Hardships (#13428)

Ang mga hiyas ug kinaiyahan kalabot sa Diyos dayag ug tataw, ug sila gihisgotan ug gihulagway diha sa tanang langitnong Basahon. Ang uban kanila mao ang pagkakasaligan, pagkamatinud-anon, pagkaputli-og-kasingkasing sa pakigsulti sa Diyos, pagkamapailubon, pagsunod sa gimando sa Labawng Makagagahom, pagkatagbaw niadtong gimbut-an sa Iyang Kabubut-on, pagpailob, ug dili lamang kana, ang pagpasalamat taliwala sa kalisdanan, ug ang bug-os nga pagsalig, sa tanang kahimtang, diha Kaniya. Kini sila, sumala sa pagtan-aw sa Diyos, uban sa labing hataas ug labing dalayegon nga mga buhat.

-Bahá'u'lláh
-----------------------

Hardships (#13429)

Ikaw mao Siya nga mopuli pinaagi sa Iyang kabubut-on sa kaulawanan ngadto sa himaya, sa kahuyang ngadto sa kusog, sa pagkawalaygahom ngadto sa gahom, sa kahadlok ngadto sa kalinaw, ug sa pagduhaduha ngadto sa kasigurohan.

-Bahá'u'lláh
-----------------------

Hardships (#13430)

Dili kini mga adlaw sa kauswagan ug kadaogan. Ang tanang katawhan nalikosan sa mga nakalainlaing sakit. Busa, paningkamot nga maluwas ang iyang kinabuhi pinaagi sa makaalim nga tambal nga giandam sa labing gamhanang kamot sa walay kasaypanang Mananambal.

-Bahá'u'lláh
-----------------------

Hardships (#13431)

O kamong mga minahal nga higala! Ang kalibotan anaa sa  kagubot ug ang katawhan gikapoy ug nakigbisog nga mabuhi. Ang mangitngit nga kagabhion sa kayugot mipuli, ug ang kahayag sa balaang pagtuo gipapas. Ang katawhan ug mga kaliwatan sa kalibotan mibaid sa ilang mga kuko, ug nakigbatok usa ngadto sa usa. Ang sukaranan mismo sa banay sa katawhan giguba. Libo ka libo ka mga panimalay ang walay padulngan ug walay kabtangan, ug matag tuig libo ka libo sa katawhan dugoang nagkurog diha sa abog nga awayanan…

-`Abdu'l-Bahá
-----------------------

Hardships (#13432)

Alang kaninyo, O mga hinigugma sa Diyos, lig-ona ang inyong mga lakang diha sa Iyang Kawsa, nga inubanan sa usa ka kabubut-on nga kamo dili gayod malisang bisan pa’g ang labing mangilngig nga mga katalagman ang moasdang sa kalibotan. Dili gayod, sa bisan unsang kahimtang, kamo malisang.
Pagmalig-on kamo sama sa mga hataas nga bukid, sama sa mga bituon nga misubang ibabaw sa kapunawpunawan sa kinabuhi, sama sa mga masigang lampara diha sa mga panagtigom sa kahiusahan, sama sa mga kalag nga mapailubon ug mapainubsanon atubangan sa mga kahigalaan, ug himoang putli ang inyong mga kasingkasing.

-`Abdu'l-Bahá
-----------------------

