe, kae fakatoka a te olotou kilo ki luga i te tulaga o Tau Fakatokaaga, mo te fale malumalu o Tau Fakaasiiga. 
 
A Koe, e tonu, ko te Tafasili i te Maalosi, ko te Tafasili i te Maluga, ko te Iloa-Katoatoa, ko te Atamai-Katoatoa.

-Bahá'u'lláh
-----------------------

TALAIIGA (#12305)

Matagofie e i luga ia Koe, O te Aliki o te lalolagi mo te Manakoga o maalo, O ko Koe Te la ne fakaasi mai I Toe Igoa Lasi, ko la a penina o te atamai mo faipatiiga ko sae mai i pule o te tai takitakua o Tou poto, a ko lagi o te fakaasiiga faka-te-lagi ko oti ne fakaaloalo kit e mainaaga o sae mai o te la o Ou mata.  
  
Au e akai faka-molemole kia Koe, mai i te Muna te la mai i Tau fakatalitonuga ne fai ke tonu gisi i loto i Au mea ola ne faiite mo Tau molimau ne faka-taunu i loto i Au tavini, ke faka-maalosi Au tino ko mata o te Faka-tokaaga ke maina i Tou maalo, a ko tulaga o Tou maalosi ka toki i loto o Au tavini, ka ko fuka o Tau takitakiiga ka sisi ki luga salalau i Ou maalo katoa.  
  
O toku Aliki!  E puke ne Koe a latou e piki ki te kafanoa o Tou alofa-kaimalie kae piki mmau ki te kapa o te laugatu o Tou kaimalie.  Fakaeke mo latou a mea ko la e futi mai a latou ke pili mai kia Koe, kae taofi a latou mai i mea aka katoa na ko Koe.  
  
 Au e akai faka-molemole kia Koe, O ko Koe ko te Tupu o olaaga mo te Tausi o te lavea mo te se lavea, ke fai aka a so se tino te la e tu ki luga o tavini i Tau Faka-tokaaga pe la me se tai e fakagasue ne Tou manakoga, pe la me se ulaaga o te afi o Tau Lakau Ola mana, e maina mai i te sikulagi o te lagi o Tou finagalo.  E tonu, a Koe ko te Mafi Tokotasi, Te la seai ko te maalosi katoa o te lalolagi io me ko te maalosi o fenua e mafai o fakatakavale.  E seai aka se Atua na ko Koe, te Tokotasi, ko te Se-Fakatusagia, ko te Tausi, ko te Ola-loa-ia-Ia.

-Bahá'u'lláh
-----------------------

TALAIIGA (#12306)

O ko te Atua, Tela ko Ia a te Tino Tusi o Faifekau katoa, ko te Kamataga o Kamataga katoa, ko te Ulu-vai o Faka-asiiga katoa, ko te Va-ikeli o Mainaaga katoa!  Au e molimau me i Tou Igoa ne fakaloalo ne te lagi o te malamalama, mo te vasa o te faipatiiga ko oti gasuke, a ko te vaasi-o-taimi o Tou atamai ko oti ne talai atu ki tino ko la e tautali i talitonuuga katoa.  
  
Au e akai totuli kia Koe kef aka-maumea mai au ko te mea ke fakaseai ne au a tino katoa ka ko Koe, kae ke fai au ke tutokotasi mai i so se tino na ko Koe.  Vaiua ifo, tena, ki lalo ia au mai i kaumana o Tou mau-koloa a mea ko la ka llei au i lalolagi taki tasi o Ou lalolagi.  Feasoasoani mai kia au, tena, mai i Tou alofa tupuola, ko te mea ke tavini au ki Tau Faka-tokaaga i loto i Au tavini ko te mea ke fakaasi atu ne au a mea ko la ka fai ne ia au ke masaua faeloa me e pefea a te leva o taimi e gata i ei a Tou maalo mo Tau pule.  
  
Mea nei ko Tau tavini, O toku Aliki, te la mo tena fuiatino katoa ko oti ne fuli atu kit e ssikulagi o Tou maukoloa, mot e vasa o Tou alofa-kaimalie, mo te lagi o Au mea-alofa.  Tuku mai kia au a te mea te la e ttau mo Tou afioga, mo Tou matagofie, mo Tou maukoloa lauefa, pela foki mo Tou uiga gali.  
  
Ko Koe, i te tonuuga, ko te Atua o te tupuola mo te maalosi, Te la e ttau o tali a latou ko la e talo atu kia Koe.  E seai aka foki se Atua na ko Koe, ko te Iloa-Katoatoa, ko te Atamai-Katoatoa.

-Bahá'u'lláh
-----------------------

TALAIIGA (#12307)

Fai atu: Ke faka-lasiigina a Tou Igoa, O te Aliki toku Atua!  Au e akai totuli kia Koe i Tou Igoa te la ne sulu malifalifa a te gali o te mainaaga o te atamai i taimi ne matala mai a lagi o tau muna ki luga i tagata, o fesoasoani alofa mai kia au mai i luga i Au fakamanuiaaga faka-te-lagi kae fakamafai aka au ke fakamaluga a Tou Igoa i vasia o Au tavini.  
  
O te Aliki! Kia Koe ne fuli atu oku mata, motu lele mai i mea katoa na ko Koe kae piki mmau ki te mata o te gatu o Au fakamanuiaaga tafasili i te uke.  Faka-matala aka a toku laulaufaiva ke faka-salalau atu ate mea te la e mafai o puke a mafaufau o tagata kae o fiafia a olotou agaaga ola mo agaaga.  Faka-maalosi au i Tau Fakatokaaga i se auala tela ka se mafai au o fakalavelavegia ne lasi o te kau teke mai i Au mea faiite io me e taofigia ne te teke a latou e se talitonu i loto ia latou ko la e nofo i Tou lalolagi.  Fai a latou pela me ne lamepa e maina ki koga fenua katoa ko latou ko la a olotou loto e ola i ei a te mainaaga o Tou poto e naunau faeloa ki Tou alofa kae ke takitakigia a latou ne te mainaaga o ia.  
  
E tonu, e maalosi a Koe o fai a so se mea e manako Koe ki ei, kae I Ou lima e puke ne Koe a te maalo o te foafoaaga.  E seai aka foki se Atua na ko Koe, ko te Mafi-Katoatoa, ko te Atamai-Katoatoa.

-Bahá'u'lláh
-----------------------

TALAIIGA (#12308)

O toku Atua, fesoasoani mai Koe ki Tau tavini o avaka a te Muna, kae ke teke atu a te mea tela e seai se aogaa kae e se tonu, ke fakatu a te mea tonu, ko te mea ke fakasalalau atu a muna tapu ki tua atu, kae fakaasi atu ate gali, mo te mainaaga o te taeao ke nofo i loto o latou fai mea tonu.  
  
Koe e tonu, ko te Alofa, te Fakamagalo.

-`Abdu'l-Bahá
-----------------------

TALAIIGA (#12309)

O te Atua, toku Atua! Fesoasoani mai Koe ki Au tavini fakamaoni ke maua ia latou a te loto alofa mo te atafai.  Fesoasoani kia latou ke faka-salalau atu, i vasia o fenua katoa o te lalolagi, a te mainaaga o te takitakiiga tena e vau mai i te Lukuuga mai luga.  E tonu, a Koe ko te Kaleva, te Maalosi, te Mafi, te Faka-mafanafana, te Foai-Katoatoa.  E tonu, a Koe ko te Alofa, te Filemu, te Atafai, te Tafasili i te Lauefa-ate-Alofa.

-`Abdu'l-Bahá
-----------------------

TALAIIGA (#12310)

E lavea ne Koe au, O toku Aua, e ifo ki lalo mo te maulalo, kae totuli au i mua i Au faka-tonuuga, fakalogo ki Tou nofoaiga-a-tupu, polepole i te mafi mo Tou maalo, kae pakini mai keatea mai i Tou kaitaua, e akai fakamolemole ki Tou alofa-kaimalie, kae fakana ki Tau fakamagalo, kae polepole i te mataku ki Tou kaitaua.  Au e akai fakamolemole kia Koe mo te fatu e tukituki, mo loimata e maligi ako te agaaga ola e nnau, kae e motu katoa mai i mea katoa, ke fai Au fagasele pe la me ne vae o te mainaaga i Ou lalolagi katoa , kae o lago atu ki Au taini ko oti ne filifili ke fakamaluga a Tau Muna, ko olotou mata ke fuli atu i te gali kae maina i te taulekaleka, ko olotou loto ke mafai o faka-fonu i mea funa, ka ko agaaga ola taki tasi katoa ke fakaseai a te amoga o te agasala.  Taui a latou mai i te tino teke, mai ia ia te la ko fai pe la me se tino agasala ko aunoa lele se ma iei kae matafatu.  
  
E tonu, Au fagasele ko fiu inu, O toku Aliki; takitaki a latou kit e vaikeli o te maukolo mot e alofa.  E tonu, a latou ko fia kai; tuku kia latou a Tau taipola faka-te-lagi.  E tonu a latou ko seai ne gatu o latou; fakapei aka a latou ki gatu o te tauloto mot e poto.  
  
Latou ne toa, O toku Aliki, taki aka a latou ki te malae o taua.  Latou ne tino fakasino ala, fai aka latou ke faipati mo faka-kinauuga mo faka-talitonuga.  Latou ne tavini o te galuega, fai aka latou ke faka-rauni a te ipu e fonu maligiligi i te uaina o te talitonuuga tonu. O toku Atua, fai aka latou me ne tino usu pese ko la e usu i fatoaaga, fai aka latou pela me ne leona ko la e nofo i vao, pe la me ne tafolaa e uku tapusa i koga koga pooko.  
  
E tonu, a Koe ko Ia te la e fonufonu ite alofa-kaimalie.  E seai aka foki se Atua na ko Koe, ko te Mafi, ko te Maalosi, ko te Fai Mealaofa-Katoatoa.

-`Abdu'l-Bahá
-----------------------

TALAIIGA (#12311)

E iloa ne Koe, O te Atua, ia Koe ko taku molimau ia au e seai soku fakamoemoega i toku loto na loa ko te oko atu ki Tou fiafia-llei, ke faka-tummau i te tavini kia Koe, ke tapuaki au ki Tau galuega, ke galue au i Tau fatoaaga vine kae ke ofo aku mea katoa i Tou auala.  Ko Koe ko te Iloa-Katoatoa mo te Lavea-Katoatoa.  E seai lele soku manakoga vagana ko te fuli oku kalafaga, i toku alofa mo Koe, ki mauga mo toafa kae fakapula atu ke lagona ki luga ate oko mai o Tou Maalo, kae ke avaka a tau kalaga i loto o tagata katoa.  O te Atua! Tala aka ne Koe ate auala ko au vaaivai tenei, talia ne Koe a te fooga o au tenei e faka-masakisaki kae avatu aka ki luga a Tau fakagata masaki kia au tenei e pokotia.  Mo loto e ka ite afi mo loimata ko sofisofi au e talosaga kia Koe i Tou Mataloa.  
  
O te Atua!  Au e toka o kufaki so se faka-lavelave i Tou auala kae e manako mo toku loto mo toku agaaga katoatoa o faka-fetaui mo so se mea faigata.  
  
O te Atua!  Puipui mai au i tofotofoga.  E iloa tonu ne Koe ia au ko oti ne fuli keatea mai i mea katoa kae fakasao mai au i mafaufauga katoa.  E seai aka foki saku galuega vagana mo te taku taku o Koe kae e seai aka foki soku faka-moemoega vagana ko te tavini kia Koe.

-`Abdu'l-Bahá
-----------------------

