MATAKA (#6959)

Au a duri cake e na mataka e daidai e na Nomuni loloma, O i Kemuni na noqu Kalou, ka u a biuta na noqu vale e na noqu vakabauti Kemuni e na vu ni yaloqu taucoko, ka soli au tu ki na Nomuni veitaqomaki. Mo ni solia sobu, mada mai, vei au, mai na lomalagi ni Nomuni yalololoma, e dua na i votavota ni veivakalougatataki sa mai vei Kemuni, ka vukei au me u na lesu tale ki vale e na bula vinaka me vaka ga na Nomuni a tuberi au yani e na Nomuni veimaroroi ka sa dei tu ga kina na vakanananu ni lomaqu vei Kemuni.

Sa sega tale ni dua na Kalou Oi Kemuni ga, na Duabau, O Koya e Sega ni Vakatautauvatataki rawa, na Vu ni Kilaka, na Vu ni Vuku.

-Bahá'u'lláh
-----------------------

MATAKA (#6960)

Au sa yadra cake mai na loma ni Nomuni veivakarurugi, O i Kemuni na noqu Kalou, ia sa yaco mada vaka kina ki vua sa vakasaqara nai vakaruru ko ya me sa tiko ga e loma ni i Tikotiko Tabu ni Nomuni veimaroroi kei na Baivatu ni Nomuni veitaqomaki. Ni serauna na yaloqu e loma, O i Kemuni na noqu Turaga, e na serau lagilagi e na i vurevure ni matanisiga vakayalo ni Nomuni Veivakaraitaki, me vaka ga na Nomuni a dau serauna tu na vei tiki ni yagoqu e tautuba e na i serau ni cila ni siga ni Nomuni loloma.

-Bahá'u'lláh
-----------------------

MATAKA (#6961)

Noqu Kalou ka noqu i Vakavuvuli! O i au na Nomuni tamata ka u luve ni Nomuni tamata. Au sa qai duri cake mai oqo e na noqu i davodavo e na kida ni mataka ni sa vakaraitaki tu mai oqo na i Vola Siga ni Nomuni Duavata e na vuku ni kaukauwa ni Tovure ni Siga ni Nomuni lewa, ka sa qai cila yani oqo e na kena i serau e na dela i vuravura raraba me vaka ga e sa yalataki oti tu e na i Vola ni Nomuni Lewa.

Noqu Kalou, keimami sa vakacaucautaki Kemuni, ni keimami sa qai yadra mai e na matalau ni rarama ni Nomuni kilaka. Ni solia sobu mai vei keimami, na noqu Kalou, na ka e na rawa kina vei keimami me vagolei keimami tiko ga kina kivei Kemuni, ka me vagalalataki vei keimami na ka kece keimami vauci tu kina ka vakavo ga O i Kemuni na Kalou. Ni vola tiko ga mai vei au kei ira na noqu i tokani lomani, ka vaka tale ga kina o ira na wekaqu, na tagane kei na yalewa na vinaka ni vuravura oqo kei na vuravura sa bera mai. Ni maroroi keimami vakavinaka, e na kaukauwa ni Nomuni veitaqomaki, O i Kemuni sa taleitaki vei ira na ibulibuli kece ga ka Gagadre voli ni vuravura kei lomalagi, mai vei ira O ni sa vakavuna me vakaraitaki mai kina na Dauvakasolokakana Yalo Velavela, o koya e vakasolokakana tiko e na kedra maliwa na tamata. O ni sa kaukauwa Mo ni vakayacora na ka e marautaka na Yalomuni. Sa i Kemuni ga na Vu ni iGu Cecekia, na Dauveivukei e na Gauna ni Leqa, ka Bula Vakataki Koya ga.

Ni vakalougatataki ira, Turaga na noqu Kalou, o Koya O ni sa solia vua na Nomuni Yacabuli cecere duadua, kei Koya O ni sa wasea tani mai vei ira sa sega ni kilai Kemuni, ka mai vukei keimami mada me keimami vakayacora na veika O ni marautaka ka gadreva. Mo ni vakalougatataki ira tale ga, vaka kina, O i Kemuni na noqu Kalou, na Nomuni Gusunivosa kei na Nomuni Matanivola, kei ira era sa vakanamata tiko yani vei Kemuni,kei ira era sa tavuki oti tu yani vei Kemuni, ka vakarorogo ki na Nomuni Kaci.

O i Kemuni, dina, na Turaga kei na Tui ni matatamata kece ga, ka kaukauwa vei ira na ka kece ga.

-Bahá'u'lláh
-----------------------

