Aalajaassuseq (#7020)

Guuti-aa, Guutiga! Peqqissimillunga Ilinnut saassimavunga, ilumullu Illit tassaavutit Isumakkeerisoq, Misiginneqataasoq. 
Guuti-aa, Guutiga! Ilinnut uteqqissimavunga, ilumullu Illit tassaavutit Isumakkeeriuartoq, Saammaassisoq.
Guuti-aa, Guutiga! Tukkussutsivit allunaasaanut najummatsersimavunga, Ilinniipporlu qilammi nunamilu suut tamarmik toqqorsiviat. 
Guuti-aa, Guutiga! Illit tunginnut tuaviorsimavunga, ilumullu Illit tassaavutit Isumakkeerisoq, saammaassingaarnerup Naalagaa.
Guuti-aa, Guutiga! Saammaassinerpit isseranut qilammiorpaluttumut qilalerpunga, ilumullu Illit tassaavutit Tunisisoq, Tukkusooq, Saammaassisoq, Ajugaqanngitsoq.
Guuti-aa, Guutiga! Nalunaajaatigaara Illit Siunertat saqqummersissimagit, Neriorsuutit eqquutsissimagit, Saammaannerpillu qilaanit aqqartissimagit qinikkavit uummataannik Ilinnut kajungilersitsisoq. Illit allunaasannut aalajaatsumut tigumminnilluarsimasoq, Illillu uleruarpit qaallorissup mersorneranut najummatsersimasoq pilluarpoq! 
Qinnuigaakkit, Illit-aa pinngortitap suulluunniit Naalagaa, ersitsup ersinngitsullu Kunngia, Pissaanerit, Ataqqinassutsit, Naalagaassutsillu pillugu, atera Allaativit naalannartup allaataanik Ilinnut tunniussimasut akornannut allassimaqqullugu, taakku ajortillit allagaasa Kiinnavit qaammarissup tungaanut tunutsissimanngisaasa akornannut, Guuti-aa qinusumut tusaasutit qinusumillu akisutit!

-Bahá'u'lláh
-----------------------

Aalajaassuseq (#7021)

Naalagara, Guutiga! Asasatit ikiukkit Illit Upperisanni qularunnaartillugit, Siunertarisannilu aalajaatsunngortillugit. Saammaassinermik tunikkit piumatussutsip imminerullu saassussineranik akiuisinnaaqqullugit, Siulersuinerullu Illernangaartup qaamanera malissinnaallugu. Illit tassaavutit pissaanilik, Saammaassisoq, Imminut napatittoq, Tunisisoq, Tukkusooq, Ajugaqanngitsoq, Sukkulluunniit tunisiuartoq.

-`Abdu'l-Bahá
-----------------------

