FALEPUIPUI (#12252)

E maluga a Tou igoa, O toku Atua! E lavea au mai ne Koe i lima o oku fili.  I tami katoa e fuli au ki toku fakaata-mai, e lagona ne au a leo o tagi fakafanoanoa o latou kola e fagasele kia Koe, kola a tino amio masei ko oti ne puke faka-pagota aua ko te olotou talitonu ia Koe mo Au fakailoga, kae ona ko oti ne fakasaga a olotou mata ki te sikulagi o Tou alofa-atafai mo Tou alofa-kaimalie.  Kae kafai e fuli au ki toku sema, e lagona ne au a te logoaa mai o tino amio masei ko la ko se talitonu ia Koe mo Au failoga, kae e tumau a te taumafai a latou o tamate ate mainaaga o Tau lamepa tela e maina atu ki te malifalifa o Koe mo Tou Tina Fuiitino mai i 
luga atu i mea katoa kola i luga i Tou lagi mo mea kaoa kola i luga i Tou lalolagi.  
  
A loto o Au tino ko oti ne filifilia, O toku Aliki, ko liua aua ko te olotou mavae mai ia Koe, aa ko agaaga ola o Au fagasele kola ko ka ite afi o te nnau kia Koe i Ou aso.  Au e akai totuli kia Koe, O ko Koe ko te Tufuga o lagi mo te Aliki o igoa katoa, mai ia Ia i te gali o Koe tonu loa mo te tafasili ite maluga mo te matagofie-katoatoa o Tou masausauaga, ke tuku ifo ki lalo i luga ia Au fagasele a mea kola ka futi mai a latou ke pili atu kia Koe, kae fakamafai a latou ke fakalogo ki Au patipatiiga.   
  
Ofa aka ki lalo mot e lima lauiloa o Tou maalosi, O Toku Aliki, a te veli o mafaufauga faka-supasupa, ko latou kola e fakatunaki kia Koe ke mafai ne laou o lavea a Koe e sagasaga i luga i te nofoaiga-a-tupu o Tou afiioga, mo mata o latou kola e faka-aloalo ne latou a Tou fakatasitasi ke mafai o fiafia i te gali o te silisillese o Ou mata.  A mataloa o te faka-moemoega ko oti ne pono ki loto kola e nnau kia Koe, O toku Aliki!  A kii o latou kona loa i oulua lima; talagia a latou i te maalosi o Tou mafi mo Tou nofoaiga-atupu.  E maalosi a Koe o fai ate mea e fiafia Koe kiei.  A Koe, e tonu, ko te MafiKatoatoa, ko te Fai-mea-alofa.

-Bahá'u'lláh
-----------------------

FALEPUIPUI (#12253)

E matagofie e i Tou igoa, O te Aliki toku Atua!  E lavea ne Koe a toku kogaa-koga nofo, mo te fale-puipui tela ne pei au kiei, kae ne tigaina iei au i faka-lavelave e uke.  Mai i Tou mafi!  E seai se pene e mafai o toe llau mai a latou, io me se laulaufaiva e mafai o fakamatala io me o faka-napa a latou.  E seiloa ne au, O toku Atua, me se aa ate pogai ne liakina iei au ne Koe ki Ou fili.  Ko Tou matagofie e fai mo aku molimau!  Au e se-fanoanoa mo te fa-kaitaua ne kufaki ne au ona ko te alofa mo Koe, io me e lagona ne au ate poi i faka-lavelave lasi ne feagai mo au i Tou auala.  A toku fanoanoa e se pogai mai ise isi mea aka kae ona ko te tuai o 
fakataunu ne Koe ate mea tela ko oti ne iku ia Koe i Tapeleti o Tau Fakaasiiga, kae fakaeke i loto i tusi o Tau tonu mo te faka- masinoga.  
  
A toku toto, i taimi katoa, e fai mai kia au penei:  “O ko Koe Tela ko te Foliga o te Tafasili i te Alofa-Fakamagalo! E pefea ate leva kae ko kave au keatea ne Koe mai ite falepuipui o te lalolagi tenei, kae avatu au mai ite fakapagota o te olaga tenei?  E seki fai feagaiiga mai Koe ia Koe ka fakalanu ne Koe ate lalolagi mo au, kae fakasiusiu mai au i luga i mata o tino o Tou Palataiso?”  Ki te faipatiga tenei ne tali atu au penei:  “Ke onosai kae filemu a Koe.  A mea kola e manako koe kiei e tumau fua ki se itula, A ko au, tena la, au e fia inu faeloa i te auala o te Atua i te ipu o Tena fakatonuuga, kae e se-manako ko te ikuuga a Tena finagalo ke gata o faka-galue, io me ko tigaina ko la ne pokoia ia au ona ko toku Aliki, ko te Tafasili i te Maluga, ko te Faka-aloalogina-Katoatoa, e ttau o gata.  Sala mai koe ki toku manakoga kae fakaseai atu a tou manakoga.  A taku amoga saisaitia e se mo toku puipuiiga, kae ko te mea ke faka-mafai au o ola tummau i faka-lavelave mo faka-lavelave, kae ke faka-tokatoka au mo tofotofooga ko la e ttau o 
oko mai ki au i taimi katoa.  Ke tanumia a te fagasele tela e atafia ne ia i te vaa o te llei mo mea poisini ona ko tena alofa mo tena fagasele! Ke lotomalie koe ia mea ko oti ne fakasino ne te Atua mo koe.  A Ia, e tonu, e pule i luga ia koe pela mo te mea e loto kae fiafia kiei.  E seai aka se Atua na ko Ia, ko te Se-mafai o-Oko-kiei, ko te Tafasili i te Maluga.”

-Bahá'u'lláh
-----------------------

FALEPUIPUI (#12254)

E maluga a Tou Igoa, O ko Koe Tela e lavea a mea katoa kae e lilo foki mai i mea katoa!  Mai I fenua katoa e lagona ne Koe a fanoanoa o latou ko la e alofa kia Koe, kae mai i sose auala e sala atu ki tagitagi o latou kola ne iloa ne latou a Tou nofoaiga-aTupu.  Moi fai a latou kola e teke e fakafesili atu penei:  “Sea a la a te uiga ne teke iei kia latou kae taofi a latou faka-pafgota i 
Baghdád mo nisi koga aka?  Sea a te amio se-tonu ne fai ne latou?  Koi ne faka togafiti ne latou?  E oi a toto ne fakamaligi ne latou, kae e oi foki a kope ne fakamasei ne latou?  e seiloa ne latou me ka tali pefea.  
  
E iloa llei loa ne Koe, O toku Atua, i te agasala loa a latou me ona ko latou e alofa kia Koe.  Ko te pogai tenei ne puke gina a latou ne te kau teke, kae peipei atu ki tua atu.  E iloa ne au, O toku Atua, ia Koe ka tuku ifo ne Koe ki au Tau tavini fua a mea llei mo latou, kae e ui iei au e akai atu kia Koe, e auala atu i Tou igoa tela e pulougina a mea katoa, ke avaka ki luga mo te olotou feasoasoani pela foki mo se failoga o Tou alofa-tauanoa pela foki me se faka-talitonuuga o Tou maalosi, ko latou kola ka tausi a latou ke saogalemu mai i olotou fili katoa.  
  
E maalosi a Koe o fai a te mea e fiafia Koe kiei.  A Koe, e ton, ko Pule Maluga, ko Mafi-Katoatoa, ko te Feasoasoani-i-mea-Faigata, ko te Ola-loa-ia-Ia.

-Bahá'u'lláh
-----------------------

FALEPUIPUI (#12255)

E lavea mai ne Koe, O toku Atua, ko te Fetu-Ao o Tau Muna e maina mai i luga i te sikulagi o Tau fakai-falepuipui, pela loa mai i loto i pui a Ia tela ko te Faifekau o Koe totino mo te Aso-Malulu o te mainaaga o Tau faka-tasitasi ko oti ne apai aka a Tena leo kae fai atu a Ou tavaeega.  A manogi gali o Tou alofa ko agiagi mai i luga i Ou fakai lasi kae ko oti ne siomia a latou katoa i Tou maalo.  
  
Mai i taimi ne fakaasi i ei a Tou alofa-tauanoa, O toku Atua, sa fulitua gina Au tavini mai i te tuku atu a olotou mata ki ei.  Fakapuligia, O toku Atua, a olotou kope, mo olotou kopikopiaga pela foki mo olotou galuega.  Mafaufau aka ki te lasi o Tou matagofie, mo te uke o Au mea-alofa, mo te maalosi o Tou mafi, mo te silisiliese o Au alofaaga.  Au e tauto i Tou matagofie!  Kafai e kilo koe kiei mo se mata o te fai-meatonu, a latou katoa ko ttau kiei a Tou kaitaua mo te sasa o Tou ita.  Taofigia ne Koe Au mea ola, O toku Atua, ki lima o Tou alofa-tauanoa, kae fai a Koe ke iloa kia latou a mea tafasili i te llei mo latou mai i mea katoa kola ko oti ne faiite i loto i te maalo o Tau foafoaaga.  
  
Matou e molimau, O toku Atua, me ia Koe ko te Atua, kae e seai aka foki se Atua na ko Koe.  Mai i te pilitakiiga ko oti ne isi a Koe kae e seai lele e pau io me e fakatau kia Koe, kae ka nofo pena e pau ke oko ki se gata-mai.  Au e akai totuli kia Koe, mai i mata kola e lavea a Koe ko fakatu i luga i te nofoga-a-tupu o te fakatasitasi mo te koga nofo o te tafatasi, ke feasoasoani kia latou katoa kola e alofa kia Koe e auala atu i Tou Igoa Tafasili i te Takutakua, kae ke sapai aka au ki luga ki koga maluga kola ka molimau i olotou fuaitino mo olotou laulaufaiva me ia Koe ko te Atua, ko te SeFakatusagia, ko te Tasi, ko te Faka-logogia-Katoatoa.  A Koe e 
seai se taimi ne isi e pau io me se taugasoa o Koe.  A Koe, i te tonuuga, ko te MatagofieKatoatoa, ko te Mafi-Katoatoa, Tena Feasoasoani e manakogina ne tagata katoa.

-Bahá'u'lláh
-----------------------

FALEPUIPUI (#12256)

Tavaeega e io Koe, O te Aliki toku Atua!  Au e akai kia Koe e auala atu i Tou Gali mai i te Favavau pela foki mo Tou Igoa Tafasili ite 
Takutakua, Tela a Koe ko oti ne ofo ko latou katoa e nofo i Tou lalolagi mo te lagi e mafai o toe fanau foou mai, kae Tela ne pei kite fale-puipui ne Koe ko te ma ko tino ke mafai, pela mese alofaaga o Tou maukoloa mo Tou nofoaiga-a-tupu e mafai, o tala mai i te faka-pagota o olotou fiafiaaga masei mo manakoga faitogafiti, ke llau au mo latou ko la e manava poko ki te manogi o Tou alofafakamagalo, kae fakavave atu i se makini pela mo vaai ola o Tou alofatauanoa, kola e seai ne matasana e mafai o fakalavelave a latou o fuli atu kia Koe, io me se matatao e mafai o fuli atu a olotou mata ki te tulaga o Tau Fakaasiiga.  
  
Matou e molimau, O toku ALiki, ia Koe kote Atua kae e seai aka foki se Atua i tafa o Koe.  Mai ite vavau a Koe ne faka-kalauna i te tumu e se-okogina o te maluga o Tou maalosi, kae ka pena ki te favavau ka tumau o faka-galue a Tou maalo maluga kae e semafai o taofigia.  A lukuuga o te lalolagi e seai se maalosi o faka-lavelave ki Tou finagalo, io me e mafai ne latou i te lalolagi mo latou katoa i te lagi o solo keatea a Tau ikuuga. A Koe e tonu ko te Mafi-Katoatoa, ko te Tafasili i te Maluga, ko te Tafasili i te Takutakua.  
  
Fakamanuia, O toku Atua, a latou kola e tautali ki te Bayán pela loa me ko latou ko oti ne llau pela me ko tino o Bahá, kola ko oti ne ulu atu i loto ite Vaka Lanu (Crimson Ark - Feagaiiga) i Tou Igoa, ko te Tafasili i te Maualuga, ko te tafasili i te Maluga.  A Tou mafi, e tonu e pau mo mea katoa.

-Bahá'u'lláh
-----------------------

FALEPUIPUI (#12257)

E lavea ne Koe, O toku Atua, a Tau tavini tela e nofo i te fale-puipui tenei, e motu katoatoa mai i sose tino na ko Koe, ko ona mata e fuli atu ki te auala o te Aso-Malulu o Tou alofa-fakamagalo, ko tena loto e nnau ki faka-asiiga gali o Tou alofa-mana.  A Koe, O toku Aliki, ko oti ne luku fakatasi aka a famai ko la ne oko aka kia ia i Tou auala.  E lavea ne Koe a ia e salasala se auala mo Au meaola faiite ko la ne soli tuakoi kae teke atu kia Koe, kola e nofo i te va o ia mo Au fagasele, ko la ko oti ne fakatumau a tena koga-nofo i te fenua tenei kae agasala atu kia Koe, pela foki mot e faka-lavelave ki Au tavini mai ite fuli atu kia Koe.  
  
Mo mea katoa konei e tuku atu ne au a taku fakafetai kia Koe, O toku Aliki! Au e akai totuli kia Koe ke feasoasoani mai kia au mo latou kola e alofa mai kia au o faka-lauefa a Tau Muna, kae ke fakafonu mai matou mo se maalosi tela ko masaki o te lalolagi nei pela foki mo faka-lavelave ka seai ne olotou malosi o pono mai matou i te masaua o Koe kae fakamaluga a Ou uiga llei.  E Maalosi a Koe o fai a mea katoa; malifalifa a Koe i luga i mea katoa.  
  
A sose tino taua e seai kae se pologa tela ko Tou lima ne mafua mai iei, kae ko ia loa tela maumea o maumea se faka-alofa i mua o te poko o Tou maumea.  A ia tafasili i te malu o malu e maulalo ma fai ko fetaui mo fakaasiiga o Tou matagofie, a ko pule mo tupu tafasili i te mafi e seai me se faka-alofa fua manafai ko fakafetaui mo faka-talitonuuga maalosi o Tau pulega. 
 
Ofa ki lalo, O toku Atua, a te veli o manatu e seai-ne-aoga kola ne fakalavelave ki te kiloga o Au tino, ko tino katoa ke fakavave ki mua ia Koe, ke mafai o sasale i te auala o Tou fiafiaaga, kae e sasale i auala o Tau Talitonuuga.  Matou, O toku Atua, ko Au tavini mo Au tino faigaluega.  A Koe ko lava loa kia matou ko te mea ke mafai ne matou o faka-se-aoga a te lalolagi pela foki mo latou kola i loto iei.  Matou e lotomalie katoatoa mo mea ko la ko to mai ki luga ia matou i Tou auala, kae fai atu penei: “Tavaeega e io 
Koe, tela i Ou lima e maua iei a tulaga o te fakaasiiga mo te foafoaaga, pela foki mo maalo katoa i te lalolagi mo te lagi!”

-Bahá'u'lláh
-----------------------

FALEPUIPUI (#12258)

Tavaeega e io Koe, O toku Atua, e Lavea mai au ne Koe e loka i te Falepuipui tenei, kae eiloa fakallei loa ia au ne ulu ki loto nei ona loa ko Koe mo te faka-aloaloga o Tau muna mo te faka-salalauga o Tau Fakatokaaga.  Au e tagi atu kia Koe, i te taimi loa tenei, O ko Koe Tela ko te Aliki o lalolagi katoa, o akai totuli atu kia Koe, i Tou Igoa e seai se-fa-lotoloto-lua iei, ke fakapilipili mai a loto o Au tavini kit e Aso-Maliulu o Ou tofiiga tafasili ite maluga mo te Kogaa-koga Tapuaki o Au fakailoga tafasili i te malifalifa.  
  
Kae ko fakalavelave kola ne oko mai kia au i Tou auala, O toku Atua, ne mafai foki pefea a toku loto o fiafia i Ou aso, kae moi fai se ko toto kola ne maligi mo te alofa mo Koe, ne mafai foki pefea o pokotia a mata o Au fino filifilia mai i mua o mata o Au meaola faiite?  Au e tauto ki Tou Mafi!  A te lakei tela e fakasafe i mata o Au fagasele ko toto kola, i te olotou alofa mo Koe, e tafe mai ki tua i olotou mualae ki luga i olotou mata.  
  
E lavea ne Koe, O toku Atua, i ivi takitasi i toku fuaitino ko tagitagi pela me se paipa mo pese o Tau faka-maalosi, e fakaasi mai iei a failoga o Tou tafatasi mo alofaaga manino o Tou fakatasitasi.  Au e akai kia Koe, O toku Atua, mai i Tou igoa tela e salasala a mea katoa ke avaka ki luga a tavini kola e fia faka logologo ki te leo o sikuleo kola ne olo aka ki luga mai ite lima taumatau o te kalauna-a-tuou o Tou matagofie.  Fai a latou, tena la, ke inu mai i te lima o Tou alofa mana ote uaina o Tou alofa-fakamagalo, ko te mea ke mafai o fakatalitonu ki olotou loto, kae fai a latou ke fuli keatea mai i te lima fakamaui o manatu fakasupsupa ki te lima taumatau o te talitonu-fakapatonu mo te talitonu katoatoa.  
  
Nei la ko oti ne takitaki ne Koe a latou ki te mataloa o Tou alofa mana, O toku Aliki, sa liakina latou keatea, i Tou alofa-maukoloa; kae nei ko oti ne kalagina ne Koe a latou kit e sikulagi o Tau Fakatokaaga, tausi a latou mo a e se oloatu kia Koe, mai i Tou alofakaimalie mo alofaga.  E maalosi a Koe o fai ate mea e manako Koe kiei.  E seai se Atua na ko Koe, ko te Maluga, ko te IloaKatoatoa.

-Bahá'u'lláh
-----------------------

FALEPUIPUI (#12259)

E   lavea ne Koe, O toku Aliki, a toku kogaa-koga nofo kanoloto o te mauga teni kae e molimau ne Koe a toku kufaki.  E tonu e semanako au ki se isi mea aka vagana ko Tou alofa mot e alofa o latou kola e alofa kia Koe.  E mafai pefea o fakamauluga ne au ate matagali o Tou faka-Aliki, aua e iloa ne au a toku seai-lele-loa mai i mua o te koga nofo o Tou matagofie?  Kae e ui i ei a te fanoanoa o te nofo faka-alofa mo nofo tokotasi e fakaala ne ia au ke tagi atu kia Koe mai i luga i talosaga, se-taumate ko Au tavini fakamaoni ke mafai o iloa aku tagi-fanoanoa, ke mafai o talosaga atu kia Koe, kae ka tali ne Koe mo te alofa a olotou talosaga pela mes alofaga o Tou gali mo Ou alofaga.  Au e molimau me e seai aka foki se Atua na ko Koe, pela loa mo te mea ko oti ne fakaeke ne Koe mo te nofoaiga-a-tupu, matagofie, silisilese mo te maalosi tela e seai aka se Tavini a Koe e mafai o lavea io mea o maina.  E tonu a Koe ka, ona ko uiga kola e maua i Tou Uiga-Tonu, e tumau pena aunoa mo te se-mafai o iloagia vagana ko Koe.

-The Báb
-----------------------

FALEPUIPUI (#12260)

E mafai pefea ne au o tavae a Koe, O te Aliki, aua i fakatalitouuga o te mafi o Tou matagofie mo te gali o te manogi suamalie o Koe te la ko oti ne aumai ne Koe kia Au i te olo-maalosi tenei, i se auala tela e seai se mea i lagi io me ko te lalolagi e mafai o fakatusa mo latou?  A Koe ne taumata mai kia Au i te koga-loto o te mauga tenei tela Au ne siomia ne mauga mai i feitu katoa.  E tasi e tautau mai i luga ia Au, ko nisi e tu mai i Toku feitu fakaatamai mo Toku faka-maui kae e isi foki e olo aka mai i Oku mua.  E 
maluga a Koe, e seai aka foki se Atua na loa ko Koe.  E pefea ate uke o taimi ne lavea ne Au a fuafatu mai i luga i te mauaga e to ifo kia luga ia Au, kae ne puipui Au ne Koe mai i ei kae tausi Au i loto ite olo-maalosi o Tou Tafatasi faka-te-lagi.  
  
E matagofie kae maualuga a Koe, mo tavaeega e io Koe mo sose mea tela e alofa Koe kiei kae manako kiei, kae fakafetai kia Koe mo mea ko la ko oti ne fakaekegia ne Koe kae ko leva foki ne faka-nofogia.  Mai i te pilitakiiga a Tou alofa-fakamagalo atafai ko oti ne tuku ifo ki lalo a ko te faifaiiga o Tau foafoaaga ko oti kae koi fai loa seai se-gataaga.  Ou tugalima e se-ppau mo se galuega a se isi tino aka na ko Koe, a ko Au mea-alofa e se-fakatusagia ki mea-alofa a so se isi aka na ko Koe.   
  
Tavaeega e io Koe, O toku Fagasele, kae e lauefagia a Tou Igoa.  Mai i taimi ne laka a toku vae ki te olo-tau tenei, ke oko ki te minute e liakina ne au mai iei, e lavea ne au a Koe ko oti ne fakatu i luga i Tou nofoga o te matagofie mo te afioga, e aumai ki lalo ia Au a mea-alofa e se-lausia mai i Au mea-alofa tafasili ite uke mo te alofa-kaimalie.  E lavea ne Koe a Toku koga-nofo e seai na ko kano-loto o mauga, kae e lavea ne Koe e seai aka foki i Toku Fuaitino na ko faka-talitonuuga o te tafalalo mo te faka-alofa.  
  
E maluga a Tou Igoa, e moli atu kia Koe a fakafetai mo taimi katoa o Tau Faka-tonuuga e se-mafai-o-mafulifuli kae avatu Ou tavaeega mo masauaga taki-tasi katoa o Tou puapuaaga.  Ko oti ne faka-pokotiagia Au ke pei ki loto i te falepuipui, tela la ko oti ne fuli ne Koe ki se fatoaaga o te Palataiso mo Au kae ko oti ne fai aka a ia mo fai ate potu alaala o te fale o te fakatasitasi e segata-mai.  
  
E uke a kupu ne tuku ifo ki lalo ne Koe kia Au, mo talosaga e lagona ne Koe ne tuku atu ne Au kia Koe.  E keskese a fakaasiiga ne kalaga mai ne Koe auala mai ia Au mo lagona ne molimaugia ne Koe ia Au.  
  
E lauefa a Tou Igoa.  E fia a te tofotofooga ne seai ne olootou maalosi o ave Au keatea mai i te tuku atu o fakafetai kia Koe ako Oku vaaivaiiga ne semafai o taofi mai Au mai i te fakamalugaga a Ou uiga llei.  A tino masei ne galue ke fuli a Toku koga-nofo i ei ki te se-malu mo te faka-tauemu.  A ko Koe ko oti ne faka-mana Au mai i Toku masausauaga o Koe, ko oti ne fakamaluga Au mai i Oku tavaeega o Koe, ko oti ne feasoasoani alofa mai kia Au mai i fakaasiiga o Tou tafatasi, kae ko oti ne fakaeke mai kia Au a fakaaloaloga lasi mai i luga i matagofie gali o Tou favavau taumua mai i te pilitakiiga.  Ki te afi e pule ne Koe, “Ke fai a Koe me se sinu faka-mafanafana ki taku Tavini, pela me se masauaga mai i Toku nofo-mai”.  Ao, au e tauto ki Tou matagofie, kia Au a te falepuipui ko oti ne fakatalitonu me e seai aka foki na ko te fatoaga tafasili i te gali o te Palataiso kae ko oti ne fai pela me ko toe kogaa-koga tafasili i te maualuga i te lalolagi mai i luga.  
  
Tavaeega mo te matagofie e io Koe.  E fakafia a fili ne oko mai ki luga ia Au kae ne taofi ne Koe kae fakaseke atu a latou mai i Tou alofa-atafai; kae e fia taimi ne isi a gasuesuega o teke mai Au mai i lima o tino, kae e ui i ei, ne fai ne Koe ke noga ifo ki lalo mai i Tou alofa-fakamagalo atafai.  E fia katoa taimi ne faka-ka gia a afi ne Tino-olo-i-vao mo Oku sunu, kae ne fai ne Koe ke se taunu ona ko Au; kae e fia foki a taimi a tino masei ne taku valea ne latou kae faka-tauemu a Au kae ne fuli ne Koe a latou pela me ne maka o fakaloalo mo Au…  
  
E tonu a Koe ko te faka-moemoega tafasili i te maluga o sose tino salasala mo te Koulu o te manakoga o latou ko la e kausaki kia 
Koe.  A Koe ko Ia Tela ko toka o tali a te kalaga a latou ko la e lavea ne latou a Tou fakatasitasi faka-te-lagi, kae ko Ia Tela mai i 
Ona mua e tu mo te ofo a latou ko la e vaaivai a olotou fatu.  A Koe ko te Feasoasoani o latou mativa, ko te Fakaola o pagota, ko te Tausi o latou ko la teke, ko te Faka-masei o latou ko la fai mea-se-tonu, ko te Atua o tagata katoa, ko te Aliki o mea faiite katoa.  A maalo o te foafoaaga katoa e io Koe, O ko Koe ko te Aliki o lalolagi katoa.  
 
O Koe ko te Ola-ia-Ia Tokotasi!  A Koe ne feasoasoani mai Au i sose puapuagatia e oko mai ki luga ia Au kae i sose masaki tela e poloka mai i mua o Oku.  A Koe ko Toku Taugasoa tokotasi faeloa i Toku nofo-tokotasi, ko te Fiafia o Toku loto i Toku fakakesegia mo Toku Fagasele Tafasili i te Llei i Toku fale-puipui mo i Toku Kogaa-Koga Nofo.  E seai aka se Atua na ko Koe!  
  
Sose tino tela e feasoasoani a Koe ki ei e se mafai o maua ne te fanoanoa; sose tino tela e puipuigia ne Koe e se-mafai o tanumia; sose tino tela e feasoasoani a Koe ki ei e se toe maua ne te fakalavelave; kae ko ia tela e fuli atu a Tau kiloga ki ei e se-mafai o 
mao mai ia Koe.  
  
Tusi ifo ki lalo mo matou a sose mea tela ei o Koe, kae fakamagalo mai matou ona ko matou.  E tonu a Koe ko te Aliki o te maalosi mot e matagofie, ko te Aliki o lalolagi katoa.  “E mao a te matagofie o Tou Aliki, ko te Aliki o te takutakua katoa, mai i te mea e fakatautau ne latou a Ia, kae ko te filemu ke i luga i Ana Apositolo, kae ko tavaeega e i luga i te Atua, ko te Aliki o lalolagi katoa.” (1)

-The Báb
-----------------------

