Isumakkeerfiginninneq (#9960)

Guutiga tassaavutit Atikkut napparsimasunik Ajorunnaarsitsisartoq, sanngiitsunik Sanngisuunngortitsisartoq, imerusuttunik Imeruersitsisartoq, artornartorsiuteqartunik Eqqissisitsisartoq, tammartunik Nanisisitsisartoq, nikagisaasutut misigisunik Piginnaaneqalersitsisartoq, piitsunik Peqalersitsisartoq, ilisimaatsunik Ilisimasunngortitsisartoq, poqiitsunik Poqersunngortitsisartoq, aliasuttunik nuannaalersitsisartoq, qiiasunik uunnatsitsisartoq, nanertugaasunik akitsisitsisartoq. Guutiga Illit Tassaavutit atikkut uumaatsunik Uumassuseqalersitsisoq, qilak siaarpoq nunalu pinngorpoq, nuiarsuit takkussulerput sialullu nunamut toralerpoq. Tamakku tamarmik uppernarsaataapput Illit saamasuugavit suullu tamarmik Pinngortitsisigimmatsit.

-Bahá'u'lláh
-----------------------

Isumakkeerfiginninneq (#9961)

Isigaarma, Naalagara-aa, kiinara tukkussutsivit qilaata tungaanut tunissutivillu imaanut saatissimagiga, sunit tamanit avinngarusimallunga, taamaallaat Ilinnit pinnanga. Qinnuigaakkit Seqinikkut Sinaimit Saqqummersitakkut, Saammaassutsivillu Qilammi ulloriaata qinngorneranit uisorilalluartumit Illit atikkut killingusaamit saqqarsimasukkut, Soraajuitsumik Isumakkeerfiginnittoq, ajortunit qimagaatinnga, nallittunngalu. Taamaammat naalannassutsivit allaataanik uannut allaguk manna, Illit Atikkut pinngortitap silarsuaani uannut ataqqinarsisitsisussaq. Ikiunnga, Naalagara-aa, Ilinnut saaqqullunga, nipinillu Illit asasannit pisunit naalaaqqullunga, asasannit taakkunannga nunarsuarmi pissaanernit sanngiillisitaanngitsunit, naalagaaffiillu naalagaanerisa Ilinnik avissaartissinnaanngisaannit, aammalu Ilinnik naapitsiartornerminni oqartunit: ”Guuti tassa uagut Naalagarput, qilammiittunut tamanut, nunarsuarmiittunullu tamanut Naalagaasoq.”

-Bahá'u'lláh
-----------------------

Isumakkeerfiginninneq (#9962)

Unnersiutigisaagit Illit, Naalagaq Guutiga-aa! Sapiiserlunga Ilinnik oqaluuseqarnialernikka tamaasa ajortersuannit Illillu piumasannik qaangiisimaninnit imaannaanngitsunit tunuarsimaartitaalersarpunga, Illillu saammaanninnit peersitaasimalluinnartutut imminut isigilersarlunga aammalu Illit nersorneqaatissannik unnersiutiginninnissamut sapilerluinnarsimasarlunga. Saammaanninnulli tatigisaqarnerma itisuup Ilinnit neriuutiga utertittarpaa, uannullu tukkortumik pissuseqarnissannik qularunnaarnerma sapiissuseqalersittarpaanga Illit ataqqiniassallutit qinnuigalutillu Illit pigisannik. 

Qinnuigaakkit, Guutiga-aa, Nallittuissutsikkut pinngortitaasutigut tamarmik inugaannik, sutigullu tamatigut Illit ativit imakivisinneqarsimasutigut, nalunaajarpara, ilaginnaannaqinanga, tassami uummamma ajortoq kajungerfigisarmagu. Serniginngali Sernissuinerpit pallittaalisaani ittuinnaqqullunga, isumassuinerpillu oqquiffiani iluartumeeqqullunga. Uanga taannaavunga, Guutiga-aa, ataasiinnarmik kissaatigisaqartoq, sumik Illit pissaanerpit nakuussusiatigut aalajangersimasannik. Suut uannut qinersimasakka tamarmik, tassaapput Illit saammaassuininni aalajangersimasatit aqqutigalugit ikiorneqarnissara, Illit piumasavit inatsineri, Illit inatsisivit nalunaaqqutaannit ikorfartugaanissara aammalu Illit eqqartuussutit. 

Qinnuigaakkit, Illit-aa, tassaasutit uummatinut Ilinnut kajungertunut Asasaq, Illit Siunertavit Saqqummerneri Illillu isumassarsisitsinerpit Ullaakkut-Qaammalerfiini aammalu Illit Angissutsivit Illillu ilisimassutsivit Erlinnartuusiviinik Nassuiaasutigut, Illit inigisannit illernartumit, Illit erfalasunnit, Illillu illernassutsinnit nigorsimateqinanga. Ikiunnga, Naalagara-aa, Taassuma Illernassusiata inaa, Taassuma taattuanik qanittuaniinnissaq, Taassumalu matuata silataani maniguulluni qeqarnissaq angoqqullugu. 

Illit Taannaavutit, pissaanera isoqanngitsumit isoqanngitsumut siaruartoq. Illit ilisimassutsit kimilluunniit nigorneqanngilaq. Illit ilumut taannaavutit pissaanerup Guutia, ataqqisaanerup ilisimassutsillu Guutiat.

Unnersiutigisaali Guuti, silarsuit Naalagaat!

-Bahá'u'lláh
-----------------------

Isumakkeerfiginninneq (#9963)

Aqqit unnersiutigisaali, Guutiga-aa suut tamarmik Guutiat, Naalannassutaatiga suut tamarmik Naalannassutaataat, Pilerigisara suut tamarmik Pilerigisaat, Nakuussutiga suut tamarmik Nakuussutaat, Kunngera suut tamarmik Kunngiat, Piginnitsera sunik tamanik Piginnittoq, Anguniagara suut tamarmik Anguniagaat, Aallartitaqaasitsisiga sunik tamanik Aallartitaqaasitsisoq! Nallittuinerpit saamasup imavianit, qinnuigaakkit, nigorsimateqinanga imaluunniit qanissutsivit sineriaanit avinngarusimateqinanga. 

Allamik Illiunngitsumik, Naalagara-aa, uannik iluaqusiisoqarneq ajorpoq allamillu Illiunngitsumik qanillattuineq uannut ikiorsiutaanngilaq. Torlorfigaakkit Pisuussutsivit pissaqangaarnerisigut, taakkunuunatigut allanik tamanik taamaallaalli Ilinnik pisariaarutitsisutit, naatsorsuutigeqqullunga kiinnannik Ilinnut saassimasunut Illillu kiffartuukkumallutit aallarsimasunut. 

Taamaattumik, Naalagara-aa, kiffatit angutit arnallu isumakkeerfigikkit. Ilumut Illit taannaavutit Soraajuitsumik Isumakkeerfiginnittoq, taanna Tamanit Misiginneqataanerpaasoq.

-Bahá'u'lláh
-----------------------

Isumakkeerfiginninneq (#7015)

Uanga taannaavunga, Naalagara-aa, kiinnaminik Ilinnut saattoq, neriuumminillu Illit saammaassutsinni tupinnartulianut Tukkussutsivillu saqqummernerinut ivertitsisoq. Qinnuigaakkit pakatsisimallunga saammaassutsivit matuata silataanit qimagutseqqunanga imaluunniit pinngortitavit Illit Siunertannik tunutsisimasut akornannut ajattoqqunanga. Tassaavunga, Guutiga-aa, Illit kiffat, Illillu kiffavit ernera. Illit sallusuissutsit Illit nalinni pisoq miserratigisimanngilara, allornikkalu Illit ataasiussutsivit sineriaanut saatissimavakka, Illit immikkut issutsinnut angerpunga, Illit ilivitsuussutsit akuersaarpara neriuutigalugu Illit isumakkeerfiginninnerit ajortinillu isumakkeerinerit. Illit qanorluunniit iliornissamut pissaaneqarputit; allamik Guuteqanngilaq Illit peqartinnak, Naalannarnerpaaq, Soraajuitsumik Isumakkeerfiginnittoq.

-Bahá'u'lláh
-----------------------

Isumakkeerfiginninneq (#7016)

Illernarsisitaagit Illit, Naalagaq Guutiga-aa! Qinikkakkut tatigisakkullu Taassumuunalu Siumut Isigisuit Nalunaarutinnilu aatsisuit Naqitsisaatigut qinnuigakkit, Illit eqqaaneqarnerit ingerlatsisorissagiga, Kiinnat anguniagarissagiga, Aqqillu qaammaqqutigissagiga, Kissaatillu pilerisarissagiga, Iluarinninnerillu nuannaarsaatigissagiga.
Ajortuliortuuvunga, Naalagara-aa, Illillu soraajuitsumik Isumakkeerfiginnittuuvutit! Ilisarigakkilli miserratigiunnaarniariarlutit tuaviulerpunga isumaginninnerpit asannittup najugaa qutsissoq angujumallugu. Isumakkeerfiginnga, Naalagara-aa, ajortuliamma, Nuannaarnerpit aqqutaani ingerlaarsinnaanissannut assersimammanga Ataasiussutsivillu imaata sissaanut tikiunnaveersillunga.
Allamik peqanngilaq, Naalagara-aa, uannut saammaannermik iliorsinnaasumik, kiinnama saaffigisinnaasaanik, allamillu peqanngilaq uannik nalliginnissinnaasumik, nallittuinissamut qinnuteqarnissannik pilersitsisumik. Ajattoqinanga, taanna pillugu qinnuigakkit Illit saammaannerpit najuunneranit uannillu tunuarsimateqinagit Illit pisuussutivit tukkussutsivillu sarfaat. Uannut aalajangeruk, Naalagara-aa, Illit asasinnut aalajangersimasat, uannullu allakkit Illit toqqakkannut allassimasatit. Isiginera tamatigut Illit saammaallutit isumassuinerpit killingusaanut nakkussiuarsimavoq, isikkalu saamallutit nallittuissutsivit inaanut nakkussiuarsimallutik. Qanoq iliorfiginnga Illit iluarisat malillugu. Allamik Guuteqanngilaq Illit peqartinnak, pissaanerup Guutia, naalannssutsip Guutia, ikiuinissaa tamarmik torlorfigisaat.

-Bahá'u'lláh
-----------------------

Isumakkeerfiginninneq (#9964)

Guuti-aa Naalagarput! Saammaannikkut illersortigut tamanut Ilinnut akerliusunut, tunitigullu Ilinnut iluarinartunik. Annerusumik Tukkussutsinnit tunisigut pilluaqqullutalu. Qanoq iliuuserisimasavut pillugit isumakkeerfigitigut ajortivullu uatsinnit eqqiakkit, saammaannikkullu isumakkeerutinik isumakkeerfigitigut. Ilumoortumik, Illit tassaavutit Tamanit Ataqqinarnerpaaq, taanna Imminut-Napatittoq. Asannillutit isumaginnittuussutsivit qilammi nunamilu pinngortitat tamaasa poorpai, Isumakkeerfiginninnerpillu pinngortitaq tamaat qaangerpaa. Naalagaaffik Illit pigaat; Illit assanniipput Pinngortitap Saqqummersitallu naalagaaffii; Illit talerpinni pinngortitat tamaasa tigummivatit, tigummisannilu ippoq isumakkeerfiginninnerup ilaa uuttortagaq tunniussaasoq. Illit isumakkeerfigisarpat kinaluunniit kiffavit akornanniittoq Ilinnik iluarinnittoq. Ilumut, Illit tassaavutit Soraajuitsumik Isumakkeerfiginnittoq, taanna Tamanik-Asannittoq. Sumilluunniit peqanngilaq Illit ilisimassutsinnit pinngitsumik, sumillu peqanngilaq Ilinnut toqqortamik. Guuti-aa Naalagarput! Pissaanerpit nakuussusiagut illersortigut, qanortoq immavit tupinnartumik qaputtup ilanngutillisigut tunitigullu Ilinnut Iluarinartunik. 
Illit tassaavutit Naalagaq Qullerpaaq, Pinngortitsisorsuaq, taanna Ataqqinarsisitaasoq, taanna Tamanik-Asannittoq.

-The Báb
-----------------------

Isumakkeerfiginninneq (#9965)

Unnersiutigisaagit Illit, Naalagaq-aa. Ajortuliavut isumakkeerfigikkit, nalligitigut Ilinnullu saateqqitsigut. Allamut Illiunngitsumut tatiginnileqinata, tukkussutsikkullu tunitigut Illit asasannik, kissaatinnik Ilinnullu iluarinartunik. Inuit ilumoortumik Ilinnut upperinnilersimasut killiffiat qaffaguk, saammaassutsivillu isumakkeerfiginninneragut isumakkeerfigikkit. Ilumut, Illit tassaavutit Ajornartorsiorfimmi Ikiorti, Imminut-Atatittoq.

-The Báb
-----------------------

Isumakkeerfiginninneq (#9966)

Qinnuigaakkit isumakkeerfigeqqullunga, Naalagara-aa, oqalunnermut sumulluunniit taamaallaat Ilinnik oqaluuseqarneq pinnagu, unnersiutiginninnermut sumulluunniit taamaallaat Ilinnik unnersiutiginninneq pinnagu, tipaatsuummut sumulluunniit taamaallaat Illit qaninnerit pillugu tipaatsunneq pinnagu, nuannaarnermut sumulluunniit taamaallaat Ilinnik attaveqarnermik nuannaaruteqarneq pinnagu, pilluarnermut sumulluunniit taamaallaat Illit asanninninnik pilluaateqarneq pinnagu, Illit nuannaarnerit, suullu tamaasa uannut tunngasut Ilinnut attuumassuteqanngitsut pillugit, Illit-aa Naalakkat Naalagaat, taanna atortussanik aggiussisoq matunillu paarnaarsimasunik ammaasoq.

-The Báb
-----------------------

Isumakkeerfiginninneq (#9967)

Ataqqinarsisitaagit Illit, Guuti-aa, Qanoq ilillunga Illit oqaluuserissavakkit Illit illernarsisitaasimaguit inuiassuit tamarmik unnersiutiginninnerat qaangerlugu. Aqqit illernarsisitaali, Guuti-aa, Illit tassaavutit Kunngi, Ilumoortoq Soraajuitsoq, Illit nalunngilat qilanni nunamilu soqarnersoq, Ilinnullu tamarmik utertariaqarput. Illit atoqqullugu Saqqummernerit nunamiorpalunngitsoq nassiussimavat uuttuut ersarissoq naapertorlugu. Unnersiutigisaagit Illit, Naalagaq-aa! Illit peqqusinikkut kinaluunniit piumasat malillugu, ajugaasunngortippat qilaap nunallu katersaarsui suullu taakkua akorniniittut ikiortigalugit. Illit tassaavutit Naalagaasoq, Ilumoortoq Soraajuitsoq, Naalagaq ajugaaffigisassaanngitsumik pissaanilik. 


Illernarsisitaavutit Illit, Naalagaq-aa, Illit kiffatit ajortiminnik isumakkeerfigeqqullutik qinusut piffissat tamaasa isumakkeerfigisarpatit. Ajortikka eqqiakkit, ajortillu qaammalernerani Illit isumakkeerutinnik ujarlersuniittut, ulluunerani Ilinnut qinusuniittut, unnulerneranilu taamaallaat Guutimik kipisasuniittut, tamanik Guutimit saammaannikkut tunniussaasunik pilliuteqartut, ullaarulernerani unnulerneranilu Ilinnik unnersiutiginnillutik nalliussisuni, pisussaaffimminnillu qimatsinngitsuni.

-The Báb
-----------------------

Isumakkeerfiginninneq (#9968)

Isumakkeerfiginninnissat qinnutigaara, Guutiga-aa, isumakkiigaanerlu qinnutigalugu taamatut kiffavit Ilinnut saaffiginninnissaannik kissaatiginninnerit Malillugu. 
Qinnuigaakkit naalagaaffiginninnerit naapertorlugu ajortigut errorlugit peeqqullugit, aammalu uanga isumakkeerfigeqqullunga, angajoqqaakka aammattaaq taakku misiliinerni asanninnerpit najugaanut isersimasut angingaassusernut akitsisitaangaarsusernullu naleqqulluartumik, pissaanerpillu qilammiorpaluttup ileqqussaalluarneranut tulluuttumut. 
Guutiga-aa! Tarniga qiimmannartumik isumassarsitissimavat qinunera Ilinnut pilliutigitillugu, Illeqanngikkaluarpammi qaaqqujunnanngikkaluarpakkit.


Unnersiutigineqarit naalannarsineqarlutillu: Illit unnersiutigaakkit uannut saqqummersissimagavit, qinnuigalutillu isumakkeerfigeqqullunga Ilinnik ilisarinninnissannut pisussaaffinni patajalersimagama asanninnerpillu aqqusinnersimanerani pisunnissannut iluatsitsinngitsoorsimagama.

-The Báb
-----------------------

Isumakkeerfiginninneq (#9969)

Illit Ajugaqanngitsutit! Ajortiliuvunga isumakkeerfigaarmali. Amigaateqaqaanga naakkinnittuuvutilli! Kukkunerit taarneranniippunga Illilli isumakkeerfiginninnerup qaamarnganiipputit! 

Guuti-aa ajunngitsutit! Taamaattumik ajortikka isumakkeerfigikkit, kukkunikka alakkit qimaaffissannillu tuninnga, ilalaarnerpillu aallaavianut inissinnga nappaatikkalu katsortillugit. 

Salinnga naalannartinngalu. Naalannarsutsivit siaruarternerani pissaqartinnga, aliasuut naakkinarsuserlu peeqqullugit, nuannaarneq pilluarnerlu inissillit, nanertisimaneq neriuutaarunnerlu nuannaarnermut tatiginninnermullu allanngorlit, sapiissuserlu ersinerup inaanut pili. 

Ilumut Illit isumakkeerfiginnittuuvutit, Nallittuisoq, Illit tassaavutit Tukkusooq, Asasaq!

-`Abdu'l-Bahá
-----------------------

Isumakkeerfiginninneq (#9970)

Naalagara, Illit-aa Inuit neriuutaat! Tassaavutit kiffannut makkununnga tamanut Illersuisoq. Isertukkat paasissaanngitsullu Ilisimavatit. Tamatta ajortuliortuuvugut, ajortuliortunullu tassaavutit Illersuisoq. Naakkinnittoq, Sallaatsoq. Naalagara! Amigassutsigut isiginagit. Saammaassinerit tukkussutsillu malillugit pisigut. Amigassutsigut amerlaqaat, kisianni Saammaassinerpit imarsua nateqanngilaq. Taamaammat qularunnaarsillutalu nakussatsitsigut. Ikiortigut Isaariarpit saavani akuerinartunngoqqulluta. Uummatit qaammarsakkit, isit isigisinnaanngortikkit, siutit naalaarsinnaanngoqqukkit, toqungasut uummarsakkit, napparsimasullu uummarissarlugit. Piitsut pisuunngortikkit qimaasullu tatiginnittunngortillugit. Naalagaaffinni tikilluaqqusigut. Inussiarnissutsip qaamarnganik qaammarsartigut. Tassaavutit Isumassuingaartoq! Tassaavutit Sallaatsoq! Tassaavutit Ikinngutinnersoq!

-`Abdu'l-Bahá
-----------------------

