Fidelite (#7661)

Lwanj pou non Ou, O Senyè, Bondye mwen! Mwen sipliye Ou poutèt pouvwa Ou ki te antoure tout bagay ki kreye, poutèt souverènte Ou ki te depase tout kreyasyon an, poutèt Pawòl Ou ki te kache nan sajès Ou e ki te sèvi pou kreye syèl Ou ak tè Ou, mwen sipliye Ou pou pèmèt nou rete fèm nan lanmou nou pou Ou, pou nou rete obeyisan anvè bon plezi Ou, ni pou nou fikse rega nou sou figi Ou, epi selebre glwa Ou. Ban nou kapasite, O Bondye mwen, pou nou kapab gaye pawòl Ou yo toupatou pami kreyati Ou yo, pou nou pwoteje Fwa Ou nan wayòm Ou an. Ou te toujou egziste endepandan ak pawòl nenpòt nan kreyati Ou yo, epi Ou pral toujou rete menm jan an pandan tout etènite. 
Nan Ou menm, mwen te mete tout konfyans mwen, e nan direksyon Ou, mwen te vire figi mwen; sou kòd swen diven Ou, mwen te kenbe, e mwen te prese pou jwenn lonbraj mizèrikòd Ou. O Bondye mwen, pa repouse mwen nan pòt Ou a fè m’ dekouraje, e pa anpeche mwen jwenn gras Ou, paske se Ou menm sèl m’ap chèche. Pa gen lòt Bondye esepte Ou menm, Sila a K’ap Toujou Padone, Ki Gen Plis Bonte. 
Lwanj pou Ou, O Ou menm Ki Byeneme a pou tout moun ki te rekonèt Ou! 
- Bahá’u’lláh

-Bahá'u'lláh
-----------------------

Fidelite (#7662)

O Senyè! Vwazinaj Ou se espwa mwen, prezans Ou se rèv mwen, souvni Ou se dezi mwen, lakou glwa Ou se bi mwen, abitasyon Ou se objektif mwen, non Ou se gerizon mwen, lanmou Ou se limyè kè mwen, epi reyisi sèvi Ou se pi gran entansyon mwen! Mwen sipliye Ou poutèt Non Ou, ki te pèmèt moun ki te rekonèt Ou vole nan pi wo otè konesans Ou yo, e ki te fè Ou bay moun ki adore ou avèk devouman pouvwa pou monte bò lakou sen favè Ou yo, mwen sipliye Ou pou ede mwen vire figi mwen nan direksyon figi Ou, pou mwen fikse je mwen sou Ou, epi pale sou glwa Ou. 
Se mwen, O Senyè mwen, ki te bliye tout lòt bagay esepte Ou menm, ki te vire bò Sous gras Ou, ki te abandone tout bagay sof Ou menm avèk espwa mwen ta kapab apwoche pre lakou Ou. Gade mwen, Senyè, avèk je mwen leve nan direksyon Syèj la k’ap klere avèk ekla limyè Figi Ou. Epi, voye desann sou mwen, O Byeneme mwen, sa ki pral pèmèt mwen rete fidèl nan Koz Ou, pou dout enkredil yo pa reyisi anpeche mwen vire nan direksyon Ou. 
An verite, Se Ou menm Bondye Pouvwa a, Ou menm Ki Bay Sekou nan Danje, Tout Gloriye a, Toupisan an.

-Bahá'u'lláh
-----------------------

Fidelite (#7663)

Glwa pou Ou, O Wa etènite a, Kreyatè nasyon yo, ak Mèt Ki fòme chak zo k’ap dekonpoze! Mwen priye Ou, nan Non Ou, Non an Ou te sèvi pou rele tout limanite vin jwenn syèl grandè Ou ak glwa Ou, Non an Ou te sèvi pou gide sèvitè Ou yo nan lakou gras Ou ak favè Ou yo, mwen priye Ou pou konte mwen pami sila yo ki te libere yo ak tout bagay esepte Ou menm, ki te mete yo nan direksyon Ou, e ki pa t’ kite difikilte Ou te voye reyisi anpeche yo vire nan direksyon benediksyon Ou yo.
O Senyè mwen! Mwen te mete men mwen sou manch bonte Ou, epi mwen te kenbe fèm ak ke wòb favè Ou. Poutèt sa, voye desann sou mwen, soti nan nyaj charite Ou yo, sa ki pral elimine nan mwen souvni tout sa ki pa Ou menm, sa ki pral pèmèt mwen vire pou jwenn Sila a Ki se Bi adorasyon tout limanite. Se Li menm Ki te genyen rasanble kont Li tout moun ki te simen twoub, sila yo ki te brize alyans Ou, e ki pa te kwè nan Ou ak nan siyn Ou yo. 
O Senyè mwen! Pa refize kite mwen pran nan pafen ki soti nan vètman Ou nan jou Ou yo, e pa anpeche mwen jwenn souf Revelasyon Ou nan douvanjou a ki klere nan limyè figi Ou. Ou gen pouvwa pou fè tout sa Ou vle. Pa gen anyen ki kapab reziste kont volonte Ou, ni detounen sa Ou te deside avèk pouvwa Ou.
Pa genyen lòt Bondye aprè Ou, Toupisan an, Li menm Ki Gen Tout Sajès la.

-Bahá'u'lláh
-----------------------

Fidelite (#7664)

Glwa pou Ou, O Senyè Bondye mwen! Mwen priye Ou fò poutèt Li menm Ki se Pi Gran Non Ou an, Ki te soufri anpil nan men kreyati Ou yo ki te rejte verite Ou, Sila a Ki te antoure ak anpil chagren okenn lang pa kapab esplike, mwen priye Ou pou pèmèt mwen sonje Ou ak selebre lwanj Ou, nan jou sa yo kote tout moun te vire kite bèlte Ou, te diskite avèk Ou menm, epi vire do avèk ògèy bay Li menm K’ap Revele Koz Ou a. Pa gen yon moun, O Senyè mwen, ki kapab ede Ou, se sèl Ou menm, e pa gen okenn pouvwa ki kapab soutni Ou sof pwòp pouvwa pa Ou. 
Mwen sipliye Ou pou pèmèt mwen kenbe fèm ak lanmou Ou e ak souvni Ou. An verite, li posib pou mwen fè sa, e se Ou menm sèl Ki konnen tout sa ki anndan mwen. An verite, Ou konnen, epi Ou konprann tout bagay. Pa anpeche mwen wè, O Senyè mwen, glwa a ki nan limyè figi Ou, yon limyè ki tèlman briyan li te klere tout mond la. Pa gen lòt Bondye esepte Ou menm, Sila a Ki Gen Plis Pouvwa, Tout Gloriye a, Li menm Ki Toujou Padone.

-Bahá'u'lláh
-----------------------

Fidelite (#7665)

Se Ou menm Ki louwe ak glorifye, O Bondye! Fè jou kote n’ap jwenn sen prezans Ou an rive vit. Rejwi kè nou avèk pisans lanmou Ou ak bon plezi Ou, epi voye fidelite sou nou pou pèmèt nou swiv Volonte Ou ak Lòd Ou avèk tout kè nou. An verite, konesans Ou anbrase tout bagay Ou te kreye nan tan pase yo ak tout bagay Ou pral kreye nan lavni, epi pouvwa selès Ou depase pouvwa tout sa Ou te fè egziste ak tout sa Ou pral fè egziste. Pa gen anyen lòt pou nou ta adore esepte Ou menm, pa gen anyen lòt pou nou ta vle jwenn esepte Ou menm, pa gen anyen lòt pou nou ta onore esepte Ou menm, e pa gen anyen pou nou ta renmen sof bon plezi Ou.
An verite, se Ou menm Ki Dirijan siprèm nan, Verite Souveren an, Sila a Ki Bay Sekou nan Danje, Ki Egziste Pou Kont Li.

-The Báb
-----------------------

Fidelite (#7666)

O Bondye Ki Gen Yon Kè Ki Sansib! Mwen remèsye Ou poutèt Ou te reveye mwen, fè mwen konsyan. Ou te ban mwen yon je ki wè e Ou te ban mwen favè yon zòrèy ki tande, Ou te mennen mwen nan wayòm Ou e Ou te gide mwen nan chemen Ou. Ou te montre mwen bon direksyon an e Ou te fè mwen antre nan lach delivrans lan. O Bondye! Kenbe mwen fidèl e fè mwen fèm ak solid. Pwoteje mwen kont eprèv feròs yo epi defann mwen, ban mwen abri anndan fòterès trè pisan an ki se Alyans ak Testaman Ou. Se Ou menm Ki Gen Pouvwa. Se Ou menm Ki Wè. Se Ou menm Ki Tande. 
O Ou menm Bondye Ki Gen Pitye. Mete nan mwen yon kè ki ap limen tankou yon vè lanp avèk limyè lanmou Ou, epi voye sou mwen panse ki ta kapab chanje mond sa a nan yon jaden woz avèk gras selès yo k’ap debòde. 
Se Ou menm Ki Gen Kè Sansib, Ki Mizèrikòdye a. Se Ou menm Bondye Ki Gen Gran Bonte a.

-`Abdu'l-Bahá
-----------------------

Fidelite (#7667)

O Ou menm, Bondye mwen, Ou menm K’ap gide chèchè a pou li jwenn chemen k’ap mennen li kòrèkteman, Ou menm K’ap delivre nanm nan ki pèdi, ki avèg, pou li soti nan dezè destriksyon an, Ou menm K’ap voye sou sensè yo gran bonte ak favè Ou yo, K’ap pwoteje moun ki nan perèz anndan refij solid Ou a, Ou menm Ki rete nan pi wo paradi Ou, Ki reponn kri moun ki lanse apèl pou Ou. Lwanj pou Ou menm, O Senyè mwen! Ou te gide moun ki kite chemen an fè yo soti nan lamò manke kwayans, epi Ou te mennen moun ki vle apwoche Ou fè yo jwenn objektif vwayaj la, Ou te rejwi sila yo pami sèvitè Ou yo ki gen konfyans paske Ou te pèmèt yo jwenn dezi yo ki te pi chè a, epi, depi nan Wayòm bèlte Ou a, Ou te ouvri baryè rankont lan devan figi moun ki anvi jwenn Ou, e Ou te retire yo nan dife dezespwa ak peche - pou fè yo prese pou avanse nan direksyon Ou, jwenn prezans Ou, rive nan pòt Ou k’ap ofri akèy, epi resevwa yon bon pòsyon nan kado Ou yo. 
O Senyè mwen, yo te swaf, Ou te bay bouch sèch yo dlo rankont lan. O Ou menm Ki Dou, Sila a K’ap Bay Favè yo, Ou te kalme doulè yo avèk remèd bonte ak gras Ou, e Ou te geri maladi yo avèk medikaman siprèm nan ki se mizèrikòd Ou. O Senyè, kenbe pye yo fèm nan chemen dwat Ou a, fè je zegwi a laj pou yo, e fè yo mache nan glwa pandan tout tan, byen abiye ak rad fanmi wa yo. 
An verite, se Ou menm Ki Renmen Bay, K’ap Toujou Bay, Ki Gen Anpil Valè, Ki Gen Plis Bonte. Pa gen lòt Bondye esepte Ou menm, Pisan an, Ki Plen Pouvwa, Egzalte a, Sila a K’ap Pote Viktwa.

-`Abdu'l-Bahá
-----------------------

