मानवजाति (#11128)

मेरा पूजा र आराधनाका लक्ष्य, मेरा प्रभु ! म तिम्रो एकता र अद्वितीयताको साक्षी दिन्छु तथा अतीत र वर्तमानमा तिम्रा सारा उपहारहरूलाई स्वीकार गर्दछु । तिमी नै सर्व– दानी हौ र तिम्रै कुपाको प्रचुर दयावृष्टिले ठूला र साना सबैलाई सिञ्चित गरिरहेको छ र तिम्रो अनुग्रहको वैभव आज्ञाकारी र उद्दण्ड सबैमाथि समान रूपमा बगिरहेको छ । 

हे करुणानिधि, तिम्रो द्वारसामु दयाको विशुद्धसार नतमस्तक भएको छ र तिम्रो पुण्यालयको वरिपरि प्रगाढ भक्तिसित प्रेमाद्र–दया परिक्रमा गरिरहेको छ । तिम्रो प्राचीन अनग्रहको आशा राख्दै र तिम्रो वर्तमान कृपाको चाहना गर्दै हामी तिमीसित याचना गर्दछौ कि जीवलोकमा प्रकट भएका ती सबैमाथि तिमी दया गर र तिम्रो यस युगमा तिम्रो अनुग्रहको वृष्टिबाट तिनीहरूलाई वञ्चित नगराऊ । हामी सबै गरीब तथा अभावग्रष्त छौं, तर तिमी निश्चय नै सर्व– सम्पन्न, सर्व–विजयी तथा सर्व–शक्तिमान् छौ ।

-Bahá'u'lláh
-----------------------

मानवजाति (#11129)

हे तिमी करुणामय प्रभु, तिमी जो कृपालु तथा सक्षम छौ, हामी तिम्रा सेवकहरू हौं तथा तिम्रै अधीनमा छौं । हामी माथि तिम्रो कृपाको वृष्टि गरिदेऊ । हाम्रा नेत्रहरूलाई ज्योति, हाम्रा कानहरूलाई श्रवणशक्ति तथा हाम्रा हृदयहरूलाई समझदारी र प्रेम गर्ने शक्ति देऊ । 

तिम्रो शुभ–सन्देशद्वारा हाम्रो आत्मालाई सुखी र आनन्दित बनाइदेऊ । हे प्रभु ! हामीलाई तिम्रो अधिराज्यको बाटो देखाइदेऊ र पवित्रात्माको श्वासद्वारा हामीमा नयाँ जीवनको सञ्चार गर । हामीलाई अनन्त जीवन देऊ र हामीलाई अक्षय इज्जत प्रदान गर । मानवजातिलाई एक गरिदेऊ र मनुष्यलोकलाई प्रज्ज्वलित पारिदेऊ । हामी सबै तिम्रो मार्गको अनुशरण गर्न सकौं, तिम्रो सदिच्छा प्राप्त गर्न सकौं र तिम्रा अधिराज्यका रहस्यहरू बुझ्न सकौं । हे प्रभु ! हामीहरूलाई एक गरिदेऊ र हाम्रो हृदयलाई तिम्रो चिरस्थायी बन्धनमा बाँधेर एक गरिदेऊ । साँच्चै नै, तिमी नै दाता हौ, तिमी नै दयालु हौ र तिमी नै सर्व–शक्तिमान् हौ ।

-`Abdu'l-Bahá
-----------------------

मानवजाति (#11130)

हे हृदयालु ईश्वर ! तिमीले समस्त मानवजातिलाई मात्र एउटै आमा–बाबुद्वारा उत्पन्न गर्यौ । तिमीले आज्ञा दिएका छौ कि सबै एउटै घर–परिवारका सदस्य बनून्, अनि तिम्रो पवित्र उपस्थितिमा सबै तिम्रा सेवक होऊन् तथा सारा मानवजाति तिम्रै शिविरमुनि आश्रित छन् । 

तिम्रा सन्तान तिम्रो प्रसादको थालको छेउ–छाउमा जम्मा भएका छन् र तिम्रो पालनहारत्वको प्रकाशद्वारा चम्किरहेका छन् । 

हे प्रभु ! तिमी सबैमाथि दया  गर्छौ, तिमीले नै सबैको भरण–पोषणको व्यवस्था रचेका छौ । तिमीले नै सबैलाई जीवन प्रदान गर्दछौ । तिमीले प्रत्येक विनम्र जनलाई योग्यता एवं प्रतिभा दिएका छौ तथा समस्त मानव–जातिलाई आफ्नो दयाको महासागरमा डुबाइदिएका छौ । 

हे उदार स्वामी ! प्रत्येक देशमा आफ्ना सेवकहरूलाई मिलाई एक गर, विभिन्न धर्महरूमा मेलमिलाप गराइदेऊ, सबै राष्ट्रहरूलाई एउटै राष्ट्र बनाइदेऊ जसले गर्दा उनीहरू सबैले आपसमा एक अर्कालाई एउटै कुटुम्ब सरह देखून् तथा सबैलाई एउटै देशका बासिन्दा सम्झुन् । मनुष्यमात्रले स्नेह भाव तथा अखण्ड एकतापूर्वक आपस्तमा हेलमेल गरून् । 

हे ईश्वर ! मानव एकताको ध्वजालाई माथि फहराइदेऊ । 

हे परमेश्वर ! अति महान् शान्ति स्थापित गरिदेऊ । 

सबै हृदयहरूलाई पगालेर एउटै हृदय गरिदेऊ । 

हे तिमी सहृदय पिता ! आफ्नो प्रेमको सुवासद्वारा हामीलाई खुशी राख । आफ्नो मार्गदर्शनको प्रकाशद्वारा हाम्रा आँखा तेजस्वी बनाइदेऊ । आफ्नो शब्दको सुरिलो आलापद्वारा हाम्रा कानहरूलाई हर्षोन्मादित गरिदेऊ तथा आफ्नो पालनहारत्वको आश्रयमुनि हामीलाई सुरक्षित राख । 

तिमी नै हौ सर्व–शक्तिमान्, महाबलवान्, तिमी नै हौ क्षमाशील तथा तिमी नै हौ त्यो शक्ति जसले मनुष्य जातिका दोषहरू दखेता पनि नदेखेझैं गदर्छ ।

-`Abdu'l-Bahá
-----------------------

मानवजाति (#11131)

हे दयालु प्रभु, तिमी जो उदार तथा करुणामय छौ ! हामी तिम्रा सघांरका सेवकहरू हौं र तिम्रो दैवी एकताको आश्रयको छायाँमा जम्मा भएका छौं । तिम्रो कृपाको सूर्य सबैमाथि चम्किरहेको छ र तिम्रो करुणाको मेघ सबैमाथि बर्सिरहेको छ । तिम्रा उपहारहरूले सबैलाई ढाकेका छन्, तिम्रो शक्तिले सबैलाई पालन–पोषण दिएको छ, तिम्रो संरक्षणमा सबैले ओत पाएका छन् र तिम्रो अनुग्रहको दृष्टिले सबैलाई प्रज्ज्वलित पारेको छ । हे प्रभु ! हामीलाई तिम्रा अनन्त वरदानहरू देऊ र तिम्रो मार्गदर्शनको प्रकाशलाई चम्कन देऊ । आँखाहरूलाई तेजिलो पारिदेऊ, आत्माहरूलाई हर्षोमानदित बनाइदेऊ र हृदयहरूमा एउटा नयाँ चेतना भरिदेऊ । तिनीहरूलाई अनन्त जीवन प्रदान गर । तिम्रो ज्ञानको ढोका खोलिदेऊ र तिम्रो धर्मको ज्योतिलाई चम्कन देऊ । सम्पूर्ण मानव–जातिलाई एकताको सूत्रमा बाँधेर आफ्नो आरक्षणको ध्वजामुनि ल्याऊ, ताकि तिनीहरू सबै एउटै समुद्रका लहरहरू, एउटै वृक्षका पातहरू र हाँगाहरू सरह एक हुन सकून् र एउटै तम्बूमुनि भेला हुन सकून् । 

तिनीहरू सबैले एउटै मुहानबाट पिउन सकून्, एउटै समीरबाट स्फुर्ती प्राप्त गरून् । तिमी नै हौ दाता, तिमी नै हौ करुणामय ।

-`Abdu'l-Bahá
-----------------------

