MATATAMATA (#6962)

O i Kemuni na Turaga yalololoma! O i Kemuni sa dau lomasoli ka rawata na veika kece ga. Sa i keimami oqo na dauveiqaravi e na Nomuni mata ni katuba ka soqoni vata tiko e na ruku ni yaloyalo dauveivakarurugi ni Nomuni duavata vaKalou. E sa cilavi keimami kece tu na matanisiga ni Nomuni veivosoti ka sovaraka mai vei keimami kece sara na o ni Nomuni veivakalougatataki. Na Nomuni solisoli loloma e vakaukauwataki keimami kece tiko, na Nomuni veitaqomaki e tarai keimami kecekece, kei na i serau dauloloma ni Matamuni e raici keimami kece tu. O i Kemuni na Turaga! Ni solia mai vei keimami na Nomuni solisoli tawayalani ka vakalaiva na rarama ni Nomuni veituberi me cila mai. Mo ni vakararamataka na matai keimami, ka vakamarautaka na yalo e na marau tudei. Mo ni solia sobu mada mai e dua na yalo vou ki na dui utoi keimami ka vakalougatataki ira e na bula tawamudu. Mo ni dolava mada na katuba ni kilaka dina ka laiva na rarama ni vakabauta me cila vakayauyau mai. Mo ni sa kauti ira vata mada mai na tamata kece sara ki na dua ga na i vakaruru e na ruku ni drotini ni Nomuni veisaututaki ka vakaduavatataki ira e na yalo veilomani, me rawa kina ni ra duavata me vaka na rarama serau mai na dua ga na matanisiga, me ra vaka na ua ni dua ga na wasawasa, ka vuanikau ni dua ga na vunikau. Me ra gunu kece ga mai na duabau na vurevure ni wai. Me ra vakabulabulataki mai na duabau ga na matanicagi mudre. Me ra bau rawata mada na veivakararamataki mai na duabau ga na vu ni rarama. Sa i Kemuni dina na Dausolisoli, na Dauveivosoti, na kaukauwa duadua ga.

-`Abdu'l-Bahá
-----------------------

MATATAMATA (#6963)

O i Kemuni na Turaga yalololoma! O ni sa buli ira na tamata mai na dua vata ga na i vurevure. O ni sa vakarota me ra sa okati me duabau ga na matavuvale. E na Nomuni Tutu Tabu era sa Nomuni dauveiqaravi kece ga, ka ra vakarurugi kece ga na tamata e na ruku ni nomuni iVakaruru Tabu; era sa soqoni vata kece e na Nomuni Teveli ni Sautu; era sa vakararamataki kece e na i serau ni Nomuni Veivakarautaki.

Isa Turaga! O ni sa lomani ira kece ga, O ni sa dau solisoli vei ira kece ga, O ni sa vakarurugi ira kece ga, ka solia na bula vei ira kece ga. O ni sa sovaraka na taledi kei na kilaka cecekia vei ira na tamata kece ga, ka ra luvuci tu e na Wasawasa ni Nomuni Loloma.

O i Kemuni na Turaga yalololomal Ni vakaduavatataki ira na mata tamata kece ga. Ni lewa mada mai na kena duavata na veimatalotu kece ga me yaco kina me duabau ga na veimatanitu, ka me okati me ra duabau ga na vei matavuvale ka me sa dua ga kina na i tikotiko e na vuravura oqo. Me ra sa bula veilomani kece ga e na vu ni veimaliwai uasivi duadua.

Isa Turaga! Ni laveta cake me cecebuya na drotini ni veivakaduavatataki ni matatamata.

Isa Turaga! Tauyavutaka mada na Veisaututaki Levu Duadua.

Ni dregata mada, O i Kemuni na Kalou, na utodra na tamata kece ga.

O i Kemuni na Tamai keimami dauloloma, na Kalou! Ni vakamarautaka mada na utoi keimami e na i boi taleitaki ni Nomuni loloma. Ni vakararamataka na matai keimami e na i Serau ni Nomuni Dauveituberi. Vakamarautaka na daligai keimami e na rorogo ni Nomuni vosa, ka vakarurugi keimami kece e na Baivatu ni Nomuni Dauveitaqomaki.

Sa i Kemuni na iGu Cecekia kei na kaukauwa, sa i Kemuni na Dauveivosoti ka sa i Kemuni Duabau ga na dau rai sivita na nodra malumalumu na tamata kece ga.

-`Abdu'l-Bahá
-----------------------

