Ataatsimiinnerit (#12579)

Unnersiutigisaagit Illit, Naalagaq Guutiga-aa! Saammaassuinerpit anoraasigut anoraasuasukkut Siunertavillu Ullaanngulerneragut isumassarsisitsinerpillu Qaalerfiisigut qinnuigaakkit, uannut tamanullu Illit kiinnannik ujarlersunut nassiuteqqullugit, Illit isumassuingaarninnut tukkullutillu saammassuininnut ileqqussaasut Illit iluarisannut Illillu tunissutinnut naleqquttut. Piitsuuvunga kiserliorlungalu, Naalagara-aa! Pisuussutivit imaanut kivisinnga; imerusuttunga, isumassuinerpit asannittup ermanit uumasumik imerlanga. 

Torlorfigaakkit Illit namminiussutsikkut Tassuunalu Illit qanoq ittuuninnik Saqqummersitakkut Illillu Oqaatsikkut ersersitsisukkut tamanut qilammiittunut nunamiittunullu, kiffatit saammassutsivit isumaginninnerata orpiata alanngortaanut katersuuteqqullugit. Ikiukkit inerittuinik pissarseqataanissaannut, siutaat pilutaasa aalarpalunnerinut Timmissamilu avalequtaanut mitsimalluni qarlortumit nipimik sallaatsumik tusartikkit. Ilumoortumimmi Ajornartorsiulerfimmi Ikiortaavutit, taanna Pallissaanngitsoq, Pissaaneqarnerpaaq, taanna Tukkornerpaaq.

-Bahá'u'lláh
-----------------------

Ataatsimiinnerit (#12572)

Illit-aa Guuti nallittuisoq! Illit-aa pissaaneqarlutillu nakuusutit! Illit-aa Ataataq tamanit asanninnerpaaq! Kiffatit uku katersuussimapput Ilinnullu saallutik, qinnuigaatsigit Alloriusavit saani, qularuteqannginnerpit saammaassuinerpillu tunissutai killeqanngitsut kissaatigalugit. Allamik siunertaqanngillat taamaallaat Illit iluarinninnerit. Allamik siunertaqanngillat taamaallaat inuiassuit silarsuaanni kiffartuussinissartik. Guuti-aa! Katersuussimasut uku ajunnginnerulersikkit. Uummatit nallittuisunngortikkit. Anersaap Iluartup saammaannikkut tunniussaanik tunikkit. Pissaanermik qilammit pisumik sakkussalikkit. Isumaliutinik qilammiorpaluttunik pilluaqqukkit. Peqqusersuinneri allisakkit nikanartillutik peqqissimillutillu Illit naalagaaffinnut saanniassammata inuiassuillu silarsuaanni kiffartuussinissamut tunniusimallutik. Tamarmik immikkut ataasiakkaarlutik ajunngitsunngorlik. Tamarmik immikkut ataasiakkaarlutik ullorianngorlik uisorilalluartut. Tamarmik immikkut ataasiakkaarlutik Guutip naalagaaffiani qalipaatigissaarlutik kusanartunngorlik tipigissumillu naamajuminarlutik. 

Ataataq ajunngitsoq-aa! Pilluaqqussutitit tunniutikkit. Amigaativut isigeqinagit. Illersuinerpit ataanut oqqiffilertigut. Ajortuliavut eqqaaqinagit. Nallittuissutsinnik katsorsartigut. Sanngiitsuuvugut, Illit sanngisuuvutit. Piitsuuvugut, Illit pisuujuvutit. Napparsimavugut, Illit katsorsaasuuvutit. Ajorsaateqartuuvugut, Illit tukkornerpaavutit.

Guuti-aa! Isumassuininnik pilluaqqutigut. Illit tassaavutit Pissaaneqarluartoq. Illit tassaavutit Tunisisoq. Illit tassaavutit Ajunngitsuliortoq.

-`Abdu'l-Bahá
-----------------------

Ataatsimiinnerit (#12573)

Illit-aa Naalagaq ajunngitsoq! Uku tassa kiffatit, ataatsimiinnermut matumunnga katersuuttut, Illit naalagaaffinnut saassimasut Illillu tunissutinnut pilluaqqussutinnullu pisariaqartitsipput. Illit-aa Guutiusutit! Ataasiussutsit inuunerup piviussusiini tamani allassimasoq saqqummersiguk nalunaaqqutitillu qulaarlugit. Piginnaassutsit inuttut inuunerup piviussusiini ittut pisinnaalersillugillu toqqorsimasatit qulaajakkit nittarterlugillu. 

Guuti-aa! Assigivagut naasut, saammaannerpillu assigaa sialuk, naasut tamakku naggorissakkit naalersillugillu Illit saammaassutsikkut tunissutinnit. Uagut tassaavugut Illit kiffatit, nunami inuunerup pituutaanit qilerussaartigut. Ilisimasaqanngilagut, ilisimmalersitsigut. Toqungavugut, uummartitsigut. Nunap piinut qanippugut, anersaalertigut. Amigaateqaqaagut, tupinnartulianik paasinnittunngortitsigut. Ajunaarsimavugut, pissaqartitsigut erlinnartuusivinnillu imaajuitsumit pilluaqqulluta. Guuti-aa! Uummarteqqitsigut, takunnissinnaalersitsigut, tusaasinnaalersitsigut, inuunerup tupinnartuinik ilisimasaqalersitsigut, Illit naalagaaffippit isertortui uagutsinnut maani inuusunut saqqummerniassammata, ataasiussutsillu miserratigiunnaassagatsigu. Tunissut sunaluunniit Ilinnit pivoq, pilluaqqussut sunaluunniit Illit pilluaqqusinerivat.

Pissaneqaqaatit! Nakooqaatit. Illit tassa Tunisisoq, Soraajuitsumillu Tukkortuuvutit.

-`Abdu'l-Bahá
-----------------------

Ataatsimiinnerit (#12574)

Guutiga-aa! Guutiga-aa! Ilumut uku kiffatit Ilinnut saapput nallittuinerpillu naalagaffia torlorfigalugu. Ilumoortumik Illit illernassutsinnut kajungerput Illillu asanninnerpit inneranik ikissimallutik, ujartorpaallu naalagaaffippit tupinnartup uppernarsaatissaa neriuutigalugu Illit naalagaaffinnut qilammiittumut ilanngutitaanissartik. Ilumoortumik qilanaaraat Tunissutivit ammukarnissaat, kissaatigaallu Piviussutsip Seqernata qaammarsassagaatik. Naalagaq-aa! Tassaalersikkit qaammaqqutit qaammarissut, nalunaaqqutit nallittuisut, orpiit inerittoqarluartartut ullorissallu uisorilalluartut. Qanortoq Ilinnut kiffartornerminni siumukarluarlik, Ilinnullu atalerlik asanninnerpit peqatigiiffippillu qilerutaasigut qaammaqqutit, Illit iluarinninninnut qilanaaruteqartut. Naalagaq-aa! Siulersuinermut nalunaaqqutaalersikkit, Illit naalagaafflnnut nungujuitsumut assissanngortikkit, nallittuissutsivit imaani malinngortikkit, kunngisut pissaaneqarnerpit qaamaneranut tarrarsuutinngortikkit. Ilumoortumik Illit tassaavutit Tukkortoq. Ilumoortumik Illit tassaavutit Nallittuisoq, ilumoortumik Illit tassaavutit Erlinnartoq taanna Asasaq.

-`Abdu'l-Bahá
-----------------------

