Return   Facebook   Zip File

Obligatory

SAMBIANG OBLIGATORI NUMBAS PEMANJAI

PATUT DISEBUT TIAP HARI, PAGI, NGALIH HARI, ENGGAU LEMAI.

Sebarang sapa ti deka sambiang, uji iya masu jari, lalu lebuh ke masu jari, uji iya nyebut:

Keringka jari aku, O Petara aku, awakka ia ulih megai

Bup Nuan enggau naka ia penegap ke alai semua raban utai di dunya enda ulih ngelaban ia. Nya alai, jaga ia, ari ke ngachau utai ke ukai enggi iya empu. Nuan amat bendar, ti Pemadu tegap, ti Pemadu Bekuasa.

Lebuh masu mua iya, uji iya nyebut:

Aku udah nungaka mua aku ngadap Nuan, O Tuhan aku! Terangka ia ngena penampak rampa-mua Nuan. Nya alai, jaga ia, ari ke nguing ngagai orang bukai tang Nuan.

Udah nya uji iya bediri, lalu nunga ngadap Qiblih (Dasan ti disembah, ianya, Bahjí, ‘Akká), lalu uji iya nyebut:

Petara udah ngeletak ianya nadai Petara bukai tang Iya. Enggi Iya meh perintah Revelasyen enggau penempa. Iya, endang amat, udah ngayanka Iya ti Terebak-tawas ke Revelasyen, Iya ti berandau ba Sinai, lalu nengah Iya Bingkai-langit ti Pemadu Manah udah diasuh manchar, lalu Kayu-Buah Petara ke ba ujung jalai ke nadai kala dipansa udah bejaku, lalu nengah Iya kangau udah diterantang ngagai semua ke diau ba serega enggau ba bumi: “Peda, Iya ti Bempu Semua diatu datai. Bumi enggau serega, mulia enggau merintah enggi Petara, Tuhan ke semua mensia, lalu Iya ti Ngembuan Maligai ti di atas enggau ba dunya di baruh!”

Udah nya, uji iya meremika diri, lalu jari iya diengkah ba pala patung, lalu nyebut:

Tinggi meh Nuan ngelui ari puji aku enggau puji sebarang orang kelimpah ari aku, ari atas ading aku enggau ading semua orang ti diau di serega enggau semua ke diau dalam bumi!

Udah nya, bediri enggau jari tebuka, tapa jari ngadap ke atas nunga mua, lalu uji iya nyebut:

Anang ngelebu, O Petara aku, iya ti udah, ngena jari ti minta, bepegai teguh ba rambu penyinu Nuan enggau berekat Nuan, O Nuan ti ari Semua ti mandangka penyinu Nuan meh Ti Pemadu Sinu!

Udah nya, uji iya duduk lalu nyebut:

Aku nyadika saksi ke penyerakup Nuan enggau ke penyatu Nuan, lalu ianya Nuan meh Petara, lalu ianya nadai Petara bukai kelimpah ari Nuan. Nuan udah, amat bendar, ngayanka Pengawa Nuan, ngamatka Sempekat Nuan, lalu muka besai pintu berekat Nuan ngagai semua orang ke diau ba serega enggau ba bumi. Berekat enggau pemaik, tabi enggau mulia, datai ngagai orang ti dikerindu Nuan, sida ke nadai kena regau ubah enggau peluang ke bisi ba dunya tu nguing ngagai Nuan, lalu sida ke udah muangka semua utai sida, laban ngarapka utai ti dikemisi Nuan. Nuan meh, dalam pengamat, ti Seruran Ngampun, ti Pemadu Pemisi.

#12609
- Bahá'u'lláh

 

SAMBIANG OBLIGATORI Tl PANDAK

DISEBUT SEKALI DALAM KANDANG DUA PULUH EMPAT JAM, MAYA TENGAH HARI.

Aku nyadi saksi, O Petara aku, Nuan udah nempa aku ngambika aku nemu Nuan lalu nyembah Nuan. Aku besaksi, diatu, ke pengurang kuasa aku ngagai penegap Nuan, ke penyeranta aku ngagai pengeraja Nuan.

Nadai Petara bukai tang Nuan, Penulung lebuh Tusah, Pengibun Diri.

#12608
- Bahá'u'lláh

 

SAMBIANG OBLIGATORI Tl PANJAI

DISEBUT SEKALI DALAM KANDANG DUAPULUH EMPAT JAM.

Barang sapa ti deka nyebut sambiang tu, uji iya bediri lalu nunga ngadap Petara, lalu, lebuh iya ti bediri dia, uji iya merening ke kanan enggau ke kiba, baka ti nganti pengasih Tuhan iya, ti Pemadu Bepengasih, ti Penyinu. Udah nya uji iya nyebut:

O Nuan Tuhan ke semua nama lalu Pengaga semua

Serega! Aku minta enggau pemaruh ati ari Nuan nengah sida ti Endang Terebak-tawas Ayu Nuan ti enda dipeda, ti Pemadu Tinggi, ti Pemadu Tampak, awakka sambiang aku nyadi api ti nunu tirai ti udah nutup aku ari pemajik Nuan, lalu nyadi panchar ti ngiring aku ngagai tasik Penatai Nuan.

Udah nya uji iya ngangkat jari iya minta ngadap Petara berekat sereta tinggi meh Iya - lalu nyebut:

O Nuan ti Dikingin dunya sereta ti Dikerindu semua menua! Nuan meda aku nunga ngadap Nuan, Ialu nadai ditanggam sebarang orang bukai kelimpah ari Nuan, lalu bepegai ba rambu Nuan, ti endur riak Iya semua utai tempa udah begetar. Aku tu pengasuh Nuan, O Tuhan aku, sereta anak pengasuh Nuan. Peda aku bediri sedia deka ngereja peneka Nuan enggau pengingin Nuan, minta nadai utai bukai kelimpah ari penyamai peneka Nuan. Aku bebendar minta Nuan ari Tasik pengasih Nuan sereta ari Bintang- Siang berekat Nuan ngintu pengasuh Nuan nitih ke peneka enggau pengelantang Nuan. Ngena penegap Nuan ti jauh ngelui ari semua tela enggau puji! Sebarang utai ti dipegari Nuan endang buah ati aku lalu dikerinduka semengat aku. O Petara, Petara aku! Anang meda pengandal aku enggau kereja aku, tang semina peda peneka Nuan ti udah nyerangkap semua serega enggau dunya. Ngena Nama Nuan ti Pemadu Tebangkar, O Nuan Tuhan ke semua menua! Aku semina ingin ke utai ti dikingin Nuan, lalu semina rindu ke utai ti dikerindu Nuan.

Udah nya uji iya nyerugang, lalu kening iya meremi ngagai lantai (tanah), lalu nyebut:

Tinggi meh Nuan ngelui ari ading semua orang bukai kelimpah ari Nuan Empu, lalu ari pemereti utai bukai kelimpah ari Nuan.

Udah nya uji iya bediri lalu nyebut:

Gaga sambiang aku, O Tuhan aku, nyadika panchur ai pengidup ke alai aku tau idup meruan seagi agi Perintah Nuan bisi, lalu tau nyebut Nuan di tiap- tiap dunya ba semua dunya Nuan.

Udah nya uji iya sekali agi nengkadahka jari iya minta, lalu nyebut:

O Nuan ke alai lebuh beserara ari Nuan udah ngasuh ati enggau semengat anchur, lalu nengah api pengerindu Nuan selampur dunya udah ditungkun! Aku bebendar minta ari Nuan ngena Nama Nuan ke alai Nuan udah ngalahka semua utai tempa, anang matak ari aku utai ti bisi ba Nuan, O Nuan ti nguasa semua mensia! Nuan meda O Tuhan aku, temuai tu berumban ngagai rumah iya ti tinggi di baruh kanopi pegai- perintah Nuan sereta didalam kandang pengasih Nuan; lalu pengelanggar tu ngiga tasik pengampun Nuan; lalu siku ti baruh tu ngiga balai penampak Nuan; lalu utai tempa ti seranta tu ngiga dijir pengaya Nuan. Nuan meh bekuasa merintah sebarang utai ti dikedeka Nuan. Aku bempu saksi ianya Nuan meh patut dipuji ba kereja Nuan, sereta patut dititih meh tangkan-atur Nuan, lalu meruan nadai penekul ba peminta Nuan.

Udah nya uji iya ngangkatka jari iya, lalu nyebut tiga kali Nama Pemadu Tebangkar*. Udah nya uji iya meremi diri lalu jari iya diengkah ba pala patung ngadap Petara —beberekat sereta tinggi meh Iya— lalu nyebut:

Nuan meda, O Petara aku, bakani roh aku udah begetar ba kaki jari aku enggau perengka tubuh aku, dalam pengelengau iya deka nyembah Nuan, lalu dalam pengingin iya deka ngingatka Nuan sereta muji Nuan; baka ni iya besaksika utai ti endur Dilah Jaku-perintah Nuan udah nyadi ke saksi dalam perintah leka jaku Nuan sereta dalam serega penemu Nuan. Aku rindu, dalam gaya tu, O Tuhan aku, minta enggau pemaruh ati ari Nuan semua utai ti dikemisi Nuan, awakka aku tau nunjukka penyeranta aku, lalu ngemesaika pementas Nuan enggau pengaya Nuan, lalu tau ngaku pengurang kuasa aku Ialu ngayanka kuasa Nuan enggau penegap Nuan.

Alláh-u-Abhá

Udah nya uji iya bediri lalu ngangkat jari iya dua kali minta, Ialu nyebut:

Nadai Petara bukai tang Nuan, ti Pemadu Tegap, ti Pemadu Pemisi. Nadai Petara bukai tang Nuan, ti Ngeletak, kenyau ari pun lalu ba pengujung. O Petara, Petara aku! Pengampun Nuan udah ngasuh aku berani, lalu pengasih Nuan udah ngeringka aku, Ialu kangau Nuan udah ngenanika aku, lalu berekat Nuan udah ngangkat aku sereta ngiring aku nuju Nuan. Sapa meh aku, enti enda ketegal nya, berani bediri ba pintu penama nuju nengeri penyemak Nuan, tauka nungaka mua aku ngadap penampak ti manchar ari serega peneka Nuan? Nuan meda, O Tuhan aku, utai idup ti papa tu nekung pintu berekat Nuan, lalu semengat ti tau lela tu ngiga sungai pengidup ti meruan ari jari pementas Nuan. Enggi Nuan nya meh perintah ba sebarang maya, O Nuan Tuhan ke semua nama; lalu enggi aku nya meh nyerahka diri sereta nerima enggau pengaga peneka Nuan, O Penempa serega!

Udah nya uji iya ngangkat jari iya tiga kali, lalu nyebut:

Lebih Bekuasa meh Petara ari genap iku ti bekuasa!

Udah nya uji iya nyerugang, lalu kening iya meremi ngagai lantai (tanah), lalu nyebut:

Kelalu tinggi meh Nuan ke puji sida ti semak enggau Nuan niki ngagai serega besemak enggau Nuan, tauka burung ati sida ti angkunka Nuan datai ba pintu penama Nuan. Aku besaksi ianya Nuan meh suchi ngelui semua penau sereta kudus ngelui semua nama. Nadai Petara bukai tang Nuan, ti Pemadu Tinggi, ti Pemadu Mulia.

Udah nya uji iya nudukka diri lalu nyebut:

Aku besaksi ba utai ti udah disaksika semua utai tempa, enggau Raban Malikat di atas, enggau bala ti diau ba Serega ti pemadu tinggi, lalu ngelui ari atas sida nya, Dilah Pemesai nya empu ari Bingkai- langit ti pemadu mulia, ianya Nuan meh Petara, lalu nadai Petara bukai kelimpah ari Nuan lalu Iya Siku ti udah dipegari ianya Penyelai ti Dipelalai, Lambang Pesaka, ke nengah Iya urup B enggau E (Be!) udah disambung sereta bejantil. Aku besaksi ianya Iya meh ti Ngempu nama ti udah ditulis ngena Pen ti Pengambis Tinggi, lalu Nuan ti udah dikenang dalam semua Kitab Petara, Tuhan ba Maligai ti di atas enggau ba tanah di baruh.

Udah nya uji iya bediri lurus lalu nyebut:

O Tuhan ke semua pengidup sereta Ngempu semua utai ti dipeda enggau ti enda dipeda! Nuan udah beratika ai mata aku enggau sera nyawa aku, sereta ninga demuh dada aku, enggau sedan sabak aku, lalu nemu penyinu ati aku. Ngena penegap Nuan! Penyalah aku udah nagang aku ari ke tebatak semak ngagai Nuan; lalu dosa aku udah ngerindang aku jauh ari balai pengudus Nuan. Pengerindu Nuan, O Tuhan aku, udah ngayaka aku, lalu beserara ari Nuan udah ngerusak aku, lalu jauh ari Nuan udah ngangus aku. Aku minta kasih Nuan ngena kelai tapa kaki Nuan ba kampung jerung tu, lalu ngena leka jaku "Ditu meh aku. Ditu meh aku," ti udah disebut Bala ti dipilih Nuan dalam pengeluas rampa dunya tu, lalu ngena seput Revelasyen Nuan enggau tiup ribut ti begadai- gadai ba Dini hari Pengayan Nuan, ngeletakka awakka aku tau merening pemajik Nuan lalu ngasika semua utai dalam Kitab Nuan.

Udah nya uji iya nyebut Nama Pemadu Tebangkar tiga kali, lalu meremi sereta jari iya diengkah ba pala patung, lalu nyebut:

Puji meh ngagai Nuan, O Petara aku, laban Nuan udah mantu aku ngingatka Nuan lalu muji Nuan, lalu udah ngasuh aku ngelala Nuan ti nyadi Terebak-tawas tanda-tanda Nuan, Ialu udah ngasuh aku meremi ke baruh lebuh betunga enggau Kuasa- Tuhan Nuan, lalu ngemaruhka diri ba mua Kuasa-Petara Nuan, lalu nerima utai ti udah disebut Dilah pemesai-kuasa Nuan.

Udah nya uji iya bediri lalu nyebut:

O Petara, Petara aku! Belakang aku nyau bungkuk laban tating dosa aku lalu nadai pengibuh aku udah ngerusakka aku. Lebuh aku ngenang penyalah kereja aku sereta pementas Nuan, ati aku anchur di dalam aku, lalu darah aku gesak dalam urat darah aku. Ngena Pemajik Nuan, O Nuan ti dikingin Dunya! Aku malu deka ngangkatka mua aku ngadap Nuan, lalu pengandal jari aku berasai malu deka diunjur ngagai serega pementas Nuan. Nuan meda, O Petara aku, bakani ai mata aku nagang aku ari ti ngingatka Nuan enggau muji pemanah Nuan, O Nuan Tuhan Maligai di atas enggau ba tanah di baruh! Aku minta Nuan ngena tanda Perintah Nuan enggau penyelai Pegai- Kuasa Nuan ngintu bala ti dikerindu Nuan ngena pementas Nuan, O Tuhan ke semua pengidup, lalu patut nerima berekat Nuan, O Raja ke utai ti dipeda enggau ti enda dipeda!

Udah nya uji iya nyebut Nama Pemadu Tebangkar tiga kali, lalu nyerugang sereta kening iya meremi ngagai tanah, lalu nyebut:

Puji meh ngagai Nuan, O Petara kami, laban Nuan udah ngirum ke baruh ngagai kami utai ti matak kami semak ngagai Nuan, lalu mekal kami enggau genap utai ti manah ti dikirum Nuan ke baruh dalam Bup Nuan enggau Kitab Nuan. Jaga kami, kami minta Nuan, O Tuhan aku, ari tepan pengelebu ngapa enggau igau sengapa. Nuan, amat bendar, ti Tegap, ti Pemadu Nemu.

Udah nya uji iya ngangkat pala diri, sereta nudukka diri, lalu nyebut:

Aku besaksi, O Petara aku, ke utai ti udah disaksika bala ti dipilih Nuan, lalu ngaku utai ti udah diaku raban ti diau ba Serega ti pemadu tinggi enggau sida ti udah ngelingi Maligai Nuan ti tegap. Perintah di dunya enggau di serega enggi Nuan, O Tuhan ke semua dunya!

#12610
- Bahá'u'lláh

 

General

ANAKMIT

O Petara! Tupi anakmit tu dalam ruang dada pengerindu

Nuan, lalu beri iya tusu ari ruang dada Penabat Nuan. Kemansangka anak kayu ti tuchi tu dalam kebun bungai ros pengerindu Nuan lalu intu iya ngena panjah ujan penyayau Nuan. Gaga iya nyadi siku anakmit ba perintah suchi sereta uluka iya ngagai dunya serega Nuan. Nuan ti bekuasa sereta nelap, lalu Nuan meh ti Penyikap, ti Mentas, Tuhan ti ngelui pemisi.

#12611
- `Abdu'l-Bahá

 

O Nuan Tuhan ti nadai banding! Asuh anakmit tu nusu ba ruang dada pengerindu-penelap Nuan, lalu ibun iya dalam wa pengelikun enggau jaga Nuan lalu asuh iya diibun dalam kerendut lengan pengeliut pengerindu Nuan.

#12612
- `Abdu'l-Bahá

 

O Nuan Tuhan ti Nelap! Bala anakmit ti manah tu endang asil pengawa tunjuk penegap Nuan enggau pemadas kelai Nuan ti besai. O Petara! Jaga bala anakmit tu, enggau pengasih bantu sida awakka pandai lalu asuh sida gawaka dunya mensia. O Petara! Bala anakmit tu endang mutiara, asuh sida ditupi dalam serayung pengerindu-penelap Nuan.

Nuan meh ti Pemisi, ti Penuh Pengerindu.

#12613
- `Abdu'l-Bahá

 

O Petara! Ajar sida anakmit tu. Sida anakmit tu utai tanam ba madang buah Nuan, bungai ba padang Nuan, bungai ros ba kebun Nuan. Asuh ujan Nuan labuh ba sida; asuh Matahari Pengamat manchar ba sida enggau pengerindu Nuan. Awakka puput ribut Nuan ngidupka sida ngambika sida tau dilatih, mansang sereta besai, lalu ayan enggau naka pemanah. Nuan meh ti Pemeri! Nuan meh ti Penyinu.

#12614
- `Abdu'l-Bahá

 

O Tuhan aku, O Tuhan aku!

Aku tu anakmit ti agi biak. Tupi aku ari dada pengasih Nuan, latih aku dalam ruang dada pengerindu Nuan, asuh aku belajar dalam sekula iring Nuan lalu kemansangka aku di baruh kelamayang pemeri Nuan. Pansutka aku ari pemetang, gaga aku nyadi panchar ti perenching; lepaska aku ari penusah, gaga aku nyadi bungai ba kebun ros, asuh aku nyadi pengasuh ba pemetung Nuan lalu beri ke aku pendiau enggau gaya ulah ti rentang; gaga aku nyadi ke pemansut pemisi ngagai dunya mensia lalu iyas pala aku ngena intan pengidup ti meruan!

Amat bendar, Nuan ti Bekuasa, ti Tegap, ti Meda, ti Ninga!

#12615
- `Abdu'l-Bahá

 

O Nuan Tuhan ti pemadu bemulia! Gaga pengasuh indu

Nuan ti mit tu beberekat sereta lantang; asuh iya diasi ba pemetung penyatu Nuan lalu asuh iya ngirup mayuh ari changkir pengerindu Nuan awakka iya tau ngasaika penyamai enggau pengaga lalu ngerekaika bau rengut ti manis. Nuan ti Tegap sereta Bekuasa, lalu Nuan ti Nemu Semua, ti Meda Semua.

#12616
- `Abdu'l-Bahá

 

O Tuhan! Gaga bala anakmit tu nyadi kayu ti lati. Asuh sida tumbuh sereta mansang dalam Kebun Sempekat Nuan, lalu beri pengalak enggau pemanah nengah ujan mua-hari Perintah ti pemadu bemulia.

O Nuan Tuhan ti nelap! Aku tu anak ti agi mit, keninggika aku diterima ba perintah nya. Aku tu ari bumi, gaga aku bepengudus; Aku tu ba dunya di baruh, asuh aku nguan dunya di atas; piam, perinsaka aku nyadi beperenching; material, asuh aku spiritual, lalu kemendarka aku tau ngayanka berekat Nuan ti nadai sekat.

Nuan meh ti Bekuasa, ti Penuh Pengerindu.

#12617
- `Abdu'l-Bahá

 

O Petara, iring aku, jaga aku, gaga aku nyadi lampu ti terang enggau bintang ti bekebelik. Nuan meh ti Tegap sereta Bekuasa.

#12618
- `Abdu'l-Bahá

 

ANEMBIAK

O Nuan Tuhan ti nelap! Ari bingkai-langit pengingkas

Nuan udah ngayanka bala semengat ti, indah enda baka bulan ti terang, mancharka penampak ba dunya ati enggau semengat, ngelengka diri empu ari penau dunya nyata tu lalu berumban nuju ngagai dunya pengidup ti selama ia. Ngena setitik ai ari tasik penelap pengerindu Nuan, Nuan udah ngamika kebun ati sida datai ke sida nyau pemadu segar sereta manding. Rengut pengudus ke penyerakup suchi Nuan udah ngerembai jauh, ngesuhka pemanis bau ia ba selampur dunya, ngasuh semua tempat di dunya tu ngaba laban bau angi ia.

Nya alai angkatka, O roh ti Tulin, bala semengat ti, baka sida bepengidup suchi, deka lepas sereta tulin, deka ngiyas dunya pengidup ngena gari ti baru enggau kelambi ti badas, deka ngiga nadai orang bukai tang Nuan, niti nadai menasan bukai tang menasan pemanah-penyamai Nuan sereta nadai deka bejakuka utai bukai tang bejakuka misteri Pengawa Nuan.

O Nuan Tuhan ti nelap! Kemendarka anembiak tu tau tulihka niat tinggi sida ti kudus. Sikap iya ngena sayap pengering berekat Nuan—sayap pengingkas enggau bantu suchi—awakka ari nya iya tau terebai ngagai langit penyiru pengasih Nuan, tau bulih pemeri serega, tau nyadi kelai lalau suchi enggau tikas Raban Malikat di atas. Nuan ti Bisa, ti Bekuasa, ti Meda, ti Ninga.

#12619
- `Abdu'l-Bahá

 

O Nuan Tuhan ti nelap! Enggau pengasih sikap sepasang sayap serega ngagai tiap anak biak ti baru ada tu, lalu beri sida pengering spiritual ngambika sida ulih terebai nengah langit ti nadai sekat lalu tau niki ngagai semua peninggi Perintah Abhá.

O Tuhan! Keringka igi benih ti lembut tu ngambika tiap leka nyadi kayu ti lebat bebuah, galak sereta rinda. Asuh bala semengat tu menang nengah pemisa bala malikat serega Nuan, ngambika sida ulih ngalahka kuasa penyilap enggau pengelansang lalu ngarakka tikas kaul bekaban enggau lalau ba bala mensia; ngambika sida ulih, indah enda baka seput pengidup ba musim bungai, ngidup baru lalu ngeregaska kayu semengat mensia baka terutu ambun ti ngasuh padang ba endur nya gadung sereta ami.

Nuan meh ti Tegap sereta Bekuasa; Nuan meh ti Penyikap enggau Penuh Pengerindu.

#12620
- `Abdu'l-Bahá

 

O Nuan Tuhan ti nelap! Sikap penetap serega ba anak indu tu ba perintah, lalu enggau pengasih bantu iya awakka iya tau mengkang teguh enggau tegap dalam Pengawa Nuan ngambika iya tau, baka burung bul bul di kebun bungai ros misteri, melandaika sada nyawa di Perintah Abhá dalam munyi ti pemadu manis, ari nya mai pengelantang ngagai semua. Gaga iya tinggi dalam raban anak indu ba perintah lalu asuh iya tulihka pengidup meruan selama ia.

Nuan meh ti Penyikap, ti Penuh Pengerindu.

#12621
- `Abdu'l-Bahá

 

O Tuhan! Asuh anembiak tu terang, lalu chirika pemisi

Nuan ba utai tempa ti seranta tu. Sikap ba iya penemu, lalu kemendarka pengering ti betambah ba iya tiap terebak-tawas lalu ibun iya dalam lindung jaga Nuan ngambika iya lepas ari penyilap, tau angkunka diri empu ngereja Pengawa Nuan, tau ngiring sida ti limpang, ngulu sida ti nadai daya, ngelepaska sida ti dikurung lalu ngerak sida ti nadai ibuh, awakka semua tau diberekat enggau pengingat sereta puji Nuan. Nuan endang Tegap sereta Bekuasa.

#12622
- `Abdu'l-Bahá

 

Puji enggau mulia meh ngagai Nuan, O Tuhan Petara aku! Tu meh paung pilih ke udah ditanam Nuan ba padang pengerindu Nuan lalu udah ditupi ngena jari Tuhan Nuan. Nuan udah nata ia ngena ai ari telaga pengidup meruan ke anyut ari kebun Penyatu Nuan lalu Nuan udah ngasuh muahari penyiru pengasih Nuan nelesaika pengasih Nuan ba ia. Ia diatu udah tumbuh sereta mansang besai di baruh lindung berekat Nuan ke ayan ari Terebak-tawas ayu pengudus Nuan. Ia udah ngerembai nyadi daun lalu bebungai, lalu lebat bebuah nengah penginang pemanah tepa enggau upah Nuan lalu diguyat ulih bau rengut ribut ti ngesuh ari penatai pengerindu pementas Nuan.

O Tuhan! Asuh paung tu nyadi galak, segar sereta rinda ari panjah pemeri spesial enggau pengasih Nuan, ke ngena nya Nuan udah nyikap panggau kudus ba Perintah

Nuan ti meruan lalu udah ngias ayu penyerakup ba arena begulai baru.

O Tuhan! Bantu iya nengah berekat pengering Nuan ke datai ari Perintah Nuan ti enda dipeda, saup iya enggau raban malikat baka ti dilalai ari mata bala pengasuh Nuan lalu kemendarka iya tau bulih pengentap ba penatai Nuan. Telipika dilah iya ngambika dikena ngading Nuan lalu kelantangka ati iya ngambi ngeramika puji Nuan. Terangka mua iya ba Perintah Nuan, kemajuka iya ba dunya di atas lalu enggau pengasih tetapka iya gawaka Pengawa Nuan.

Nuan meh ti Pemadu Bekuasa, ti Pemadu Mulia, ti Pemadu Bisa.

#12623
- `Abdu'l-Bahá

 

DIRI SEBILIK

Nuan meda, O Tuhan, jari peminta kami diangkat ngadap serega pengasih enggau pemisi Nuan. Kemendar awakka sida tau diisi ngena pesaka bantu penelap enggau pengasih Nuan ti chukup mayuh. Ampun kami, enggau apai kami, enggau indai kami, lalu kamatka sebarang utai ti dikedeka kami ari tasik berekat enggau pementas Kudus Nuan. Terima, O Dikerindu ati kami, semua kereja kami dalam menasan Nuan. Nuan amat bendar, ti Pemadu Bekuasa, ti Pemadu Tinggi, ti Nadai Banding, ti Siku, ti Pengampun, ti Bepengasih.

#12626
- Bahá'u'lláh

 

"Berekat meh iya ti ingatka apai indai iya lebuh berandau enggau Petara".

#12624
- The Báb

 

Aku minta pengampun Nuan, O Petara aku, lalu minta tembang nitihka gaya peneka Nuan ngasuh bala pengasuh Nuan nguingka sida empu ngagai Nuan. Aku minta Nuan nuchi semua penyalah kami nitihka pematut kuasa Tuhan Nuan, lalu ngampun aku, apai indai aku, sereta enggau sida dalam jangka nuan udah masuk ke dalam palan pengerindu Nuan ti lumau ngelui kuasa-raja sereta sigi patut ke mulia kuasa serega Nuan.

O Petara aku! Nuan udah meransang semengat aku nyerahka peminta ia ngagai Nuan, lalu semina ba Nuan, enti enda ketegal nya aku enda ngangauka Nuan. Dipuji sereta dimuliaka meh Nuan; aku meri Nuan puji laban Nuan udah ngayanka Nuan empu ngagai aku, lalu aku minta Nuan ngampun aku, laban aku bisi pengurang ba ungkup kereja aku deka nemu Nuan lalu udah enda mujur bejalai dalam menasan pengerindu Nuan.

#12625
- The Báb

 

Tuhan aku! Tuhan aku! Aku muji Nuan sereta beterima kasih ngagai Nuan laban Nuan udah kasihka pengasuh indu Nuan ti baruh ati, jaum Nuan minta enggau pengabis ati sereta minta enggau pemaruh ati ngagai Nuan, laban Nuan amat bendar udah ngiring iya nuju Perintah Nuan ti nyata sereta ngasuh iya ninga Kangau Nuan ti tinggi ba dunya injau tu lalu meda semua Tanda Nuan ti nunjukka pengayan pemenang perintah Nuan di atas semua utai.

O Tuhan aku, aku nyerahka iya ti di dalam kandung aku ngagai Nuan. Lalu asuh iya nyadi anak ti patut dipuji dalam Perintah Nuan sereta siku ti benasip ketegal pengasih Nuan enggau pementas Nuan; ngambika dikemansang sereta dikemesai di baruh pelajar Nuan. Amat bendar, Nuan meh ti Mentas! Amat bendar, Nuan meh Tuhan Besai Pengasih!

#12627
- `Abdu'l-Bahá

 

O Petara, Petara aku! Tu pengasuh- indu Nuan minta ngagai Nuan, arap ba Nuan, nungaka mua iya ngadap

Nuan, minta enggau bebendar ngagai Nuan ngambika nibarka pemeri serega Nuan ba iya, lalu madah ngagai iya misteri spiritual Nuan, lalu tenggau ba iya panchar KuasaPetara ba Nuan.

O Tuhan aku! Asuh mata laki aku lansik. Kelantang Nuan ati iya ngena panchar penemu pasal Nuan, batak Nuan runding iya ngagai perenching pemajik Nuan, kelantangka roh iya ulih Nuan ari ti ngayanka ngagai iya penerang bebendang Nuan.

O Tuhan aku! Angkat Nuan tirai ari perening iya. Panjah ke baruh pemayuh pemisi Nuan ba iya, asuh iya mabuk ketegal ai anggur pengerindu ke Nuan, asuh iya nyadi siku ari bala malikat Nuan ti bejalai kaki ba tanah tu taja semengat sida terebai nengah serega ti tinggi. Asuh iya nyadi lampu terang, manchar ngena penampak pemintar Nuan ba tengah-tengah bala rayat Nuan.

Amat bendar, Nuan ti Berega, ti Sedia Nyikap, ti Tebuka Jari.

#12628
- `Abdu'l-Bahá

 

O Tuhan! Dalam Rambau ti Pemadu Tebangkar tu Nuan nerima peminta ari bala anak ti ngarika apai indai sida. Tu meh siti ari penyelai-pemanah penyikap Nuan ti nadai sekat ba Rambau tu. Nya alai, O Nuan Tuhan ti nelap, terima peminta pengasuh Nuan tu ba pemetung penyatu Nuan lalu selamka apai iya dalam tasik berekat Nuan, laban anak tu udah angkat gawaka Nuan lalu bebendar ba semua maya dalam arus menasan pengerindu Nuan. Amat bendar, Nuan ti Pemeri, ti Pengampun enggau ti Nelap!

#12629
- `Abdu'l-Bahá

 

EMPURU

Dimuliaka meh Nuan, O Tuhan Petara aku! Aku minta ngagai Nuan ngena pangka ribut pengasih Nuan, enggau sida Bala Terebak-tawas ke tuju Nuan enggau Palan Penatai peransang Nuan, kirum ke baruh ngagai aku enggau semua sida ti udah ngiga mua Nuan utai ti ngakun ke pementas pemisi pengasih Nuan, lalu lumau ke penyikap enggau pengasih Nuan. Umang sereta kediri meh aku tu, O Tuhan aku! Selamka aku dalam tasik pengaya Nuan; aus, asuh aku ngirup ari ai pengidup pengerindu-penelap Nuan.

Aku minta Nuan, nengah Nuan Empu sereta nengah Iya Siku ti udah dipadu Nuan nyadi Seruan ke Pengidup Nuan Empu enggau Jaku penisih Nuan ngagai semua ke di serega enggau ba bumi, ngelumu segulai bala pengasuh Nuan di baruh ayung Kayu pemeri berekat Nuan. Udah nya, tulung sida, ngasaika buah ia, nungaka pending sida ngagai kerus daun ia, enggau ngagai pemanis nyawa Burung ti melandai ba dan ia. Nuan, amat bendar, Penulung lebuh Tusah, Enda ulih dilawa, ti Pemadu Tegap, ti Pemadu Pemisi.

#12630
- Bahá'u'lláh

 

Nuan Petara ti pengasih! O Nuan Siku ti tegap sereta bekuasa! O Nuan Apai ti pemadu mentas! Tu bala anembiak ke begempuru, nunga ngadap Nuan, minta enggau pemaruh ati ba pemetung Nuan, inginka penyayau Nuan ti enda nemu abis ari pemesai penetap Nuan. Sida nadai tuju bukai semina deka ke pemanah-penyamai Nuan. Sida nadai kebuah bukai kelimpah ari gawaka dunya mensia.

O Petara! Asuh serumpu tu terang. Asuh ati bepengasih. Turunka penyayau Roh Kudus. Sikap sida ngena kuasa ari serega. Berekat sida enggau runding ti tuchi. Tambahka pemetul ati sida awakka ngena pengabis pemaruh enggau pengesal ati, sida tau nunga ngadap perintah Nuan lalu kiruh gawaka dunya mensia. Awakka tiap iku tau nyadi dian ti terang. Awakka tiap iku tau nyadi bintang ti perenching. Awakka tiap iku baka chura ti manah sereta bau rengut ti manis dalam perintah Petara.

O Apai ti nelap! Chirika pemayuh berekat Nuan. Anang ngira semua penimpang kami. Lindung kami di baruh jaga Nuan. Anang ngingatka semua dosa kami! Sumanka kami ngena pengasih Nuan. Kami tu lembut; Nuan meh tegap. Kami tu umang; Nuan meh kaya. Kami tu sakit; Nuan meh Pengubat.

Kami tu seranta; Nuan meh pemadu mentas.

O Petara! Sikap kami ngena penabat Nuan. Nuan meh ti Bekuasa. Nuan meh ti Pemeri. Nuan meh ti

Penyaup.

#12631
- `Abdu'l-Bahá

 

Nuan Tuhan ti nelap! Tu bala pengasuh Nuan ti udah begempuru ba aum tu, ngadap perintah Nuan lalu begunaka pemeri enggau berekat Nuan. O Nuan Petara! Ayan sereta pandangka tanda penyatu Nuan ti udah ditukuh ba semua realiti pengidup. Pegari sereta kerembaika pemanah ti udah ditaruh sereta dipelam Nuan dalam semua realiti mensia tu.

O Petara! Kami tu baka kayu, lalu pemisi Nuan baka ujan; idup sereta asuh kayu tu mansang nengah penyikap Nuan. Kami tu bala pengasuh Nuan; lepaska kami ari tanchang pengidup dunya. Kami tu lansang, asuh kami pintar. Kami tu mati, asuh kami idup. Kami tu material, sikap kami ngena roh. Kami tu dikemelu; asuh kami nyadi pangan semak semua misteri Nuan. Kami tu seranta; beri pengaya sereta berekat ari pesaka Nuan ti enda nemu abis. O Petara! Gerak kami; asuh kami meda; asuh kami ninga; telebaka kami enggau semua misteri pengidup, awakka semua lalai perintah Nuan tau pegari ngagai kami ba dunya tu lalu kami tau ngaku penyatu Nuan. Tiap penyikap datai ari Nuan; tiap berekat endang enggi Nuan.

Nuan meh tegap! Nuan meh bekuasa! Nuan meh

Pemeri, lalu Nuan meh ti Seruran Pemisi!

#12632
- `Abdu'l-Bahá

 

Nuan Petara ti Pengampun! Bala pengasuh tu ngadap perintah Nuan lalu ngiga pengasih enggau pemeri Nuan. O Petara! Gaga ati sida manah sereta tuchi awakka sida tau lumau nerima pengerindu Nuan. Tuchi sereta kuduska roh sida awakka penerang Matahari Pengamat tau manchar ba sida. Tuchi sereta kuduska mata sida awakka sida tau ngelala penerang Nuan. Tuchi sereta kuduska pending sida awakka sida tau ninga kangau perintah Nuan.

O Tuhan! Amat bendar, kami tu lembut, tang Nuan meh tegap. Amat bendar, kami tu umang, tang Nuan meh kaya. Kami tu pengiga, lalu Nuan meh Siku digiga. O Tuhan! Beri penyinu ke kami lalu ampun kami; sikap ba kami pengulih sereta pengadang awakka kami tau lumau nerima pengasih Nuan lalu tetarit ngagai perintah Nuan, tau ngirup ari penalam ai pengidup, tau ditungkun ngena api pengerindu Nuan, lalu diidup ngena seput Roh Kudus ba rambau penampak tu.

O Petara, Petara aku! Tenggau ba gempuru tu perening pengerindu-penelap Nuan. Impun genap iku enggau semua dalam ibun Nuan enggau di baruh jaga Nuan. Kirum ke baruh ngagai bala semengat tu berekat pengudus Nuan. Selam sida dalam tasik pengasih Nuan, lalu gerak sida ngena seput Roh Kudus.

O Tuhan! Sikap berekat bantu Nuan enggau penetap ba perintah ti lurus tu. Menua tu ba baruh ayung kelemayang jaga Nuan, lalu orang tu gawa dalam servis

Nuan. O Tuhan! Chirika ba sida pemeri pengudus Nuan lalu beri panjah berekat enggau pengasih Nuan ti kaya sereta mayuh. Sukung menua ti jelai nama tu enggau basa, lalu kemendarka ia masuk ngagai perintah Nuan.

Nuan meh ti Bekuasa, ti Pemadu Bisa, ti Pengasih, lalu Nuan meh ti Mentas, ti Pemeri, Tuhan ke berekat ti nadai tatak.

#12633
- `Abdu'l-Bahá

 

O Nuan Pemekal ti bepengerindu! Semua semengat tu udah ninga kangau Perintah Petara, lalu udah merening ba mulia Matahari Pengamat. Sida udah angkat ke atas ngagai penyamai langit pengerindu; sida udah gagit ke gaya pendiau Nuan, lalu sida nyembah pemajik Nuan. Ngagai Nuan meh sida udah nguingka sida empu, sama berandau pasal Nuan, ngiga tempat Nuan, sereta auska ai tengkebuk serega perintah Nuan.

Nuan meh ti Pemeri, ti Penyikap, ti Seruran Rindu.

#12634
- `Abdu'l-Bahá

 

FUND

Semua bala pangan Petara… patut meri enggau naka ulih, enda ngira penyampau ia. Petara enda deka ngenusahka semengat lebih ari pengulih iya. Pemeri ti bakanya patut datai ari semua tempat enggau ari semua orang ti arap... O bala Pangan Petara! Pechaya bendar ianya dikena nipakka pemeri tu, dia kebun kita, gudang kita, enggau dagang kita deka diberekat betambah belipat lipat, ngena pemanah tepa enggau penyikap. Iya ti ngereja siti pengawa manah deka nerima upah sepuluh kali lipat. Nadai pengakang ianya Tuhan ti idup tetap deka ngentap enggau naka pemayuh ba sida ti bebelanjaka pengeraja sida dalam menasan Iya.

#12635
- `Abdu'l-Bahá

 

O Petara, Petara aku! Terangka kening semua bala ti amat rindu ke Nuan, lalu tulung sida enggau raban malikat ti tetap bulih pemenang. Tegapka kaki sida nuju menasan Nuan ti lurus, lalu ari pemeri Nuan ti jeman telengaka ngagai sida pintu berekat Nuan; laban sida bebelanja ba menasan Nuan utai ti udah diberi Nuan ke sida, ngibun Pengarap Nuan, manggaika pengarap ati sida ba pengingat sida ke Nuan, nyerahka ati sida ketegal pengerindu ke Nuan, lalu enda matak pemisi sida dikena muji Pemajik Nuan enggau dikena sida ngiga chara ngelantangka Nuan.

O Tuhan aku! Letak ba sida ungkup ti mayuh, agih ti ditaga enggau upah ti tetap.

Amat bendar, Nuan meh ti Pengenan, ti Penulung, ti Mentas, ti Pemisi, ti Meruan Nyikap.

#12636
- `Abdu'l-Bahá

 

GAWA/SERVIS

O Petara, enggau Petara ke semua Nama, enggau

Pengaga semua serega! Aku minta Nuan nengah Nama Nuan ke alai Iya ti Terebak-tawas ke penegap Nuan enggau Palan Penurun kuasa Nuan udah diayanka, nengah nya genap utai ti betekang udah diasuh lela, lalu genap iku bangkai ti mati diidupka, lalu genap iti roh ti nginsit dientapka—aku minta Nuan ngambika aku ulih ngingkaska aku empu ari semua tanggam ngagai semua utai tang Nuan, lalu gawaka Pengawa Nuan, lalu dekaka utai ti dikedeka Nuan nengah pengering kuasa-raja Nuan, lalu ngereja utai ti manah ba penyamai peneka Nuan.

Nambah ke nya, aku minta Nuan, O Petara aku, ngeletakka ba aku utai ti tau ngasuh aku chukup kaya ke alai ulih ngelengkaka semua utai bukai semina Nuan. Nuan meda aku, O Petara aku, enggau mua aku nunga ngadap Nuan, lalu jari aku bepegai ba rambu berekat Nuan. Kirum ke baruh ngagai aku penyinu Nuan, lalu tuliska aku utai ti udah ditulis Nuan ke bala ti dipilih Nuan. Bekuasa meh Nuan ngereja utai nitihka peneka Nuan. Nadai Petara bukai tang Nuan, ti Seruran Pengampun, ti Pemadu Pemisi.

#12637
- Bahá'u'lláh

 

MALAM

26 Bakani ku aku deka tinduk, O Petara, Petara aku, lebuh mata sida ti lelengauka Nuan mengkang dani ketegal sida beserara ari Nuan; lalu bakani aku ulih ngalika diri belelak lebuh semengat bala sulu Nuan nyau merampau laban ti jauh ari penatai Nuan?

Aku udah nyerahka, O Tuhan aku, roh aku enggau semua pengidup aku ngagai jari kanan penegap Nuan enggau jaga Nuan, lalu aku ngalika pala aku ba panggal aku nengah kuasa Nuan, lalu ngangkat ia nitihka peneka Nuan enggau penyamai pemanah Nuan. Nuan endang amat, ti Pengimpun, ti Pengintu, ti Pemadu Tegap, ti Pemadu Bekuasa.

Ngena penegap Nuan! Aku enda minta, sekalika tinduk tauka dani, tang semina utai ti dikingin Nuan. Aku tu pengasuh Nuan lalu dalam jari Nuan. Uji Nuan enggau pengasih mantu aku ngereja utai ti tau ngabaka rengut penyamai pemanah Nuan. Tu, amat bendar, pengandal aku enggau pengandal sida ti gaga besemak enggau Nuan. Puji meh Nuan, O Tuhan ke semua dunya!

#12638
- Bahá'u'lláh

 

O Petara aku, Tuan aku, Juluk ati pengingin aku! Tu, pengasuh Nuan, ngiga peninduk ba pengelindung penyinu Nuan, lalu deka gali di baruh kanopi berekat Nuan, minta ibun enggau jaga Nuan.

Aku minta kasih Nuan, O Tuhan aku, ngena mata Nuan ti nadai tinduk, ngibun mata aku ari ti merening ke bukai kelimpah ari Nuan. Udah nya, keringka, perening sida ngambika sida ulih ngelala semua tanda Nuan, lalu meda Bingkai- langit Revelasyen Nuan. Nuan meh Iya ba semua pengayan kah kuasa pemadu bisa Iya udah begegar.

Nadai Petara bukai tang Nuan, ti Pemadu Tegap, ti Nguasa Semua, ti Nadai Betatak.

#12639
- Bahá'u'lláh

 

O Tuhan, aku udah nungaka mua aku ngadap perintah penyatu Nuan lalu nyelamka diri empu dalam tasik pengasih Nuan. O Tuhan, terangka perening aku meda panchar Nuan ba malam tegayam tu, lalu asuh aku lantang laban ai anggur pengerindu Nuan ba pemanah rambau tu. O Tuhan, asuh aku ninga kangau Nuan, lalu buka ba mua aku semua pintu serega Nuan, ngambika aku tau meda penampak mulia Nuan lalu tau tetarit ngagai pemajik Nuan.

Amat bendar, Nuan meh ti Pemeri, ti Mentas, ti Pengasih, ti Pengampun.

#12640
- `Abdu'l-Bahá

 

MENSIA

Petara aku, Iya ti disembah sereta disayau aku! Aku besaksi ke penyerakup Nuan enggau penyatu Nuan, lalu ngelala tepa Nuan, sekalika ia ti dulu enggau ia ke diatu. Nuan meh Pemadu Pemisi, lumpa terutu pengasih Nuan udah manjah ngagai semua orang ti bepangkat tauka ke enda, lalu bebendang berekat Iya udah manchar bela ngagai orang ti ngasi enggau ke nyakal.

O Petara ti pengasih, ba mua pintu Iya ayu pengasih udah ngunduk ke baruh, lalu ba pengenduh Pengawa Iya ke alai pengerindu-penelap, dalam penalam roh iya, udah ngelingi, kami minta ari Nuan, minta kasih berekat Nuan ti jeman, lalu ngiga pengerindu Nuan ke diatu, awakka Nuan bisi penyinu ngagai semua sida ti pegari ba dunya pengidup, lalu anang ngemeluka sida ari panchur berekat Nuan ba hari Nuan.

Semua endang umang sereta suntuk, lalu Nuan, amat bendar, ti Bempu Semua, ti Ngalah Semua, ti Pemadu Bekuasa.

#12641
- Bahá'u'lláh

 

O Nuan Tuhan ti penyinu, Nuan ti amat mentas sereta bepengulih! Kami tu pengasuh Nuan ti dilindung di baruh penabat Nuan. Tenggauka perening pengasih Nuan ngagai kami. Beri penampak ke mata kami, pengelansik ke pending kami, sereta pemereti enggau pengerindu ke ati kami. Asuh semengat kami gaga sereta lantang ninga berita pengaga ari Nuan. O Tuhan! Tunjukka kami jalai nuju ngagai perintah Nuan lalu idupka baru semua kami nengah seput Roh Kudus. Sikap ba kami pengidup ti meruan lalu chirika ba kami basa ti enda putus. Serakupka semua mensia lalu perenchingka dunya mensia. Awakka semua kami nitih ke menasan Nuan, lelengauka pemanahpenyamai Nuan lalu ngiga misteri perintah Nuan. O Petara! Gempung semua kami lalu jantilka ati kami ngena tanggam Nuan ti enda putus. Amat bendar, Nuan meh ti Pemeri, Nuan Siku ti Nelap lalu Nuan ti Pemadu Tegap.

#12642
- `Abdu'l-Bahá

 

O Nuan Tuhan ti nelap! Nuan udah nempa semua mensia ari asal ti sama. Nuan udah ngeletak-tangkan semua endang deka diempu ruang bilik ti sama. Ba Mua Pengudus Nuan sida endang semua pengasuh Nuan, lalu semua mensia dilindung di baruh Panggau Nuan; semua udah sama begempuru ba Mija Pemisi Nuan; lalu semua diperenching nengah penampak Penabat Nuan.

O Petara! Nuan endang nelap ngagai semua, Nuan udah mekal ke semua, udah ngelindung semua, nyiri pengidup ke semua. Nuan udah meri genap iku enggau semua mensia ngena penau enggau pemandai, lalu semua diselam dalam Tasik Pengasih Nuan.

O Nuan Tuhan ti Nelap! Serakupka semua. Asuh semua agama besetuju lalu gaga semua menua nyadi siti, awakka sida meda pangan diri baka diri sebilik lalu semua dunya nyadi sebuah rumah. Awakka semua sida begulai enggau naka ia seati.

O Petara! Diri tinggi tambai penyatu bansa mensia.

O Petara! Dudukka Pemaik ti Pemadu Besai.

Tanggam Nuan, O Petara! semua ati segempung.

O Nuan Apai ti nelap, Petara! Kelantangka ati kami ngena rengut pengerindu Nuan. Terangka mata kami nengah Penampak Iring Nuan. Gagaka pending ngena pelandai Leka Jaku Nuan, lalu lindung semua kami dalam Kuta Penabat Nuan.

Nuan meh ti Tegap sereta Bekuasa, Nuan endang ti Pengampun lalu Nuan meh Iya Siku ti enda meda penimpang semua bansa mensia.

#12643
- `Abdu'l-Bahá

 

O Nuan Tuhan ti nelap! O Nuan Siku ti mentas sereta penyinu! Kami tu bala pengasuh ba pemetung Nuan lalu udah begempuru di baruh ayung kelemayang penyerakup suchi Nuan. Matahari penyinu Nuan manchar ba semua, lalu mua-hari pemisi Nuan manjah ba semua. Tepa Nuan nyerangkap semua, penabat pengerindu Nuan ngetanka semua, penyaga Nuan ngayung semua, lalu perening pengasih Nuan ditenggau ba semua. O Tuhan! Kemendarka penyikap Nuan ti nadai tatak, lalu asuh penampak iring Nuan beperenching. Terangka semua mata, kelantangka semua ati enggau pengaga ti meruan. Chirika roh ti baru ba semua mensia lalu sikap ba sida pengidup ti meruan belama. Buka kunchi semua pagar pemereti ti amat lalu asuh penampak pengarap ati manchar bebendang. Gempuru semua mensia di baruh ayung pemisi Nuan lalu asuh sida beserakup dalam seati, ngambika sida tau nyadi baka selinggar panas sigi matahari, baka umbak siti tasik, enggau baka buah kayu sepun. Awakka sida tau ngirup ari mata ai ti sama. Awakka sida tau diidupka ngena puput ribut ti sama. Awakka sida tau nerima perenching ari pun penatai penampak ti sama. Nuan meh ti Pemeri, ti Sinu, ti Pemadu Bisa.

#12644
- `Abdu'l-Bahá

 

NGAJAR

Mulia meh ke Nuan, O Tuhan ke dunya enggau

Pengingin ke semua menua, O Nuan ti udah dipegari dalam Nama ti Pemadu Tebangkar, ke alai mutiara pemintar enggau sada nyawa udah pansut ari kerubung tasik penemu Nuan ti besai, lalu revelasyen ti kudus udah diyas ngena penampak penatai matahari rampa-mua Nuan.

Aku minta ari Nuan, ngena Jaku nya ke alai pemendar tanda Nuan udah ditukuh ba utai tempa Nuan lalu testimoni Nuan udah dikamatka ba bala pengasuh Nuan, ngeringka bala mensia Nuan ba utai ke alai nama Pengawa deka manchar dalam perintah Nuan, tikas kuasa Nuan deka ditanam ba bala pengasuh Nuan, lalu tambai lalau Nuan deka ditegika di selampur perintah Nuan.

O Tuhan aku! Nuan meda sida bepagut ba tali pengasih Nuan lalu bepegai tegut ba rambu serayung penyayau Nuan. Letakka sida utai ke ulih narit sida semak ngagai Nuan, lalu tagang sida ari semua semina Nuan.

Aku minta ari Nuan, O Nuan Raja ke semua utai lalu Penyaga ke semua ti dipeda enggau ti enda dipeda, ngasuh sebarang sapa ti gawaka Pengawa Nuan baka tasik ti begelinggang ketegal pengingin Nuan, baka ia ti nyeru laban api Kayu Suchi Nuan, manchar ari bingkai-langit peneka Nuan. Amat bendar, Nuan meh Siku ti tegap, Iya ti nadai ulih dikelemika ulih semua kuasa dunya tauka pengering semua menua. Nadai Petara bukai tang Nuan, ti Siku, ti Nadai Banding, ti Penyaga, ti Pengibun Diri.

#12645
- Bahá'u'lláh

 

Puji meh nama Nuan, O Tuhan Petara aku! Nuan meda

bakani perening aku dituju ngagai penyiru pengasih Nuan, bakani mata aku ninjau ngagai bingkai- langit Berekat Pengasih Nuan enggau pengerindu pementas Nuan, lalu bakani jari aku diunjurka ngagai serega penyikap Nuan. Penegap Nuan nyadika saksi ba aku! Tiap perengka tubuh aku manjung ngagai Nuan lalu nyebut; "O Nuan ti Chukup Dikerinduka semua dunya, enggau Tuhan ke semua ti di serega sereta di dunya, lalu Nuan ti Diniat semua ati ti angkunka Nuan! Aku minta enggau pemaruh ati ari Nuan, ari Tasik Nuan ke alai Nuan udah nyapa semua ti idup dalam serega enggau semua ti diau ba dunya tu, ngambika nulung bala pengasuh Nuan ti udah di tinggal nunga ngagai ia sereta sangkai ba tebing ia. Lalu, asuh sida, O Petara aku, ngingkaska diri ari semua utai bukai tang Nuan, lalu asuh sida bejakuka puji Nuan sereta ngangkatka pemanah Nuan. Nambahka nya, bekal sida, O Petara aku, ngena Ai anggur pengasih Nuan ti chulin, awakka tau ngasuh sida enda ingatka orang bukai kelimpah ari Nuan, lalu angkat ngereja Pengawa Nuan, lalu nyadi tegap dalam pengerindu sida ke Nuan. Nuan meh, amat bendar Tuhan ke pengidup sida sereta Pugu ti dikerindu sida. Enti sida diburu Nuan, sapa meh deka ngemataka sida: lalu enti sida jauh beserara ari Nuan, sapa meh ti tau nulung sida ngelawa Pemisi Nuan? Aku besumpah ngena penegap Nuan! Nadai alai penyelamat ti ulih endur rari kelimpah ari Nuan, lalu nadai pengelindung ti digiga kelimpah ari pengelindung Nuan, lalu nadai jaga kelimpah ari jaga Nuan. Penyai ngalun iya ti ngaku orang bukai nyadi Tuhan kelimpah ari Nuan, lalu beberekat meh sida ti udah ngelengkaka diri empu ari semua tanggam ba semua bala ti diau ba tanah Nuan, lalu bepagut ba rambu pengeluas penyayau Nuan. Tu! bala orang Bahá, ba mua semua ti di serega enggau semua ti ba bumi. Nadai Petara bukai tang Nuan, ti Penuh Penemu, ti Semua Pintar.” Pujika Petara, Tuhan ke semua dunya.

#12646
- Bahá'u'lláh

 

O Petara aku, bantu ulih Nuan pengasuh Nuan nerantangka Leka Jaku, lalu nyakal igau sengapa enggau bula, ngentapka pengamat, ngerembaika jauh genteranjaku suchi, mansutka bendang-bendang, lalu ngasuh penampak pagi terebak dalam ati sida ti lurus.

Nuan meh, amat bendar, ti Mentas, ti Pengampun.

#12647
- `Abdu'l-Bahá

 

O Petara, Petara aku! Bantu ulih Nuan bala pengasuh ti dikarap Nuan ngembuan ati ti rindu sereta siru. Tulung sida ngerembaika, ba semua menua di bumi, penampak lalau ti datai ari Raban ti tinggi. Amat bendar, Nuan ti Kering, ti Bekuasa, ti Tegap, ti Ngalah Semua, ti Seruran Meri. Amat bendar, Nuan ti Mentas, ti Lembut, ti Siru, ti Pemadu Pemisi.

#12648
- `Abdu'l-Bahá

 

Diambi ari Papan Tulis Pelen Petara

O Nuan Petara ti nadai banding! O Nuan Tuhan ke

Perintah- Petara! Bala semengat tu soldadu serega Nuan. Bantu sida ngena raban Malikat ti Pemadu Tinggi, asuh sida menang, ngambika tiap iku sida tau nyadi baka seraban bala soldadu lalu ngalahka semua menua tu ngena pengerindu Petara enggau panchar ajar Petara.

O Petara! Uji Nuan nyadi penyukung sida enggau penulung sida, lalu ba menua puang, ba bukit, ba lebak, ba kampung, ba emperan enggau ba tasik, awakka Nuan nyadika pengandal sida ngambika tau manjung ngena kuasa Perintah Petara sereta ngena seput Roh Kudus!

Amat bendar, Nuan ti Bekuasa, ti Tegap sereta Pemadu Bisa, lalu Nuan ti Pintar, ti Ninga sereta Meda.

#12649
- `Abdu'l-Bahá

 

Barang sapa ti ngejangka menua diri bejalai ngajar ngagai dini-dini tempat, uji iya besampi siang enggau malam sambiang tu lebuh ti bejalai di menua bukai:

O Petara, Petara aku! Nuan meda aku chukup gaga lalu tetarit ngagai perintah Nuan ti bemulia, ditungkun ngena api pengerindu Nuan ba raban mensia, pengerandang jalai ke perintah Nuan ba menua ti besai sereta luas tu, ngelengkaka diri ari semua utai semina Nuan, bepanggai ba Nuan, ninggalka penyamai enggau pengelantang, jauh ari menua asal aku, siku ti sesegau bejalai ba menua tu, temuai ti tetingkap ba tanah tu, ngemaruhka diri ba Pemetung Nuan ti tinggi, nundukka diri ngagai serega mulia Nuan ti pemadu bisa, minta enggau naka pemaruh ati ngagai Nuan ba pemetang malam tu enggau maya teberingkas tawas, nyapa sereta nunggah Nuan maya pagi enggau lemai ngambika enggau pengasih mantu aku gawaka Pengawa Nuan, ngerembai jauh ke Ajar Nuan lalu ngangkatka Leka Jaku Nuan di selampur Timur enggau Barat.

O Tuhan! Keringka belakang aku, asuh aku ulih gawaka Nuan enggau naka pemendar, lalu anang ninggalka aku enggau diri empu, kediri-diri sereta nadai daya ba menua tu.

O Tuhan! Kemendarka aku berandau enggau Nuan lebuh aku ti kediri, lalu nyadika kaling aku ba menua ti jauh.

Amat bendar, Nuan meh ti Pengentap ke sebarang sapa ti dikedeka Nuan ba utai ti dikingin Nuan, lalu, amat bendar, Nuan ti Pemadu Bekuasa, ti Pemadu Bisa.

#12650
- `Abdu'l-Bahá

 

Uji barang sapa ti deka bejalai ngajar ngagai tempat bukai, bacha enggau silik sambiang tu baika nya ba bukit, ba padang pasir, ba tanah enggau ba tasik:

O Petara! O Petara! Nuan meda pengelemi, pemaruh enggau basa aku nunga utai tempa Nuan; taja pia, aku udah arap bendar ke Nuan lalu angkat ngerembaika ajar Nuan ba bala pengasuh nuan ti kering, bepanggai ba kuasa enggau penegap Nuan.

O Tuhan! Aku tu burung ti patah sayap lalu ingin deka terebai ngagai ruang serega Nuan ti nadai sekat. Bakani aku ulih ngereja tu enti enda nengah penabat enggau pengasih Nuan, pengentap enggau bantu Nuan.

O Tuhan! Sinu meh ke pengelemi aku, lalu keringka aku ngena kuasa Nuan. O Tuhan! Sinu meh ke pengelembut aku, lalu bantu aku ngena penegap enggau kuasa-perintah Nuan.

O Tuhan! Enti seput Roh Kudus ngentapka utai tempa ti pemadu lemi, iya deka bulih semua utai ti dikingin iya lalu deka ngempu nama-nama utai ti dikedeka iya. Ke bendar, Nuan udah kala mantu bala pengasuh Nuan dulu suba lalu, taja pen sida nya utai tempa ti pemadu lemi, ti nadai bedaya ba bala pengasuh Nuan enggau ti nadai benama ba dunya tu, ari pemendar enggau penguat Nuan dia sida udah nyulut ngelui ari orang ti pemadu bemulia ba mensia Nuan enggau orang ti pemadu dipebasa ba semua mensia. Taja dulu suba sida baka indu buyah, tang diatu sida nyau nyadi raja menaul, taja dulu suba sida nya baka anak sungai, sida nyau baka tasik, ketegal ari pemeri enggau pengasih Nuan. Nengah bantu Nuan ti pemadu besai, sida udah nyadi, bintang ti manchar ari bingkai-langit pengelalau, burung ti belagu ba kebun bunga ros ti idup belama, singa ti negung ba kampung penemu enggau pemintar, enggau ikan paus ti nyemerai ba tasik pengidup.

Amat bendar, Nuan meh ti Penyayau, ti Bekuasa, ti Tegap, lalu ti Pemadu Pengasih ari ti bepengasih.

#12651
- `Abdu'l-Bahá

 

O Petara, Petara aku! Nuan meda bakani pemetang ngeleti udah mungkur semua tempat, bakani semua menua udah ditunu enggau api penyarut, lalu api perang enggau bebunuh udah demurung di selampur Timur enggau Barat. Darah anyut, bangkai betegaring sebelah tanah, lalu pala ti dipumpung udah labuh ba debu menalan perang.

O Tuhan! Sinu meh ke bala ti lansang tu lalu perening sida ngena mata pengasih enggau pengampun. Padamka api tu, ngambika mua-hari ti tebal tu ti udah ngelindung bingkai-langit tau pambar, lalu Matahari Pengamat manchar ngena perenching pemaik, pemetang ti tebal tu tau dikebu lalu penerang api pemaik tau mancharka penampak ia ba semua menua.

O Tuhan! Batak ke atas mensia ari buntut tasik begedi enggau bemunsuh, lalu lepaska sida ari pemetang ti tegap endar tu. Gempung ati sida, lalu terangka mata sida ngena penampak pemaik enggau begulai baru. Lepaska sida ari penalam perang enggau bebunuh, lalu lepaska sida ari pemetang penyaru. Buai tirai ti ngelindung mata sida, lalu terangka ati sida ngena api pengelalau. Intu sida ngena penyiru pengasih enggau penelap Nuan, lalu anang ngukum sida nitihka pengelurus enggau pengeringat Nuan ti tau ngasuh kaki jari sida ti kering begegar.

O Tuhan! Perang udah lama nyadi. Penusah enggau pengerawan udah betambah besai lalu tiap bengkah menua ti kaya nyau tebunsa ngapa.

O Tuhan! Ati nyau berat, lalu bala semengat nyau tusah. Beri pengasih ba bala semengat ti merinsa tu lalu anang neju sida nitihka pengamu pengingin sida empu.

O Tuhan! Asuh pegari semengat ti ngembuan pemaruh ati sereta penaluk ba tanah Nuan, mua sida diterang ngena perenching lalau, diingkas ari dunya, ngemesaika nama Nuan, nyebut puji Nuan, lalu ngerekaika pemanis rengut pengudus Nuan ngagai mensia.

O Tuhan! Keringka belakang sida, tegapka punggung sida, lalu beri pengaga ti chukup ngagai ati sida ngena tanda pengerindu Nuan ti pemadu tegap.

O Tuhan! Amat bendar, sida tu lembut, lalu Nuan meh Kering sereta Tegap; sida nadai daya, lalu Nuan meh ke Penulung sereta ke Pengasih sida.

O Tuhan! Tasik ti deka belaban benung ngalun, lalu umbak ia enda deka ngetu ngapa semadi meh nengah pengasih Nuan ti nadai sekat ti udah nyerangkap semua menua.

O Tuhan! Amat bendar, mensia diatu dalam buntut pengingin, lalu nadai utai bukai ulih nyelamatka sida kelimpah ari bantu Nuan ti nadai nemu abis.

O Tuhan! Kesaika pemetang pengingin ati ti jai, lalu terangka ati ngena lampu pengerindu Nuan ke alai nengah ia semua menua deka enda lama agi diterangka. Entapka, ke lebih agi, bala ti dikerindu Nuan, sida ke, ninggalka menua diri, ruang bilik sida enggau bala anak sida, udah, ketegal pengerinduka Pemajik Nuan, pegi ngagai menua bukai deka ngerekaika pemanis rengut Nuan lalu ngerembaika ajar Nuan. Uji Nuan nyadi kaling sida maya sida kediri, nyadi penulung ke sida ba menua ti nyelai, pemuai penusah ati sida, pengaum sida maya dalam pemedis. Uji Nuan nyadi ai irup ngemantupka pengaus sida, lalu nyadi ubat ti nyumanka penyakit sida lalu nyadi minyak ke pengeran ati sida ti benung mau.

Amat bendar, Nuan meh Pemadu Nelap, Tuhan ti mantu nadai besekat, lalu, amat bendar, Nuan meh ti Penyinu sereta Pengasih.

#12652
- `Abdu'l-Bahá

 

Leka sampi entudi tu patut dibacha bala pengajar enggau bala pangan ninting hari:

O Nuan Tuhan ti penelap! Puji meh ngagai Nuan laban

Nuan udah nunjukka kami arus besai ke pengiring, udah muka pintu perintah Petara lalu ngayanka Nuan Empu nengah Matahari Pengamat. Ngagai orang ti buta Nuan udah ngasuh sida meda; ngagai orang ti bengal Nuan udah ngasuh sida ninga; Nuan udah ngidupka sida ti mati; Nuan udah ngayaka sida ti seranta; Nuan udah nunjukka jalai ngagai sida ti tesat; Nuan udah nguluka sida ti rangkai rekung ngagai tengkeching ai pengiring; Nuan udah ngelakka ikan ti aus datai ngagai tasik pengamat; lalu Nuan udah ngelaluka bala burung ti sesegau ngagai kebun bungai ros pengasih.

O Nuan ti Pemadu Tegap! Kami tu bala pengasuh Nuan enggau bala Nuan ti merinsa; kami tu jauh lalu inginka penatai Nuan, endang auska ai tengkeching Nuan, endang sakit, lalu lelengauka penyuman Nuan. Kami endang bejalai nengah menasan Nuan lalu nadai juluk tauka pengandal bukai kelimpah ari ngerembaika rengut pemanis Nuan, ngambika semua semengat tau nyaguka sada: “O Petara, iring kami nuju menasan ti lurus.” Asuh mata sida tebuka meda penampak, lalu asuh sida dilepas ari pemetang pengelansang. Asuh sida begelumu ngelingi lampu iring Nuan. Asuh sida ti nadai bagi nerima ungkup sida. Asuh sida ti dikemelu nyadi kaling entelah Nuan.

O ti Pemadu Tegap! Peda kami enggau perening pengasih. Beri kami pengentap serega. Sikap ba kami seput Roh Kudus, ngambika kami tau dibantu dalam gawaka Nuan lalu, baka bintang ti beperenching, manchar ngena penampak iring Nuan ba semua bengkah menua.

Amat bendar, Nuan meh ti Bekuasa, ti Tegap, ti

Pintar sereta Meda.

#12653
- `Abdu'l-Bahá

 

Genap iku semengat ti bejalai nengah nengeri, tumpuk enggau genturung pendiau ba menua tu lalu kiruh ngerekaika bau rengut Petara, patut nguna sambiang tu tiap pagi

O Petara aku! O Petara Aku! Nuan meda aku diau dalam pemaruh enggau pengelemah aku, kiruh ngereja pengawa ti pemadu besai, mutus ati deka ngemesaika Leka Jaku Nuan ngagai mensia mayuh sereta ngerembaika ajar Nuan ngagai mensia Nuan. Bakani aku ulih mujur enti enda ketegal Nuan ti mantu aku ngena seput Roh Kudus, nulung aku ngulihka pemenang nengah raban malikat perintah Nuan ti bemulia, lalu manjah ngagai aku penetap Nuan, ti tau nukar kerengit nyadi menaul, ai setitik nyadi sungai enggau tasik, lalu sigi atom nyadi penampak enggau matahari? O Tuhan aku! Bantu aku ngena penguat pemenang enggau pengasi Nuan, ngambika dilah aku tau nyebut semua puji enggau penau Nuan ba semua mensia lalu semengat aku melumpa laban ai anggur pengerindu enggau penemu Nuan.

Nuan meh ti Pemadu Bisa lalu Ngereja utai ti dikedeka Nuan!

#12654
- `Abdu'l-Bahá

 

Awakka sida ti ngerembaika bau rengut Petara nyebut sambiang tu tiap pagi.

O Tuhan, Petara aku! Puji sereta terima kasih ngagai

Nuan laban Nuan udah ngiring aku nuju jalai perintah Nuan, ngasuh aku bejalai ba menasan ti lurus sereta jauh tu, terangka mata aku merening panchar penampak Nuan, tungaka pending aku ngadap lagu burung pengudus ari dunya penyelai lalu tarit ati aku ngena pengerindu Nuan ngagai semua sida ti lurus.

O Tuhan! Entapka aku ngena Roh Kudus, awakka aku ulih ngangau dalam Nama Nuan ba semua menua, lalu nyadung berita pengaga penatai dunya Nuan ba mensia mayuh.

O Tuhan! Aku tu lemah, keringka aku ngena kuasa enggau penguat Nuan. Dilah Aku begetar, asuh aku nyebut pengingat enggau puji Nuan. Aku tu baruh, beri basa ke aku nengah penerima aku ke dalam perintah Nuan. Aku tu jauh amat, asuh aku datai semak ngagai pemetung pengasih Nuan. O Tuhan! Gaga aku nyadi lampu ti terang, nyadi bintang ti beperenching enggau kayu ti diberekat, diyas ngena buah, lalu dan ia ngayung semua tempat tu.

Amat bendar, Nuan ti Tegap, ti Bekuasa sereta ti Nadai Penekul.

#12655
- `Abdu'l-Bahá

 

O Petara! O Petara! Tu siku burung ti patah sayap lalu penerebai iya kelalu lubah—tulung iya awakka iya ulih terebai ngagai tuchung pemansang enggau penyelamat, terebaika iya enggau naka pengaga sereta pengelantang dalam langit ti luas , nyariska pelandai iya dalam Nama Nuan ti Pemadu Tinggi ba selampur menua, kelantangka pending enggau kangau tu lalu terangka mata merening tanda pengiring.

O Tuhan, aku siku aja, kediri sereta baruh. Aku nadai penyukung semina Nuan, nadai penulung kelimpah ari Nuan lalu nadai pengenan kelimpah ari Nuan. Tetapka aku dalam pengawa Nuan, tulung aku enggau raban malikat Nuan, asuh aku menang dalam pengawa ngerembaika Leka Jaku Nuan lalu guna aku bejakuka pengelandik Nuan ngagai bala nembiak Nuan. Amat bendar, Nuan endang penulung orang ti lemah enggau penyaga sida ti biak, lalu amat bendar, Nuan ti Bekuasa, ti Tegap, sereta ti Nadai Penekul.

#12656
- `Abdu'l-Bahá

 

Puji meh ngagai Nuan, O Petara aku! Tu bala pengasuh

Nuan ti udah ditarit ulih rengut pengasih Nuan, lalu ditungkun ngena api ti mau ba kayu Nuan ti Siku, lalu mata sida tebelenang meda bebendang penampak ti manchar ari Sinai penyatu Nuan.

O Tuhan! Telipika dilah sida nyebut Nuan ngagai bala nembiak Nuan, lalu asuh sida bejakuka puji Nuan nengah pementas enggau pengasih pengerindu Nuan. Saup sida ngena raban Malikat Nuan, keringka punggung sida gawaka Nuan, lalu gaga sida nyadika tanda lalau Nuan ba bala utai tempa Nuan.

Amat bendar, Nuan meh Pemadu Bekuasa, ti Pemadu Bemulia, ti Seruran Ngampun, ti Pemadu Kasih.

#12657
- `Abdu'l-Bahá

 

Bala ti ngerembaika rengut Petara patut nyampika sambiang tu tetiap pagi.

O Petara, Petara aku! Nuan meda iya ke lemah tu minta enggau naka pemendar ke pengering serega, iya ti merinsa tu tetenguk bendar deka ke pengaya serega Nuan, iya ti aus tu ingin bendar ke tengkeching ai pengidup ti meruan, iya ti diperinsa tu deka amat ke penyuman ti disemaya Nuan nengah pengasih Nuan ti nadai sekat ti endang udah diungkup Nuan ke bala pengasuh ti udah dipilih Nuan dalam perintah Nuan ti tinggi.

O Tuhan, aku nadai penulung semina Nuan, nadai pengelindung kelimpah ari Nuan, lalu nadai pengenan bukai tang Nuan. Bantu aku ngena raban malikat Nuan ngerekaika rengut pengudus Nuan lalu ngerembaika jauh ajar Nuan ngagai bala ti udah dipilih Nuan.

O Tuhan aku! Asuh aku ngingkas diri ari semua utai kelimpah ari Nuan, bepegai rat ba rambu pemeri Nuan, chukup talukka Pengarap Nuan, meruan teguh sereta tegap dalam pengerindu Nuan lalu nitihka nama ti udah ditulis Nuan dalam Bup Nuan.

Amat bendar, Nuan meh ti Bekuasa, ti Tegap, ti Pemadu Bisa.

#12658
- `Abdu'l-Bahá

 

NGINGKAS DIRI

Dikemulia meh Nuan, O Petara aku! Aku beterima kasih ngagai Nuan laban Nuan udah ngasuh aku tetemuka Iya Siku ti Terebak-tawas pengasih Nuan, enggau Palan Penurun berekat Nuan, enggau Tibang ke Pengawa Nuan. Aku minta bebendar ngagai Nuan ngena Nama Nuan, nengah nya mua sida ke semak ngagai Nuan udah bebali puchat, lalu ati sida ti angkunka Nuan udah ngebuka penerebai sida nuju Nuan, ngemendarka aku, ba sebarang maya enggau sebarang gaya, tau bepegai ba rambu Nuan, lalu buai semua tanggam ba orang bukai kelimpah ari Nuan, lalu tanka perening aku dituju ngadap bingkailangit Revelasyen Nuan, lalu tau ngereja pengawa ti udah diagih Nuan ngagai aku dalam Papan Tulis Nuan.

Ngepanka, O Tuhan aku, pengidup dalam enggau luar aku ngena kelambi pengasih Nuan enggau pengerindu-penelap Nuan. Udah nya, ibun aku likun, ari sebarang utai ti enda manah ba mua Nuan, lalu enggau pengasih bantu aku enggau kaban belayan aku ngasika Nuan, lalu nyeliahka semua utai ti tau ngerak sebarang pengingin sitan tauka penyai di dalam aku.

Nuan, endang amat, Tuhan ke semua bansa mensia, lalu Pengempu dunya tu enggau ke siti nyin. Nadai Petara bukai tang Nuan, ti Nemu Semua, ti Pemadu Pintar.

#12659
- Bahá'u'lláh

 

Dipuji meh nama Nuan, O Petara aku! Aku minta Nuan ngena rengut Kelambi berekat Nuan ti nitihka pinta Nuan sereta senutuk enggau pengingin Nuan udah dikerembaika ba selampur utai tempa, lalu ngena Bintang-siang peneka Nuan ti udah manchar enggau terang, nengah kuasa penegap Nuan enggau kuasa-raja Nuan, ari atas bingkai-langit pengasih Nuan, ngendas lengis ari ati aku semua pengelebu ngapa enggau igau sengapa, awakka enggau naka penyayau aku tau nguing ngadap Nuan, O Nuan Tuhan ke semua mensia!

Aku tu pengasuh Nuan enggau anak pengasuh Nuan, O Petara aku! Aku udah bepegai rat ba ulu berekat Nuan, lalu bepagut ba rambu penyiru pengasih Nuan. Letakka aku utai ti manah ke bisi ba Nuan, lalu tupi aku ari Mija ti udah dikirum Nuan ke baruh ari mua-hari pemisi Nuan enggau serega pengasih Nuan.

Nuan, dalam pemendar pengamat, meh Tuhan ke semua dunya, sereta Petara ke semua ke diau dalam serega enggau semua ke diau dalam bumi.

#12660
- Bahá'u'lláh

 

O Tuhan! Ngagai Nuan aku ngiga pengenduh lalu ngagai semua tanda Nuan aku nungaka ati aku.

O Tuhan! Sekalika benung bejalai tauka ba rumah, sekalika dalam pengawa aku tauka dalam kereja aku, aku nyerahka semua pengandal ati aku ba Nuan.

Beri aku bantu Nuan ti chukup awakka tau ngati kediri, ari semua utai. O Nuan ti bepengasih ngelui ari semua!

Sikap ba aku ungkup aku, O Tuhan, nitihka peneka Nuan, lalu asuh aku tepantup ati ba utai ti udah diletak Nuan ke aku.

Nuan ti bekuasa penuh meri jaku-tangkan.

#12661
- The Báb

 

Dalam Nama Tuhan nuan, ti Penempa, ti Kuasa-raja, ti

Semua-Penyukup, ti Pemadu Tinggi, tulung Iya Siku dipinta ulih semua mensia.

Sebut: O Petara aku! O Nuan Siku ti Pengaga semua serega enggau bumi, O Tuhan Perintah Petara! Nuan nemu bendar semua utai ke dilalai ba ati aku, tang Pengidup Nuan endang enda ditemu semua kelimpah ari Nuan Empu. Nuan meda semua utai ke bisi ba aku, nadai orang bukai ulih ngereja tu kelimpah ari Nuan. Tetapka ngagai aku, nengah pengasih Nuan, utai ke tau ngasuh aku ngelengkaka semua utai semina Nuan, lalu taga ngagai aku utai ti ngasuh aku enda bepanggai ba semua orang bukai kelimpah ari Nuan. Kemendarka aku tau bulih penguntung pengidup aku ba dunya tu enggau ti deka datai. Buka ba mua aku semua pintu berekat Nuan, lalu enggau pengasih chirika ba aku penyiru pengasih enggau pemeri Nuan.

O Nuan Siku ti Tuhan ke pemayuh pengasih! Asuh bantu serega Nuan ngelingi sida ti rinduka Nuan, lalu sikap ba kami tepa enggau berekat ti dikembuan Nuan. Asuh Nuan chukup ke kami ba semua utai, ampun dosa kami lalu bisi penyinu ke kami. Nuan meh Tuhan kami enggau Tuhan ke semua utai tempa. Nadai orang bukai dikangau kami tang Nuan, lalu nadai utai bukai dipinta kami tang pengasih Nuan. Nuan meh Tuhan ke pemisi enggau berekat, nadai ulih laban dalam kuasa Nuan sereta pemadu landik dalam turai kereja Nuan. Nadai Petara bukai tang Nuan, ti Bempu Semua, ti Pemadu Tinggi.

Chirika berekat Nuan, O Tuhan aku, ba bala Seruan, ba bala orang ti kudus enggau ti rentang. Amat bendar, Nuan meh Petara, ti nadai ulih Banding, ti Pemejal Semua.

#12662
- The Báb

 

Sebut: Petara chukup ba semua utai ngelui ari semua utai, lalu nadai utai dalam semua serega tauka di bumi tang Petara meh chukup. Amat bendar, Iya ba Iya empu, ti Nemu, ti Ngenan, ti Pemadu Bisa.

#12663
- The Báb

 

O Petara, Petara aku! Nuan meh Pengandal aku enggau

Siku-dikerindu aku, tuchung Juluk ati enggau Pengingin aku! Enggau naka pemaruh ati sereta penuh pengangkun aku besampi ngagai Nuan awakka ngaga aku nyadi legit pengerindu Nuan ba tanah Nuan, lampu penemu Nuan ba semua utai tempa Nuan, enggau tambai pemeri kudus Nuan dalam perintah Nuan.

Sengkaum aku enggau bala pengasuh Nuan ti udah ngingkaska sida empu ari semua utai kelimpah ari Nuan, ti udah nuchi sida empu ari semua utai sementara ba dunya tu, lalu udah ngelepaska sida empu ari semua jaku asut igau sengapa.

Awakka ati aku penuh laban pengaga nengah roh penetap ari perintah Nuan, lalu terangka mata aku meda raban bantu pengudus ke nurun betunda udi ngagai aku ari perintah mulia Nuan ti pemadu bisa.

Nuan meh, dalam pengamat, ti Pemadu Tegap, ti Pemadu Bemulia, ti Pemadu Bekuasa.

#12664
- `Abdu'l-Bahá

 

PAGI

O Petara aku enggau Tuan aku! Aku tu pengasuh Nuan lalu anak pengasuh Nuan. Aku udah angkat ari padung peninduk aku pagi tu lebuh maya Bintang- Siang penyatu Nuan manchar ari Terebak-tawas peneka Nuan, lalu udah mancharka penampak ia di selampur dunya tu, nitihka ti udah diletak dalam Bup Letak-Tangkan Nuan.

Puji meh Nuan, O Petara aku, laban kami udah angkat ngagai penampak panchar penemu Nuan. Nya alai, turun ngagai kami, O Tuhan aku, utai ti tau dikena kami ngelengka diri ari sebarang orang kelimpah ari Nuan, lalu ngelepaska kami ari semua tanggam tang semina Nuan. Nambahka nya, tulis ba aku, enggau ba sida ti dikerindu aku, sereta ba kaban belayan aku, bela sebaka ba indu enggau lelaki, pemanah ba dunya tu enggau dunya ti deka datai. Nangkan nya, enggau likun ibun kami, ngena jaga Nuan ti meruan, O Nuan ti Dikerindu semua utai tempa enggau ti Dikingin selampur dunya, ari sida ti udah diasuh Nuan ngayanka Telai Sitan ke betelai ngagai ati mensia. Bekuasa meh Nuan ngereja peneka Nuan. Nuan amat bendar ti Chukup Tegap, Penulung lebuh Tusah, Pengibun Diri.

Berekat ulih Nuan, O Tuhan Petara aku, Iya Ti udah ditaga Nuan mangku gelar Nuan ti pemadu manah, lalu nengah Iya Nuan udah nyerara antara pengudus enggau penyai, lalu enggau pengasih bantu kami ngereja utai ti dikerindu, sereta dikedeka Nuan. Nambahka nya, berekat ulih Nuan, O Petara aku, sida ke nyadi Jaku Nuan enggau Urup Nuan, enggau sida ti udah nungaka mua sida ngadap Nuan, lalu ningaka kangau Nuan.

Nuan, amat bendar, Tuhan enggau Raja ke semua mensia, sereta bekuasa atas semua utai.

#12665
- Bahá'u'lláh

 

Aku udah dani dalam ibun Nuan, O Petara aku, lalu nyadi iya ti ngiga pengelindung deka diau dalam Pengibun jaga Nuan enggau Kuta penyaga Nuan. Terangka pengidup dalam aku, O Tuhan aku, enggau bebendang Terebak-tawas Revelasyen Nuan, baka Nuan ti udah meri penampak ke pengidup luar aku enggau panchar pagi ari pengasih Nuan.

#12666
- Bahá'u'lláh

 

Aku udah angkat pagi tu ngena pengasih Nuan, O Petara aku, lalu ninggalka rumah aku bepanggai penuh ba Nuan, sereta nyerahka diri ngagai intu Nuan. Udah nya, kirum ke baruh, ngagai aku, ari serega penyinu Nuan, berekat ari Nuan, lalu ulih ngasuh aku pulai ke rumah enggau likun baka Nuan ti udah ngasuh aku bekejang di baruh jaga Nuan lalu runding aku ditanggam teguh ba Nuan.

Nadai Petara bukai tang Nuan, ti Siku, ti Nadai Banding, ti Nemu Semua, ti Pemadu Pintar.

#12667
- Bahá'u'lláh

 

PEMANSANG SEMENGAT

Tempa dalam aku ati ti tuchi, O Petara aku, lalu kemaruka pengasai ti jenuh dalam ati aku, O Pengandal aku! Nengah kuasa roh entapka aku ulih Nuan dalam Pengawa Nuan, O Siku Pemadu Dikerindu aku, lalu ngena penampak mulia Nuan pandangka ngagai aku jalai Nuan, O Nuan Juluk pengingin aku! Nengah kuasa pengering Nuan ti enda dipeda angkatka aku ngagai serega pengudus Nuan, O Pun Penatai pengidup aku, lalu ngena puput ribut Nuan ti meruan belama asuh aku andal, O Nuan ti sigi Petara aku! Asuh lagu Nuan ti tan belama enseputka penyenang dalam ati aku, O Pangan aku, lalu asuh pengaya rampa-mua Nuan ti jeman ngelepaska aku ari semua kelimpah ari Nuan, O Tuan aku, lalu asuh berita revelasyen Ayu Nuan ti tulin mai pengaga ke aku, O Nuan ti pemadu pegari ari semua ti pegari lalu ti pemadu dipelalai ari semua ti dilalai!

#12668
- Bahá'u'lláh

 

O Tuhan aku! Gaga pemajik Nuan nyadika pemakai aku, lalu penatai Nuan nyadika ai irup aku, lalu penyamai Nuan nyadika pengandal aku, lalu puji ke Nuan nyadika kereja aku, lalu pengingat ke Nuan nyadika pangan aku, enggau kuasa-raja Nuan nyadika pengesah aku, lalu endur pengenduh Nuan nyadika rumah aku, lalu tempat pendiau aku nyadika penuduk ti udah disuchi Nuan ari semua sekat ke diletak ba sida ti ditutup baka ti ngena tirai ari Nuan.

Nuan meh, amat bendar, ti Pemadu Tegap, ti Pemadu Mulia, ti Pemadu Bekuasa.

#12669
- Bahá'u'lláh

 

O Petara aku, Petara ke pemisi enggau penyinu! Nuan nya meh Raja ke alai jaku-perintah Iya semua utai tempa udah diberi pengidup; lalu Nuan nya meh Siku ti Pemadu Pemisi ke alai kereja bala pengasuh Iya udah enda kala nekul Iya ari ti mandangka pengasih Iya, nadai mega sida kala muntanka pengayan pemisi Iya.

Sukung pengasuh tu, aku minta Nuan, bulih utai ti nyadika penyelamat iya ba tetiap dunya dalam semua dunya Nuan. Nuan meh, amat bendar, ti Pemadu Tegap, ti Pemadu Bekuasa, ti Nemu Semua, ti Pemadu Pintar

#12670
- Bahá'u'lláh

 

57 O Petara aku! O Petara aku! Tu, pengasuh Nuan, udah mansang nuju Nuan, keran sesegau dalam padang pasir pengerindu Nuan, bejalai nengah menasan servis Nuan, nyadangka pengasih Nuan, ngarapka pemeri Nuan, bepanggai ba perintah Nuan, lalu mabuk laban ai anggur tepa Nuan. O Petara aku! Tambahka pengangat penyayau iya ke Nuan, penerit puji iya ke Nuan, enggau penalam pengerindu iya ke Nuan.

Amat bendar, Nuan meh Pemadu Mentas, Tuhan berekat nadai pengabis.

Nadai Petara bukai tang Nuan, ti Pengampun, ti

Pengasih.

#12671
- `Abdu'l-Bahá

 

O Tuhan! Kami tu lemah; keringka kami. O Petara!

Kami tu lansang; asuh kami nemu. O Tuhan! Kami tu seranta; asuh kami kaya. O Petara! Kami tu mati; idupka kami. O Tuhan! Kami empu endang dikemalu; muliaka kami dalam Perintah Nuan. Enti Nuan nulung kami, O Tuhan, kami deka nyadi baka bintang ti bekebelik. Enti Nuan enda nulung kami, kami deka baruh ari tanah. O Tuhan! Keringka kami. O Petara! Chirika pemenang ba kami. O Petara! Asuh kami munggur diri sereta ngalahka pengingin. O Tuhan! Lepaska kami ari tanchang dunya material tu. O Tuhan! Idupka kami ngena seput Roh Kudus ngambika kami tau angkat gawa ke Nuan, angkun nyembah Nuan lalu nganjakka diri empu dalam Perintah Nuan enggau pengabis penunggang ati. O Tuhan, Nuan ti Bekuasa! O Petara, Nuan ti pengampun! O Tuhan, Nuan ti penyinu!

#12672
- `Abdu'l-Bahá

 

O Tuhan aku! O Tuhan aku! Tu siti lampu ti diidup ngena api pengerindu Nuan lalu nyeru ngena api ti ditungkun ba kayu penyinu Nuan. O Tuhan aku! Tambahka pemau, pengangat enggau daun api, ngena api ti dituchul ba Sinai Pengayan Nuan. Amat bendar, Nuan ti Penetap, ti Penulung, ti Bekuasa, ti Mentas, ti Rindu.

#12673
- `Abdu'l-Bahá

 

PEMENANG KE PENGAWA PETARA

Mulia meh ke Nuan, O Tuhan Petara aku! Pegarika sungai penegap kuasa-raja Nuan, awakka ai Penyerakup Nuan tau anyut nengah penalam realiti semua utai, ke alai tambai lalau Nuan ti enda puntan tau ditegi tinggi dalam perintah jaku-tangkan Nuan lalu bintang bebendang pengudus Nuan tau tampak manchar di serega kuasa-perintah Nuan.

Bekuasa meh Nuan ngereja utai ti dikedeka Nuan. Nuan, amat bendar, meh Penulung lebuh Tusah, Pengibun

Diri.

#12680
- Bahá'u'lláh

 

Anang nagang aku, O Petara, Petara aku, ari serega pemisi Nuan enggau bintang-siang bantu Nuan. Aku minta kasih Nuan ngena Leka Jaku nya ti udah ngalahka semua utai ti dipeda enggau ti enda dipeda ngambi mantu aku lalu mantu sida ke dipilih Nuan bulih utai ti deka ngangkatka Pengawa Nuan ba bala pengasuh Nuan enggau ba semua menua Nuan. Nya alai, uji Nuan ngeletakka aku, tiap utai manah ti udah diturun Nuan ke baruh dalam Bup Nuan.

Amat bendar Nuan ti Pemadu Tegap, ti Meruan Pengampun, ti Pemadu Mentas.

#12681
- Bahá'u'lláh

 

O Tuhan! Bekal ke penyampat pemansang Kayu

Penyerakup Suchi Nuan; udah nya panjah ia, O Tuhan, ngena arus ai penyamai pemanah Nuan, lalu asuh ia, ba mua revelasyen penetap suchi Nuan, awakka bebuah nitih ke peneka Nuan dikena ngemulia enggau ngeninggika Nuan, muji sereta beterima kasih ngagai Nuan, lalu ngemesaika Nama Nuan, nerantangka penyatu Ayu Nuan lalu meri sembah ngagai Nuan, laban semua tu dalam genggam Nuan lalu nadai ba bukai.

Besai meh berekat enggi sida ke ngempu darah ti dipilih Nuan ke dikena manjah Kayu penetap Nuan, lalu ari nya ngeninggika Leka Jaku Kudus Nuan ti enda ulih diubah.

#12682
- The Báb

 

Iya meh Petara!

O Tuhan, Petara aku, ti Amat-Dikerindu aku! Tu bala pengasuh Nuan ti udah ninga Nyawa Nuan, udah mending Leka Jaku Nuan lalu udah nyaut Kangau Nuan. Sida udah arapka Nuan, udah meda pemanah-penyelai Nuan, nerima penerang Nuan sereta besaksika tanda pengamat Nuan. Sida udah nengah jalai Nuan, nitihka lalau Nuan, tetemuka misteri Nuan, meretika entelah dalam Bup Nuan, genteran jaku ari skrol Nuan, enggau berita ari Papan Turai enggau Papan Tulis Nuan. Sida udah bepagut ba rambu gari Nuan lalu bepegai tegut ba kelambi penampak enggau bebendang Nuan. Singkang kaki sida udah dikeringka dalam Sempekat Nuan lalu ati sida udah ditegapka ba Penyanggup Nuan. Tuhan! Uji Nuan nungkun ba ati sida api penarit suchi Nuan lalu ari nya kemendarka burung pengerindu enggau pemereti awakka tau menyanyi dalam ati sida. Kemendar awakka sida tau baka tanda ti bisa, tikas ti perenching, sereta nemban baka Leka Jaku Nuan. Diangkatka ulih sida Pengawa Nuan, ngerembaika tambai Nuan lalu merita jauh pemanah penyelai Nuan. Dikereja ulih sida pemenang Leka Jaku Nuan, lalu keringka punggung sida ti dikerindu Nuan. Telipika dilah sida nerantangka Nama Nuan, lalu peransang sida ngereja peneka kudus enggau penyamai Nuan. Terangka mua sida dalam Perintah kudus Nuan, lalu gaga naka pemetul pengaga sida awakka mantu sida angkat ke pemenang Pengawa Nuan.

Tuhan! Kami tu lemah, keringka kami ngerekaika rengut Pengudus Nuan: umang, asuh kami kaya ari pesaka Suchi Penyerakup Nuan: telanjai, ngepan kami ngena kelambi pemisi Nuan; bedosa, ampun penyalah kami ngena berekat Nuan, pengasih Nuan enggau tembang Nuan. Nuan sigi, amat bendar, ti Pemantu, ti Penulung, ti Pengasih, ti Tegap, ti Bekuasa.

Mulia ke semua mulia tetap enggi sida ti tegap sereta teguh.

#12683
- `Abdu'l-Bahá

 

PENEGAP

Aku ngemesaika Nama Nuan, O Petara aku, lalu meri terima kasih ngagai Nuan, O Pengingin aku, laban Nuan udah bebendar ngasuh aku ulih meda enggau terang Menasan lurus Nuan, udah muka ba mata aku Terantang Tebangkar Nuan lalu udah mantu aku netapka mua aku nuju Terebak-tawas Revelasyen Nuan enggau Pun panchur Pengawa Nuan, lebuh maya bala pengasuh Nuan enggau mensia Nuan udah limpang ari Nuan. Aku minta Nuan, O Tuhan ke Perintah ti meruan belama, nengah encherik munyi Pen ti Mulia, lalu nengah Pemau Api ti udah inggar ngangau ari Kayu galak, lalu nengah Bandung ti sigi dipilih Nuan ke orang Bahá, ngemendarka aku tau meruan tegap dalam pengerindu aku ke Nuan, amat tepantup ati enggau nama utai ti udah ditulis Nuan ke aku dalam Bup Nuan lalu tau bediri teguh dalam servis Nuan enggau dalam servis ke bala ti dikerindu Nuan. Udah nya enggau pengasih bantu bala pengasuh Nuan, O Petara aku, ngereja utai ti deka ngangkatka Pengawa Nuan lalu ulih ngasuh sida ngereja nama utai ti udah dipegari Nuan dalam Bup Nuan.

Amat bendar Nuan meh Tuhan ke Pengering, Nuan meh bisa ngeletakka nama utai ti dikedeka Nuan lalu dalam genggam Nuan, Nuan megai tali ngemudi semua utai tempa. Nadai Petara bukai tang Nuan, ti Pemadu Bekuasa, ti Nemu Semua, ti Pemadu Pintar.

#12684
- Bahá'u'lláh

 

Dipuji sereta dimuliaka meh Nuan, O Petara!

Kemendar awakka hari ke alai bulih penatai kudus Nuan tau jampat datai. Kelantangka ati kami nengah pemisa pengerindu enggau pemanah-penyamai Nuan, lalu sikap ba kami penegap ngambika kami tau rindu ensurukka diri ngagai Peneka Nuan enggau Tangkan Nuan. Amat bendar, penemu Nuan nyerangkung semua utai ti udah ditempa tauka deka ditempa Nuan, lalu penegap serega Nuan ngelui semua utai ti udah diberi Nuan pengidup tauka deka diberi pengidup. Nadai utai bukai disembah tang Nuan, nadai utai bukai dikingin semina Nuan, nadai utai bukai disayau kelimpah ari Nuan lalu nadai utai deka dikerindu tang pemanah-penyamai Nuan.

Amat bendar, Nuan meh Raja pemadu bekuasa, Pengamat Kuasa-raja, Penulung lebuh Tusah, Pengibun

Diri.

#12685
- The Báb

 

O Tuhan, Petara aku! Tulung bala ti dikerindu Nuan nyadi teguh dalam Pengarap Nuan, bejalai nengah arus Nuan, nyadi tegap ba Pengawa Nuan. Beri sida penelap Nuan awakka tan diserang diri empu enggau pengingin, awakka nitih lampu Iring Petara. Nuan ti Kering, ti Nelap, ti Pengibun Diri, ti Penyikap, ti Penyinu, ti Pemadu Tegap, ti Pemadu Pemisi.

#12686
- `Abdu'l-Bahá

 

PENGAMPUN

Lebuh orang ti bedosa nemu diri empu diingkas lengis sereta lepas ari semua utai kelimpah ari Petara, iya patut minta ampun enggau tembang ari Iya. Madahka dosa enggau penyalah diri ngagai mensia bukai endang enda dikemendar, laban utai ti baka nya nadai sereta enda deka pulai ke pemanah ampun suchi. Tambah mega madahka penyalah baka nya ba mua mensia semina ngemalu sereta ngemaruhka diri, lalu Petara—tinggi meh mulia Iya—enggai ke bala pengasuh Iya dikemalu. Amat bendar Iya meh ti Penyinu, ti Pengasih. Orang ti bedosa patut, antara iya empu enggau Petara, minta enggau pemaruh ati ari Tasik pengasih, minta ampun ari Serega pementas lalu nyebut:

O Petara, Petara aku! Aku minta enggau pemaruh ati ari

Nuan ngena darah bala sulu Nuan ti chukup tetarit laban pemanis sada Nuan ke alai sida beguai ngagai Legit ti Mulia, tempat genselan ti pemadu bemulia, lalu aku minta ngagai Nuan ngena misteri ti dikembuan dalam penemu Nuan lalu ngena mutiara ti disimpan dalam tasik pemisi Nuan ngambika meri ampun ngagai aku lalu pia mega ngagai apai aku enggau indai aku. Ari semua sida ti mandangka pengasih, Nuan meh amat bendar ti Pemadu Bepengasih. Nadai Petara bukai tang Nuan, ti Meruan Pengampun, ti Pemadu Pemisi.

O Tuhan! Nuan meda ayu ti bedosa tu nguing ngagai tasik pengasih Nuan lalu iya siku ti lemi tu ngiga perintah kuasa pengudus Nuan lalu siku ti miskin tu nyundungka diri nuju bintang- siang pengaya Nuan. Nengah pengasih Nuan enggau berekat Nuan, anang ngasa iya, O Tuhan, anang mega nyekat iya ari revelasyen pemisi Nuan maya hari Nuan, anang mega ngiyar iya ari pintu Nuan ti udah besai dibuka Nuan ngagai semua ti diau dalam serega Nuan enggau ba bumi Nuan.

Akairai! Akairai! Dosa aku udah ngempang aku mansang semak nuju Balai pengudus Nuan lalu penyalah aku udah mai aku tesat jauh ari Panggau kuasa-perintah Nuan. Aku udah ngereja utai ti ditagang Nuan lalu udah ngelengka tangkan ti diasuh Nuan titih aku.

Aku minta Nuan nengah Iya Siku ti raja Tuhan ke semua Nama nulis ke aku ngena Pen pemisi Nuan ngambika tau ngasuh aku tebatak semak ngagai Nuan lalu meresi aku ari penyalah aku ti udah nyelapat aku ari ampun Nuan enggau tembang Nuan.

Amat bendar, Nuan meh ti Bisa, ti Pemisi. Nadai Petara bukai tang Nuan, ti Tegap, ti Pengasih.

#12687
- Bahá'u'lláh

 

Puji meh ke Nuan, O Tuhan. Ampun dosa kami, bisi penyinu meh ke kami lalu asuh kami ulih pulai ngagai Nuan. Anang ngasuh kami bepanggai ba utai bukai kelimpah ari Nuan, lalu beri ngagai kami, ngena pemisi Nuan, utai ti dikerindu enggau dikingin Nuan sereta patut ba Nuan. Tinggika pangkat sida ti amat arap, lalu ampun sida ngena pengasih pengampun Nuan. Amat bendar, Nuan meh Penulung lebuh Tusah, Pengibun Diri.

#12688
- The Báb

 

O Petara aku, O Tuhan aku, O Tuan aku! Aku minta

Nuan ngampun aku laban ngiga penyamai bukai kelimpah ari pengerindu Nuan, tauka penyenang bukai kelimpah ari penyemak Nuan, tauka pengaga bukai kelimpah ari pemanah-penyamai Nuan, tauka pengidup bukai kelimpah ari ti berandau enggau Nuan.

#12689
- The Báb

 

O Nuan Tuhan ti Pengampun! Nuan meh pengelindung ke semua pengasuh Nuan tu. Nuan nemu semua entelah sereta ngelala semua utai. Semua kami tu lemah, lalu Nuan meh ti Tegap, ti Pemadu Bisa. Semua kami tu bedosa, lalu Nuan meh Pengampun dosa, ti Pengasih, ti Penyinu. O Tuhan! Anang meda semua penimpang kami. Intu kami nitihka pengasih enggau pemeri Nuan. Penimpang kami endang mayuh, tang tasik pengampun Nuan nadai sekat. Pengelemi kami balat, tang tanda saup enggau bantu Nuan endang nyengala. Nya alai, tetap sereta keringka kami. Asuh kami ulih ngereja utai ti lumau ba Pemetung Nuan ti kudus. Terangka ati kami, beri kami mata ti jelik enggau pending ti lansik. Idupka iya ti mati lalu sumanka iya ti sakit. Sikap pengaya ba iya ti seranta lalu beri pemaik enggau pengelikun ngagai iya ti takut. Terima kami dalam perintah Nuan lalu terangka kami ngena panchar pengiring. Nuan meh Bekuasa sereta Pemadu Bisa. Nuan meh ti Mentas. Nuan meh ti

Penyayau. Nuan meh ti Nelap.

#12690
- `Abdu'l-Bahá

 

PENGERAI

79 O Petara, Petara aku! Aku minta ari Nuan nengah tasik pengerai Nuan, lalu nengah penampak Bintang- Siang Berekat Pengasih Nuan, lalu nengah Nama Nuan ke alai Nuan udah nguasa bala pengasuh Nuan, lalu nengah kuasa ti tau ngerekaika Jaku Nuan ti pemadu tinggi enggau penguat Pen Nuan ti pemadu dipebasa, lalu nengah pengasih Nuan ti udah ngelui semua utai tempa ti dalam serega enggau ba tanah, awakka nuchi aku ngena ai penyayau Nuan ari tiap pemedis enggau penyakit, lalu ari semua pengelemah enggau pengelembut.

Nuan meda, O Tuhan aku, iya ti nyembah Nuan nganti ba pintu penyayau Nuan, enggau iya ti udah nanam pengandal ati iya ba Nuan, betanggam ba tali penelap Nuan. Anang ngelebuka iya, aku minta enggau pengambis ati ari Nuan, utai ti digiga iya ari tasik Berekat Pengasih Nuan enggau Bintang- Siang ke pengerindu pementas Nuan.

Bekuasa meh Nuan ngereja utai ti ngasuh Nuan lantang. Nadai Petara bukai semina Nuan, ti Meruan Pengampun, ti Pemadu Nelap.

#12691
- Bahá'u'lláh

 

Nama Nuan nyadika pengerai aku, O Petara aku, lalu pengingat Nuan nyadika ubat aku. Penyemak ngagai Nuan nyadika pengandal aku, sereta pengerindu ke Nuan nyadika pangan aku. Pengasih Nuan ngagai aku nyadika pengerai aku enggau penulung aku dalam kedua- dua dunya tu enggau dunya ti deka datai. Nuan, amat bendar, ti Pemadu Pemisi, ti Nemu Semua, ti Pemadu Pintar.

#12692
- Bahá'u'lláh

 

Ke Anakmit

Nuan endang Iya, O Petara aku, ti bempu Nama ke ulih nyuman sereta mulaika pengerai iya ti sakit, lalu iya ti aus diberi ngirup, lalu iya ti merampau nyadi lantang; lalu iya ti limpang diiring, lalu iya ti dikemaruh nyadi tinggi, lalu iya ti seranta diberi pengaya, lalu iya ti lansang bulih pemandai, lalu iya ti lindung nyadi terang, lalu iya ti tusah bulih pengaga, lalu iya ti chelap diberi pengangat, lalu iya ti diindik diangkat. Ngena nama Nuan, O Petara aku, semua utai tempa nyadi regas, lalu serega dikerembai, lalu dunya didudukka lalu mua-hari niki sereta ujan diasuh labuh ngagai tanah. Tu, amat bendar, nyadi ke tanda penelap Nuan ngagai semua utai tempa Nuan.

Nya alai, aku minta enggau pemaruh ati ngagai Nuan, ngena nama Nuan ke alai Nuan udah ngayanka

Kuasa- Petara ba Nuan, lalu udah nyungkakka Pengawa Nuan ti tinggi ari semua utai tempa, lalu ngena genap iti gelar Nuan ti pemadu lati enggau penau Nuan ti pemadu tinggi, lalu ngena semua pemanah ke alai Pengidup Nuan empu ti tinggi sereta pemadu dipuji, kirum ke baruh malam tu ujan pengerai Nuan ari mua-hari pengasih Nuan ngagai anakmit tu, ke udah dikaul Nuan enggau Nuan empu ti penuh penampak dalam perintah utai tempa Nuan. Udah nya, ngepan iya, O Petara aku, nengah penyinu Nuan, ngena kelambi pengelantang pengidup enggau pengerai, lalu jaga iya, O Siku dikerindu aku, ari semua penyakit enggau pemedis, lalu ari semua utai ti enda dikerindu Nuan. Penegap Nuan, amat bendar, setipak enggau semua utai. Nuan, amat bendar, meh Pemadu Bekuasa, Penulung Diri. Nambah ke nya, kirum ke baruh ngagai aku, O Petara aku, pemanah dunya tu enggau dunya ti deka datai, sereta pemanah peturun ti dulu enggau peturun jemah ila. Penegap Nuan enggau pemintar Nuan, amat bendar, setipak enggau tu.

#12693
- Bahá'u'lláh

 

Sambiang Pengerai ti Panjai

Iya meh ti Pengubat, ti Penyukup, ti Pemantu, ti Pemadu

Pengampun, ti Pemadu Pengasih.

Aku minta ngagai Nuan O Siku ti Tinggi, O Siku ti Taluk, O Siku ti Bemulia! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Kuasa-raja, O Pengangkat, O Akim! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Nadai tanding, O Nuan ti Nadai pemati, O Siku ti Kediri! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Pemadu Dipuji, O Siku ti Kudus, O Siku ti Penulung! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Nemu Semua, O Siku ti Pemadu Pintar, O Siku ti Pemadu Tebangkar! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Penyayau, O Siku ti Memelan, O Siku ti Pengeletak! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Dikerindu, O Siku ti Diasi, O Siku ti Penyamai! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Pemadu Tegap, O Siku ti Pengenan, O Siku ti Bisa! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Merintah, O Siku ti Pengibun Diri, O Siku ti Nemu Semua! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Roh, O Penampak, O Siku ti Pemadu Pegari! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan ti Digusung ulih semua, O Nuan ti Dikelala ulih semua, O Nuan ti Dipelalai ari semua! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Dipelam, O Siku ti Menang, O Siku ti Penyikap! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Penegap, O Siku ti Ngesah, O Siku ti Dipelam! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Penukuh, O Pemuas, O Penyabut! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Pengangkat, O Siku ti Pengelumu, O Nuan ti Bemulia! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Nadai-penimpang, O Siku ti Nadai Dikungkung, O Siku ti Pemisi! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Penyaup, O Siku ti Matak, O Siku ti Nempa! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Pemadu Memelan, O Siku ti Bajik, O Siku ti Pemisi! Nuan meh ti Penyukup, Nuan ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Lurus, O Siku ti Beberekat, O Siku ti Nelap! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pemejal Semua, O Siku ti Meruan Belama, O Siku ti Nemu Semua! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Naka Pemanah, O Hari Jeman, O Siku ti Mentas! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Chukup Jaga, O Tuhan ke Pengaga, O Siku ti Dikingin! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan ti Nelap enggau semua, O Nuan ti Sinu enggau semua, O Siku ti Pemadu Penyiru! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pengenduh ke semua, O Pengelindung ke semua, O Siku ti Penyaga Semua! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan Pengesah semua, O Nuan ti Dikangau semua, O Siku ti Ngidup! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pemerunsai,

O Pemunggur, O Siku ti Pemadu Penyayau! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan Semengat aku, O Nuan Dikerindu aku, O Nuan Pengandal aku! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pemantup Aus aku, O Tuhan ti Ngelui, O Siku ti Pemadu Berega! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pengingat ti Tebangkar, O Nama ti Pemadu Mulia, O Jalai ti Pemadu Jeman! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pemadu Dipuji, O Pemadu Kudus, O Siku ti Suchi! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pemuka, O Pengelalau, O Penyadung! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pangan, O Lutur Pengubat, O Siku ti Penarit! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Mulia, O Pemajik, O Siku ti Kayaraja! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O ti Pemadu Dipechaya, O Sulu ti Pemadu Manah, O Tuhan ke Dinihari! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Penungkun, O Penerang, O Pemai Pengaga! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Tuhan ke Pengaya, O ti Pemadu Sinu, O Siku ti Pemadu Mentas! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Siku ti Seruran, O Siku ti Meri Pengidup, O Pun-penatai Semua Pengidup! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan ti Ulih Ngerembus Semua Utai, O Petara ti Meda Semua, O Tuhan ke Sada Nyawa! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Pegari taja Dipelalai,

O Enda dipeda taja Jelai Rita, O Pengelila ti digiga semua! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

Aku minta ngagai Nuan O Nuan ti Pemumpung bala Sulu, O Petara ti Pengasih sida ti jai! Nuan meh ti Penyukup, Nuan meh ti Ngerai, Nuan meh ti Meruan, O Nuan Siku ti Meruan!

O Penyukup, Aku minta ngagai Nuan, O Penyukup!

O Nuan ti Ngerai, Aku minta ngagai Nuan, O Nuan ti Ngerai!

O Pemeruan, Aku minta ngagai Nuan, O Pemeruan!

Nuan endang Meruan Belama, O Nuan Siku ti

Meruan!

Suchi meh Nuan, O Petara aku! Aku minta enggau pengambis ati ngagai penelap Nuan, ke alai pintu pemisi Nuan enggau pengasih Nuan udah tebuka besai, ke alai Rumah Sembah Pengudus Nuan udah didiri ba atas maligai ti meruan belama; lalu enggau penyinu Nuan ke alai Nuan udah manggil semua utai tempa Nuan ngagai mija pengeraja enggau pemeri Nuan; lalu enggau berekat Nuan ke alai Nuan udah nyaut, enggau Diri Nuan Empu ngena leka jaku Nuan “Ya” ngarika semua ke diau di serega enggau ba bumi, ba maya perintah Nuan enggau bendang Tubuh Nuan nyengala dipegari, maya dinihari lebuh kuasa perintah Nuan udah diasuh ayan. Lalu agi mega aku minta enggau pengambis ati ngagai Nuan, ngena semua nama ti pemadu bajik tu, ngena semua penau pemadu mulia sereta memelan tu, lalu ngena Pengingat Nuan ti Pemadu Tinggi, lalu ngena Pemajik

Nuan ti tulin sereta nadai pechik pengamah, lalu enggau Panchar Nuan ti dipelalai dalam astaka ti pemadu dipelalai, lalu ngena Nama Nuan, bekelambi ngena gari pemedis tiap pagi enggau tiap lemai, awakka nyaga orang ti mai Papan Tulis ti beberekat tu, enggau sebarang sapa ti nyampika nya, enggau sebarang sapa ti mansa rumah ti bisi nyimpan Papan Tulis tu. Nya alai, sumanka ulih Nuan, ngena nya tiap penyakit, sida ke sakit enggau ti umang, ari tiap-tiap penguji enggau pemedis, ari semua pemerinsa enggau penusah ati ti balat, lalu iring ulih Nuan ngena nya sebarang sapa ti ingin deka nengah menasan lalau Nuan, enggau chara pengampun enggau berekat Nuan.

Nuan amat bendar ti Bekuasa, ti Nyukupka Semua, ti Ngerai, ti Penyaga, ti Pemeri, ti Penyinu, ti Pemadu Nelap, ti Pemadu Pengasih.

#12694
- Bahá'u'lláh

 

PENGUJI ENGGAU PENUSAH

O Nuan ke alai penguji Iya nyadi ubat penyuman ke sida ti semak ngagai Nuan, ke alai pedang Iya nyadi ke niat ti tinggi ke semua sida ti rinduka Nuan, ke alai laja Iya nyadi pengingin ti bendar, ke ati sida ti lelengauka Nuan, ke alai letak-tangkan Iya nyadi ke pugu pengandal ke sida ti udah ngelala pengamat Nuan. Aku minta kasih Nuan, ari pengudus pemanis Nuan lalu ari perenching penampak mua Nuan, awakka ngirum ke baruh ngagai kami ari alai pengetu Nuan ti tinggi utai ti tau ngasuh kami tebatak semak ngagai Nuan. Lalu tanam teguh kaki kami, O Petara aku, dalam Pengawa Nuan lalu rawangka ati kami ngena panchar penemu Nuan, lalu terangka dada kami ngena penerang nama Nuan.

#12695
- Bahá'u'lláh

 

Buai penusah ati aku ngena pemisi Nuan enggau pementas Nuan, O Petara, Petara aku, lalu iyarka pengirau ati aku nengah kuasa- raja Nuan enggau penegap Nuan. Nuan meda aku, O Petara aku, mua aku nunga ngadap Nuan maya penusah ngelulung aku ari tiap piak. Aku minta kasih Nuan, O Nuan Siku Tuhan ke semua pengidup, lalu ngayung semua utai ti dipeda enggau ti enda dipeda, ngena Nama Nuan ke alai Nuan udah ngalahka semua ati enggau semua semengat mensia, lalu ngena kelebung Tasik pengasih Nuan enggau bebendang Bintang- Siang pemeri Nuan, sengkaum aku enggau sida ti nadai utai udah nekul sida nungaka mua sida ngadap Nuan, O Nuan Tuhan semua nama enggau Penempa semua serega!

Nuan meda, O Tuhan aku, utai ti udah nuntung aku dalam maya hari Nuan. Aku enggau pengabis ati minta Nuan, ari Iya Siku ti Terebak-tawas semua nama Nuan enggau Palan Penurun semua penau Nuan, ngeletakka aku utai ti tau ngasuh aku angkat gawaka Nuan sereta muji semua pemanah pengudus Nuan. Nuan, amat bendar, ti Pemadu Tegap, ti Pemadu Bekuasa, ti deka nyaut sambiang semua mensia!

Lalu, ke penudi ia, aku minta tulung Nuan ngena panchar rampa-mua Nuan merekat semua pengawa aku, lalu nebus semua utang aku, sereta ngemuaska semua guna aku. Nuan meh Iya ti bempu kuasa sereta perintah Iya udah diaku tiap dilah, lalu kuasa-perintah Iya enggau kuasa-raja Iya udah diterima tiap ati ti mereti. Nadai Petara bukai tang Nuan, Iya ti ninga lalu besedia nyaut.

#12696
- Bahá'u'lláh

 

Dimuliaka meh Nuan. O Tuhan Petara aku! Tiap iku mensia ti beseling ngaku kuasa-raja Nuan enggau pegai-kuasa Nuan, lalu tiap mata ti lansik ngelala pemesai kuasa-perintah Nuan enggau kuasa pemejal penegap Nuan. Ribut penguji enda ulih nagang sida ti rindu besemak enggau Nuan ari ti ngentapka mua sida ngadap bingkai-langit mulia Nuan. Lalu biau balai penguji tetap enda mujur narit ke bukai sereta ngempang sida ti amat angkun ke peneka Nuan ari ti ngerapat balai Nuan.

Aku mikir, lampu pengerindu Nuan benung mau dalam ati sida, lalu penampak pengeliut Nuan udah ditungkun dalam dada sida. Penusah enda ulih nyelapat sida ari Pengawa Nuan, lalu nasit ti enda disadang enda ulih ngasuh sida lelang ari penyamai Nuan.

Aku minta Nuan, O Petara aku, nengah sida enggau nengah tengkelak sebut ati sida lebuh sida beserara ari Nuan, ngasuh sida likun ari kachau munsuh Nuan, lalu nupi semengat sida ngena utai ti udah diletak ke sida ti dikerindu Nuan lalu sida nadai deka takut sereta sida nadai deka diasuh tusah ati.

#12697
- Bahá'u'lláh

 

85 Aku enggau pengabis ati minta Nuan ngena penegap Nuan, O Petara aku!

Anang ngasuh penusah ngemedis aku maya penguji, lalu lebuh maya nadai pengibuh iring betul semua singkang aku ngena peransang Nuan. Nuan meh Petara, bisa meh Nuan ngereja utai ti dikingin Nuan. Nadai siku ulih ngempang Peneka Nuan tauka nagang Tuju Nuan.

#12698
- The Báb

 

Kati bisi Pemuai pemerinsa bukai kelimpah ari Petara?

Sebut: Puji Petara! Iya ti Petara! Semua pengasuh Iya, lalu semua idup dalam ibun Iya.

#12699
- The Báb

 

PENYAGA

Puji ngagai Nuan, O Tuhan Petara aku! Nuan meda sereta nemu ianya Aku udah ngangauka bala pengasuh Nuan anang nunga ke bukai semina nuju penyikap Nuan, lalu udah nangkan sida awakka nadai berati ke bukai tang utai ti udah ditulis dalam Bup Nuan ti Nyemetak , Bup ti udah dikirum ke baruh nitihka letak-tangkan ti enda ulih dipereti enggau tuju Nuan ti enda ulih diubah.

Aku enda tepansutka leka jaku, O Petara aku, semadi meh aku disagi Nuan, lalu enda ulih mindah semadi meh aku bulih pemendar ari Nuan. Nuan meh, O Petara aku, Siku ti udah meri aku pengidup nengah kuasa penegap Nuan, lalu udah nyikap aku ngena berekat Nuan ngayanka Pengawa Nuan. Ketegal nya aku udah kena penusah balat ke alai dilah aku udah ditagang ari muji Nuan sereta ngemesaika mulia Nuan.

Semua puji ngagai Nuan, O Petara aku, ke semua utai ti udah diletak Nuan ngagai aku nengah letak-tangkan Nuan enggau kuasa-raja Nuan. Aku minta Nuan awakka Nuan nyaga aku enggau sida dalam pengerindu sida ke aku enggau pengerindu kami ke Nuan, lalu deka ngibun kami teguh dalam Pengawa Nuan. Aku besumpah nengah penegap Nuan! O Petara aku! Pemalu pengasuh Nuan deka dilindung baka ke ngena tirai ari Nuan, lalu mulia iya deka ngelala Nuan. Besenyataka kuasa nama Nuan nadai utai ulih ngemediska aku, lalu ngena pengerindu Nuan dalam ati aku semua penusah dalam dunya tu enda ulih ngenakutka aku.

Nya alai, kirum ke baruh, O Tuhan aku, ngagai aku enggau bala ti dikerindu aku utai ti deka nyaga kami ari kachau bala sida ti nyangkal pengamat Nuan lalu enda pechayaka semua tanda Nuan.

Nuan, amat bendar, ti Pemadu Bemulia, ti Pemadu Pemisi

#12700
- Bahá'u'lláh

 

O Petara, Petara aku! Aku udah bekejang ari rumah aku, bepegai teguh ba tali pengerindu Nuan, lalu aku udah nyerahka diri empu penuh ngagai intu Nuan enggau jaga Nuan. Aku minta kasih ngagai Nuan nengah kuasa Nuan ke alai Nuan endang nyaga bala ti dikerindu Nuan ari sida ti limpang enggau tesat, lalu ari semua orang ti ingkar ngelaban, enggau ari semua ti ngereja penyai ti udah jauh lelang ari Nuan, ngambika ngibun aku ngena pengasih Nuan enggau berekat Nuan. Udah nya, kemendarka aku ulih pulai ke rumah aku nengah kuasa Nuan enggau penegap Nuan. Nuan endang, amat, ti Pemadu Tegap, Penulung lebuh Tusah, Pengibun Diri.

#12701
- Bahá'u'lláh

 

Dalam Nama Iya, ti Diangkat, ti Pemadu Tinggi, ti

Memelan!

Dimulia meh Nuan, O Tuhan Petara aku! O Nuan Siku Petara aku, enggau Tuan aku, enggau Tuhan aku, enggau Penyukung aku, enggau Pengandal aku, enggau Pengelindung aku, enggau Penampak aku. Aku minta Nuan, ngena Nama Nuan ti Dilalai enggau ti Dikesayau, ti nadai ditemu orang semina Nuan Empu, nyaga orang ti mai Papan Tulis tu ari tetiap rabat besai enggau penyakit berampit, ari orang ke jai baika lelaki tauka indu; enggau ari penyai ti dikereja orang ti jai, enggau ari kerituk sida ke enda arap. Nambahka nya, impun iya, O Petara aku, ari semua pemedis enggau pengachau, O Nuan Siku ti megai semua perintah ba jari Nuan. Nuan, amat bendar, bekuasa atas semua utai. Nuan ngereja nitihka peneka Nuan, lalu ngeletak nitihka penyamai Nuan.

O Nuan Raja ke Semua Raja! O Nuan Tuhan ti Nelap! O Nuan ti Pun-penatai Pemeri jeman, ke pengasih, ke pementas enggau penyikap! O Nuan Penyuman penyakit! O Nuan ti Penyukup semua guna! O Nuan Penampak ke Penampak! O Nuan Penampak atas semua Penampak! O

Nuan Pengayan ke tetiap Seruan! O Nuan ti Penyinu! O Nuan ti Pengasih! Uji Nuan meri pengasih ke iya ti mai Papan Tulis tu, nengah pengasih Nuan ti nadai tatak, O Nuan ti Bepengasih, Nuan ti Pemisi. Ibun iya, lebih agi, ngena jaga Nuan, ari sebarang utai ti dikeji dalam ati enggau runding iya. Ari semua ke disikap enggau kuasa, Nuan, amat bendar, ti pemadu bekuasa. Mulia Petara diengkah ba nuan, O nuan matahari ti niki! Uji nuan nyadika saksi ke utai ti udah disaksi Petara ba Iya Empu, ianya nadai Petara bukai kelimpah ari Iya, ti Pemadu Tegap, ti Pemadu Dikerindu.

#12702
- Bahá'u'lláh

 

Letak ke aku, O Tuhan aku, enggau ke sida ti arapka

Nuan utai ti diaku manah ke kami dalam jangka Nuan, baka ke udah diletak dalam Indu Bup, laban dalam genggam jari Nuan, Nuan megai penyukat tatak ke semua utai.

Pemanah tepa Nuan endang enda ngetu dipanjah ba sida ti tetengukka pengerindu Nuan, lalu pemadas kelai serega pemeri Nuan endang chukup disikap ngagai sida ti ngelala pengudus Penyerakup Nuan. Kami nyerah ngagai intu Nuan sebarang utai ti udah ditaga Nuan ke kami, lalu minta Nuan meri ke kami semua pemanah ti diserangkung penemu Nuan.

Jaga aku, O Tuhan aku, ari semua penyai ti dikelala semua-penemu Nuan, laban nadai kuasa tauka pengering tang ba Nuan, nadai pemenang deka datai kelimpah ari penatai Nuan, lalu Nuan aja ti meri jaku-tangkan. Nama utai ti udah dikedeka Petara endang udah nyadi, lalu utai ti enda dikedeka Iya enda deka nyadi.

Sigi nadai kuasa tauka pengering semina dalam Petara, ti Pemadu Tinggi, ti Pemadu Tegap

#12703
- The Báb

 

O Petara! O Petara aku! Terabai bala pengasuh ti dikarap

Nuan ari semua penyai diri enggau pengingin, jaga sida ngena mata pengelansik pengerindu- penelap Nuan ari semua pengeringat, dengki enggau kepapas, lindung sida dalam pengebal kuta ibun Nuan lalu selamat ari laja pengakang, asuh sida nyadi pengayan semua tanda mulia Nuan, terangka mua sida ngena perenching panchar ti nurun ari Terebak-tawas suchi penyerakup Nuan, kelantangka ati sida ngena genteran ti dipegari ari perintah kudus Nuan, keringka punggung sida ngena semua ayun kuasa perintah Nuan ti datai ari dunya mulia Nuan. Nuan meh ti Pemadu Pemisi, ti Penyaga, ti Pemadu Tegap, ti Mentas!

#12704
- `Abdu'l-Bahá

 

O Tuhan aku! Nuan nemu mensia udah dikelulung pemedis enggau rabat besai lalu dibalut penusah enggau pengachau. Tiap penguji nyerang mensia lalu tiap penanggul ti balat nyambar iya baka serang naga. Nadai pengelindung enggau pengenduh bukai ke iya kelimpah ari di baruh sayap penyaga, pengenan, pengibun enggau impun Nuan.

O Nuan Siku ti Pengasih! O Tuhan aku! Asuh penyaga Nuan nyadi gagung kebal aku, pengenan Nuan nyadi terabai aku, pemaruh ati ba mua pintu penyatu Nuan nyadi pengibun aku, lalu pengimpun enggau pengetan Nuan nyadi kuta aku enggau palan aku. Tagang aku ari runding diri enggau pengingin, lalu ibun aku ari semua penyakit, penguji, pemedis enggau pemerinsa.

Amat bendar, Nuan meh ti Penyaga, ti Pengibun, ti Pengenan, ti Penyukup, lalu amat bendar, Nuan meh ti Pengasih ke Pemadu Kasih.

#12705
- `Abdu'l-Bahá

 

PENYANGGA PENUSAH

Lebuh pengayan penusah dunya ti enda disadang ingat ulih nuan penegap enggau peninggi kuasa-raja Tuhan nuan, Iya ti ninga sereta meda semua, lalu sebut “Perintah enggi Petara, Tuhan ke semua utai ti dipeda enggau ti enda dipeda, Tuhan ke semua utai tempa.”

— Kitáb-i-Aqdas

O Petara aku! Aku minta Nuan, ngena Nama Nuan ti pemadu bemulia mantu aku ba utai ti tau ngasuh pekara bala pengasuh Nuan mujur, lalu nengeri Nuan maju. Nuan, endang, ngembuan kuasa atas semua utai!

#12706
- Bahá'u'lláh

 

PENYAUP

Petara aku, Siku Disayau aku, Raja aku, Dikingin aku!

Nama dilah ti ulih dikena aku muji Nuan? Aku udah nadai-ibuh, tang Nuan udah ngerak aku. Aku udah melakangka Nuan, tang Nuan udah enggau pengasih mantu aku nguing ngadap Nuan. Aku baka orang ti mati, tang Nuan udah ngidupka aku ngena ai pengidup. Aku udah layu, tang Nuan udah ngeledaka aku ngena sungai serega sampi Nuan ti anyut ari Pen ti Pemadu Pengasih.

O Penabat Kudus! Semua pengidup nyadi ketegal pemeri Nuan; anang ngemelu iya ari ai pementas Nuan, anang mega Nuan nagang iya ari tasik pengasih Nuan. Aku minta Nuan nulung sereta mantu aku ba sebarang maya enggau sebarang gaya, lalu ngiga pengasih jeman ari serega berekat Nuan. Nuan endang amat, Tuhan ti pemeri, sereta Raja ba perintah ti meruan.

#12707
- Bahá'u'lláh

 

O Petara aku, Tuhan aku enggau Tuan aku! Aku udah ngingkas diri ari kaban-belayan aku lalu ngiga nengah Nuan awakka ulih ngati kediri ari semua ti nguan dunya lalu meruan besedia deka nerima utai ti dipuji ba mua Nuan. Sikap ba aku pemanah awakka ngasuh aku ngati kediri ari semua utai bukai kelimpah ari Nuan, lalu beri aku ungkup ti chukup ari pengasih Nuan ti nadai tatak. Amat bendar, Nuan meh Tuhan ke penuh pengasih.

#12708
- The Báb

 

Dipuji meh Nama Nuan, O Tuhan Petara kami! Nuan endang dalam pengamat Pengelala semua utai ti enda dipeda. Letak ba kami semua pemanah baka ke ulih disukat penemu Nuan ti mungkur semua. Nuan meh

Tuhan kuasa-raja, ti Pemadu Tegap, Siku Amat

Dikerindu.

Semua puji meh ngagai Nuan, O Tuhan! Kami deka ngiga berekat Nuan ba Hari ke udah ditetap lalu deka ngengkahka semua pengandal kami ba Nuan, Siku Tuhan kami. Dimuliaka meh Nuan, O Petara! Beri kami utai ti manah sereta patut awakka kami tau ngiyarka semua utai semina Nuan. Amat bendar, Nuan meh Tuhan ke semua dunya.

O Petara! Upah sida ke udah enggau pengeliat ngetatka diri ba semua hari Nuan, lalu keringka ati sida bejalai enda limpang dalam menasan Pengamat. Udah nya kemendarka, O Tuhan, tepa ti memanah ke tau ngasuh sida ulih masuk ngagai pengaga Serega Nuan. Dikeninggi meh Nuan, O Tuhan Petara. Awakka berekat pengudus nurun ngagai rumah ke diwan sida ke udah arapka Nuan. Amat bendar, nadai banding meh Nuan dalam ngirum ke baruh berekat kudus. Anjung, O Petara, bala malikat ke ulih meri pemenang ngagai pengasuh Nuan ti taluk. Nuan udah nukuh semua utai tempa nengah kuasa pengeletak

Nuan nitihka peneka Nuan. Nuan dalam pengamat ti Kuasa-raja, ti Penempa, ti Pemadu Pintar.

Sebut: Petara endang amat Pengaga semua utai. Iya meri bekal ti mayuh ngagai sebarang sapa dikedeka Iya. Iya meh ti Penempa, ti Pun-penatai semua pengidup, ti Penukuh, ti Pemadu Tegap, ti Pengaga, ti Pemadu Pintar. Iya meh ke Bempu pangkat ti pemadu lati ba selampur semua di serega enggau bumi enggau sebarang utai ke bisi ba antara nya. Semua ngereja nitihka pinta Iya, lalu semua ke diau dalam bumi enggau langit ngerami puji Iya, lalu ngagai Iya semua kitai deka pulai.

#12709
- The Báb

 

Tuhan! Sinu amat kami, kemendarka pengasih Nuan ba kami; seranta, sikap ba kami sebagi ari tasik pengaya Nuan; suntuk, uji Nuan ngemuaska kami; dikemaruh, beri kami mulia Nuan. Bala burung di langit enggau bala jelu di tanah nerima pemakai sida tiap hari ari Nuan, lalu semua utai idup bulih intu enggau pengerindu-penelap Nuan.

Anang ngemelu iya ti lemi tu ari pemanah berekat Nuan lalu tetapka nengah penegap Nuan ngagai semengat ti nadai daya tu pemeri Nuan.

Beri kami pemakai kami ninting hari, lalu kemendarka tambah pemeri Nuan ke guna pengidup, ngambika kami enda bepanggai ba utai bukai tang Nuan, tau berandau penuh enggau Nuan, tau bejalai nengah semua jalai Nuan lalu madahka semua misteri Nuan.

Nuan meh ti Pemadu Tegap sereta Bepengerindu enggau Pemekal ke semua mensia.

#12710
- `Abdu'l-Bahá

 

PUJI ENGGAU TERIMA KASIH

Semua puji, O Petara aku, ngagai Nuan ti Pun Penatai semua kuasa-perintah enggau kuasa-raja, ke pemesai enggau basa, ke pemerintah enggau pegai-kuasa, ke peninggi enggau berekat, ke pengerawan enggau kuasa. Sebarang sapa ti dikedeka Nuan, Nuan ngasuh iya tebatak semak ngagai Tasik ti Pemadu Besai, lalu ba sebarang sapa ti dikinginka Nuan, Nuan meri basa ngelala Nama Nuan ti Pemadu Jeman. Ari semua ti di serega enggau ba tanah, nadai siku ulih nagang pejalai Peneka perintah Nuan. Ari semua jeman Nuan merintah semua utai tempa, lalu Nuan deka meruan belama bejalaika pegai- kuasa Nuan atas semua utai tempa. Nadai Petara bukai tang Nuan, ti Pemadu Tegap, ti Pemadu Tinggi, ti Pemadu Bekuasa, ti Pemadu Pintar.

Terangka, O Tuhan, mua bala pengasuh Nuan, awakka sida tau meda Nuan; lalu peresika semua ati sida awakka sida tau mansang ngadap balai pengasih serega Nuan, sereta ngelala Iya ti Pengayan ke Nuan Empu enggau Terebak-tawas Ayu Nuan. Amat bendar, Nuan meh Tuhan ke semua dunya. Nadai Petara bukai tang Nuan, ti Nadai Penekul, ti Nguasa Semua.

#12711
- Bahá'u'lláh

 

SAMBIANG PEMATI

(Semina Sambiang Pemati aja ti nyadi sambiang obligatori Bahá’í ke disebut dalam kongregasyen; ia disebut ulih siku orang ke arap lalu orang bukai bela bediri enda engkeretik. Bahá’u’lláh udah nerangka ianya sambiang tu semina disebut enti orang ke mati nya beumur lebih limabelas taun, ia mesti disebut sebedau tubuh ditanam, lalu tau enda ibuh nungaka mua ngadap Qiblih maya nyebut tu. “Alláh-u-Abhá” disebut sekali; ditangkan enggau genteran keterubah ari enam genteran ke disebut sembilanbelas kali. Udah nya sebut “Alláh-u-Abhá” sekali agi, ditangkan enggau genteran kedua, ke disebut sembilanbelas kali, lalu terus diulang baka nya.)

O Petara aku! Tu pengasuh Nuan sereta anak lelaki pengasuh Nuan ti udah arapka Nuan enggau tanda Nuan, lalu nungaka mua iya ngadap Nuan, ngetas diri ari semua kelimpah ari Nuan. Nuan, amat bendar, ari sida ti mandangka pengasih Nuan meh ti pemadu pengasih!

Intu iya, O Nuan ti ngampun dosa mensia sereta ngelamun penyalah sida, nitihka serega pementas Nuan enggau tasik penelap Nuan. Kemendarka iya masuk ke dalam kandang peninggi pengasih Nuan ti dulu ari penyadi dunya enggau serega. Nadai Petara bukai tang Nuan, ti Meruan Pengampun, ti Pemadu Mentas.

Diatu sebut "Alláh-u-Abhá" enam kali, udah nya sebut siti-siti genteran jaku di baruh tu sembilanbelas kali:

Semua kami, amat bendar, nyembah Petara.

Semua kami, amat bendar, meremi ba mua Petara.

Semua kami, amat bendar, angkunka Petara.

Semua kami, amat bendar, meri puji ngagai Petara.

Semua kami, amat bendar, beterima kasih ngagai Petara. Semua kami, amat bendar, liat ati dalam Petara.

(Enti iya ke mati nya indu, sebut tu: Tu pengasuh indu Nuan sereta anak indu pengasuh Nuan, etb…)

#12674
- Bahá'u'lláh

 

Sambiang bukai ke Orang ti udah Mati

Mulia meh Nuan, O Tuhan Petara aku! Anang ngemaruhka iya ti udah dipuji Nuan ngena penguat pegai- kuasa Nuan ti meruan, lalu anang ngiar ari Nuan iya ti diasuh Nuan masuk ngagai panggau pemeruan Nuan. Kati deka Nuan muai, O Petara aku, iya ti udah dilindung Nuan ngena Pegai-Perintah Nuan, sereta deka Nuan ngasuh melakangka Nuan, O Niat ati aku, iya ke udah ngenduh ba Nuan? Ulih Nuan ngenyaika iya ti udah diangkatka Nuan, tauka enda ingat ke iya ti diasuh Nuan ngingatka Nuan?

Dikemulia, chukup dikemulia meh Nuan! Nuan meh Iya ke ari jeman kelia udah nyadi Raja selampur utai tempa enggau Pugu Pemun ia, lalu Nuan deka mengkang meruan nyadi Tuhan ke semua utai tempa sereta ke Pengeletak sida. dikemulia meh Nuan, O Petara aku! Enti Nuan enda kasih ngagai bala pengasuh Nuan, sapa, meh, deka mandangka pengasih ngagai sida; lalu enti Nuan enggai nulung bala ti dikerindu Nuan sapa meh ulih nulung sida?

Dimulia, nadai sekat meh Nuan dimulia! Nuan dipebasa dalam pengamat Nuan, lalu Nuan meh, amat bendar, ti disembah semua kami; lalu Nuan meh pegari dalam pengelurus Nuan, lalu ba Nuan kami semua, amat bendar, besaksi. Nuan meh, ti bendar, dikerindu dalam penelap Nuan. Nadai Petara bukai tang Nuan, Penulung lebuh Tusah, Pengibun Diri.

#12675
- Bahá'u'lláh

 

Iya meh Petara, tinggi meh Iya, Tuhan ke pengerindu pengasih enggau pemisi!

Mulia meh ngagai Nuan, O Petara aku, Nuan, Tuhan ti Pemadu Bisa. Aku besaksi ngagai pemisa Nuan enggau penegap Nuan, kuasa-raja Nuan enggau pengerindu pengasih Nuan, berekat Nuan enggau kuasa Nuan, penyatu Pengidup Nuan enggau penyerakup Ayu Nuan, pengudus enggau peninggi Nuan ari atas dunya pengidup enggau semua utai ke dalam nya.

O Petara aku! Nuan meda aku diingkas ari semua kelimpah ari Nuan, bepegai teguh ba Nuan lalu nunga ngagai tasik pemisi Nuan, ngagai serega pengasih Nuan, ngagai Bintang-Siang berekat Nuan.

Tuhan! Aku bempu saksi ianya ba pengasuh Nuan, Nuan udah nyimpan Pengandal Nuan, lalu ia endang Roh ke dikena Nuan meri pengidup ngagai dunya.

Aku minta Nuan, nengah bebendang Serayung Revelasyen Nuan, enggau pengasih terima ari iya utai ke udah ulih iya ba hari Nuan. Udah nya kemendar ngambi iya tau disikap enggau penampak pemanah-penyamai Nuan lalu diyas enggau penerima Nuan.

O Tuhan aku! Aku empu enggau semua utai tempa besaksi ke penegap Nuan, lalu aku besampi ngagai Nuan anang ngelimpangka ari Nuan Empu roh tu ke udah niki nuju Nuan, nuju tempat pengudus Nuan, peninggi Serega Nuan enggau pengenduh semak Nuan, O Nuan Tuhan ke semua mensia!

Udah nya, kemendarka, O Petara aku, awakka pengasuh Nuan tau begulai enggau bala ti dipilih Nuan, bala malikat Nuan enggau bala Pengantar Pesan Nuan ba tempat kudus ke enda ulih dicherita ngena pen sereta nadai dilah ulih ngading.

O Tuhan aku, iya ti umang amat bendar udah berumban nuju Perintah pengaya Nuan, temuai nuju rumah iya di dalam kandang Nuan, iya ke chukup aus nuju sungai serega pemisi Nuan. Anang ngemeluka iya, O Tuhan, ari ungkup iya ba bankuet berekat Nuan enggau ari pengasih pemisi Nuan. Nuan meh kebendar ti Pemadu Tegap, ti Bepengasih, ti Pemadu Pemisi.

O Petara aku, Pesaka Nuan udah dipulaika ngagai Nuan. Endang patut berekat Nuan enggau pemisi Nuan ke udah ngerayung perintah Nuan di bumi enggau di serega, diberi ngagai siku ti baru udah diterima Nuan tepa Nuan enggau upah Nuan, enggau buah kayu berekat Nuan! Bekuasa meh Nuan ngereja utai nitihka peneka Nuan, nadai Petara bukai kelimpah ari Nuan, ti Pengasih, ti Pemadu Pemisi, ti Penelap, ti Penyikap, ti Pengampun, ti Pemadu Berega, ti Nemu Semua.

Aku besaksi, O Tuhan aku, ianya Nuan udah ngeletak mensia bebasaka temuai sida, lalu iya ke udah niki nuju Nuan amat bendar udah datai ba Nuan lalu udah tulihka Penatai Nuan. Nya alai intu iya nitihka pengasih enggau pemisi Nuan! Nengah mulia Nuan, aku nemu Nuan tetap enda matak Diri ari utai ke udah diperintah Nuan ngagai bala pengasuh Nuan, enda mega Nuan deka ngemeluka iya ari ti bepaut ba rambu pemisi Nuan lalu udah niki ngagai Terebak-tawas pengaya Nuan.

Nadai Petara bukai tang Nuan, Siku, Kediri, ti Bekuasa, ti Penuh Penemu, ti Pemisi.

#12676
- Bahá'u'lláh

 

O Petara aku! O Petara aku! Amat bendar, pengasuh

Nuan, ngemaruhka diri ba kuasa-perintah peninggi suchi Nuan, ngunduk ba pintu penyatu Nuan, udah arapka Nuan enggau dalam genteran jaku Nuan, udah besaksika leka jaku Nuan, lalu udah ditungkun enggau api pengerindu Nuan, udah diselam ba penalam tasik penemu Nuan, udah tetarit ngagai puput ribut Nuan, udah bepanggai ba Nuan, udah nungaka mua iya nuju Nuan, udah ngenataika sampi iya ngagai Nuan, lalu udah ditetap enggau tembang sereta ampun Nuan. Iya udah ninggalka pengidup dunya tu lalu terebai nuju perintah ti meruan, keran ke pengasih betemu enggau Nuan.

O Tuhan, muliaka pangkat iya, lindung iya di baruh pengenduh peninggi penelap Nuan, asuh iya masuk ngagai serega penampak Nuan, lalu kemanjaika pengidup iya belama dalam kebun ros peninggi Nuan, ngambika iya tau terejun ngagai tasik penampak dalam dunya misteri.

Amat bendar, Nuan meh ti Nelap, ti Bekuasa, ti Pengampun enggau ti Penyikap.

#12677
- `Abdu'l-Bahá

 

O Petara aku! O Nuan pengampun dosa, ti ngenataika pemeri, pemuai semua pemedis!

Amat bendar, aku minta Nuan ngampun dosa sida ti udah ninggalka gari dunya tu lalu udah niki ngagai dunya semengat.

O Tuhan aku! Tuchi sida ari semua penyalah, buai penusah ati sida, lalu tukar pemetang sida ngena penampak. Asuh sida masuk ngagai kebun pengaga, beresi sida ngena ai ti pemadu tulin, lalu kemendarka sida merening bendang-bendang Nuan ba punjung peniki.

#12678
- `Abdu'l-Bahá

 

O Nuan Tuhan ti pengampun!

Taja sekeda semengat masau pengidup sida ketegal pengelansang, lalu nyelapat diri sereta enda ngasika adat, taja pia, enggau sekali alun ari tasik pengampun Nuan, semua sida ke dibalut enggau dosa deka dilepaska. Sebarang sapa ti dikedeka Nuan iya nyadika pengandal Nuan, lalu sebarang sapa ke enda nyadi juluk pilih Nuan iya diaku nyadika pengelanggar adat. Sema Nuan ngintu kami nitihka pengelurus Nuan, semua kami endang nadai penyadi tang orang ti bedosa lalu patut ditutup ari Nuan, tang sema Nuan megai pengasih, tiap iku orang ti bedosa deka digaga nyadi tulin lalu tiap iku temuai nyadi pangan. Nya alai, sikap, pengampun enggau tembang Nuan, lalu kemendarka pengasih Nuan ngagai semua.

Nuan meh ti Pengampun, ti Pemeri Penampak sereta Pemadu Bisa.

#12679
- `Abdu'l-Bahá

 

SEMAK NGAGAI PETARA

Mulia meh Nuan, O Petara aku! Nuan ninga bala sulu

Nuan ti amat keran ke Nuan merampau ketegal beserara ari Nuan, lalu enggau sida ti udah ngelala nuan nyabak ketegal penyauh sida ari penatai Nuan. Buka ulih Nuan ba mua sida, O Tuhan aku, pintu penama berekat Nuan, awakka sida ulih masuk kia ari pemendar Nuan lalu senutuk enggau peneka Nuan, sereta tau bediri ba mua maligai kuasa-perintah Nuan, lalu ulih ninga sada-nyawa Nuan, lalu diterang ngena bebendang penampak mua Nuan.

Kering meh Nuan ngereja utai ti dikedeka Nuan. Nadai siku ulih ngelaban kuasa penegap perintah Nuan. Ari jeman kelia Nuan endang kediri, nadai orang ulih nanding, lalu nyentuk ke jemah ila deka seruran ari atas semua runding enggau semua ading ngenang Nuan. Nya alai, beri pengasih ba bala pengasuh Nuan nengah berekat enggau pemeri Nuan, lalu anang merinsaka sida ditagang ari tebing tasik penyemak Nuan. Enti Nuan ninggalka sida, sapa ke tau nyadika pangan sida; lalu enti Nuan ngelengkaka sida jauh ari Nuan, sapa ke ulih sinuka sida? Sida nadai Tuhan bukai kelimpah ari Nuan, nadai siku dikerindu tang Nuan. Intu sida enggau pementas Nuan nengah pemayuh berekat Nuan.

Nuan, sigi amat, endang Seruran Ngampun, ti Pemadu Penyinu

#12712
- Bahá'u'lláh

 

Amat bendar aku tu pengasuh Nuan, O Petara aku, siku nembiak Nuan ti seranta enggau iya ti minta sereta utai tempa Nuan ti merinsa. Aku udah datai ba pintu penama Nuan, ngiga pengenduh Nuan. Aku nadai tetemuka pemuas tang semina ba pengerindu Nuan, nadai penyenang tang semina ba pengingatka Nuan, nadai pengeransing tang semina ba ngasika Nuan, nadai pengaga tang semina ba penyemak enggau Nuan, lalu nadai pengelantang semadi meh begulai enggau Nuan, enda ngira aku tu nemu ianya semua utai tempa endang diempang ari Ayu Nuan ti memelan lalu semua utai tempa endang enda ulih betemu enggau batang Tubuh Nuan. Tiap kali aku nguji deka ngelawa Nuan, aku ngasaika nadai utai ba aku tang semina tanda pengasih Nuan lalu nadai tepedaka utai bukai ba pengidup aku tang pegari pementas pengerindu Nuan. Bakani siku ke semina utai tempa Nuan ti deka begulai baru enggau Nuan lalu datai betemu enggau Nuan, taja pan nadai utai tempa ulih bekaul enggau Nuan, nadai mega ulih meragamka Nuan? Bakani pengasuh Nuan ti baruh tu ulih ngelala Nuan lalu ngemesaika puji Nuan, taja pan Nuan udah nagaka iya revelasyen dunya Nuan enggau pemanah tanda kuasa-raja Nuan? Nya alai semua utai tempa nyadika saksi ianya ia diempang ari pengenduh penatai Nuan ketegal sekat ti udah ditetapka ngagai penalam realiti ia. Taja pia, endang enda ulih disekang, ianya kuasa penarit Nuan kenyau ari kelia endang dikembuan dalam realiti kerejajari Nuan, taja pen ia ti ngakun ba kot pemeri Nuan endang ngelui ari ke ulih japai semua utai tempa Nuan. Tu nunjukka,

O Petara aku, naka meh pengurang aku deka muji Nuan lalu ngayanka naka pengelemi aku dalam meri terima kasih ngagai Nuan; lalu jauh agi deka ulih ngelala pengudus penyerakup Nuan tauka ulih mujur nyapai tanda puji Nuan, pengelindung Nuan enggau mulia Nuan. Enda, ngena penegap Nuan, Aku enda keran ke utai bukai tang Nuan Empu Aja lalu ngiga nadai orang bukai tang Nuan.

#12713
- The Báb

 

Iya meh ti Penyinu, ti Pemadu Pemisi! O Petara, Petara aku! Nuan meda aku, Nuan nemu aku; Nuan meh Pengenduh aku enggau Penyelamat aku. Nadai siku ti udah digiga aku lalu nadai mega aku deka ngiga kelimpah ari Nuan; nadai menasan udah aku tengah lalu nadai mega menasan bukai deka ditengah aku tang menasan pengerindu Nuan. Ba pemetang malam penesat, mata aku nunga enggau sadang sereta penuh pengandal ngagai pagi pengasih Nuan ti nadai tatak lalu lebuh jam teberingkas tawas semengat aku ti ikak diidup sereta dikeringka dalam pengingat ke pemajik enggau pemetul Nuan. Iya ti dibantu ulih berekat pengasih Nuan, taja pen iya semina setitik, deka nyadi tasik ti luas, lalu indah atom ke mit ti disaup tengkujuh pengerindu-penelap Nuan, deka beperenching baka bintang ti terang.

Lindung di baruh jaga Nuan, O Nuan Roh penulin, Nuan Pemekal ti Pemadu Pemisi, pengasuh Nuan ke udah rindu, sereta udah ditungkun tu. Bantu iya dalam dunya

pengidup tu ngambika mengkang tegap sereta teguh dalam pengerindu Nuan lalu kemendarka burung ti patah sayap tu bulih penyelamat enggau pengelindung dalam tansang pengudus Nuan ti diau ba kayu serega.

#12714
- `Abdu'l-Bahá

 

O Tuhan, Petara aku enggau Pengenduh aku lebuh maya penusah aku! Terabai aku enggau Pengelindung aku lebuh maya aku kena penusah! Pengintu enggau Penyelamat aku lebuh maya suntuk lalu lebuh pengelengau aku nyadi ke Kaban aku! Lebuh maya aku merampau nyadi ke Pengaum aku, lalu lebuh maya aku silu-ilu Nuan nyadi ke Pangan ti rindu! Nuan nyadi ke Pemuai ipuh penusah ati aku sereta Pengampun dosa aku!

Semina ngagai Nuan aku ngadap, minta bebendar ngagai Nuan enggau pengabis ati aku, runding aku enggau dilah aku, nerabai aku ari semua ti nyakal peneka Nuan ba rebak tu, rambau suchi penyerakup Nuan, lalu meresi aku ari semua pengamah ti deka nekul aku ari ngiga ayung kayu berekat Nuan, ti beresi sereta tuchi.

Beri pengasih, O Tuhan, ba sida ti lemah, asuh gerai sida ti sakit, lalu buai pengaus ti balat.

Kelantangka ruang dada ke alai api pengerindu Nuan udah bebara, lalu asuh ia mau ngena api pengerindu enggau roh serega Nuan.

Kelambika panggau suchi penyerakup ngena gagung pengudus, lalu engkah ba pala aku maskuta pengasih Nuan.

Terangka mua aku ngena panchar serayung pemisi Nuan, lalu enggau pengasih saup aku bejalaika pengawa ba pemetung kudus Nuan.

Asuh ati aku melumpa ngena pengerindu ke utai tempa Nuan lalu kemendarka aku awakka tau nyadi ke tanda pengasih Nuan, nyadi ke kelai berekat Nuan, ti ngemansangka penyerakup ba bala ti dikerindu Nuan, angkun ngagai Nuan, menyanyi puji Nuan sereta enda ingat ke diri tang meruan ingat ke enggi Nuan.

O Petara! Petara aku! Anang ngelaungka ari aku puput angin tembang enggau pengasih Nuan, lalu anang ngemelu aku ari telaga bantu enggau pengasih Nuan.

Di baruh ayung sayap penyaga Nuan asuh aku ngenduh, lalu tenggau ba aku perening mata Nuan ti nyaga semua.

Telipika dilah aku muji nama Nuan ba bala rayat Nuan, awakka sada aku tau di dinga ba gempuru besai lalu ari mulut aku tau mansutka panjah puji Nuan.

Nuan, amat bendar, ti Bepengasih, ti Dikemulia, ti Tegap, ti Pemadu Bisa.

#12715
- `Abdu'l-Bahá

 

SERAKUP

O Petara aku! O Petara aku! Gempung ati bala pengasuh

Nuan, lalu pegarika ngagai sida tuju Nuan ti pemadu besai. Asuh sida nitihka jaku tangkan Nuan sereta diau dalam adat Nuan. Tulung sida, O Petara, dalam kereja sida lalu beri sida pengering gawaka Nuan. O Petara! Anang neju sida kediri, tang iring singkang sida ngena penampak penemu Nuan, lalu kelantangka ati sida ngena pengerindu Nuan. Amat bendar, Nuan endang Penulung sida enggau Tuhan sida.

#12716
- Bahá'u'lláh

 

TEGUH DALAM SEMPEKAT

Mulia meh ke Nuan, O Raja ti meruan belama, enggau

Pengaga semua menua, lalu Penukuh genap rangkah tulang! Aku besambiang ngagai Nuan, nengah Nama Nuan ke alai Nuan udah ngangau semua mensia nuju bingkai-langit kuasa-perintah enggau mulia Nuan, lalu udah ngiring bala pengasuh Nuan ngagai balai berekat enggau pengasih Nuan, udah nyengkaum aku enggau sida ti udah ngelepaska diri empu ari semua utai kelimpah ari Nuan, lalu udah berengkah nuju Nuan, lalu enda diempang ulih nasit jai baka ke udah diletak-tangkan Nuan, ari ti nguing nuju semua tepa Nuan.

Aku udah bepegai rat, O Tuhan aku, ba pemegai pemeri Nuan, lalu bepagut tegap ba rambu kelambi pengasih Nuan. Nya alai, kirum ke baruh, ngagai aku, ari mua-hari pementas Nuan, utai ke deka meresi aku ari pengingat ke semua utai bukai semina Nuan, lalu asuh aku ulih nguing ngadap Iya ti nyadika Utai ke disembah semua mensia, nyangkal Iya ti udah diidan pengeruga pemenchi, sida ke udah ngelanggar sempekat Nuan, lalu enda arapka Nuan enggau semua tanda Nuan.

Anang ngasa aku, O Tuhan aku, ari bau rengut ngepan Nuan ba hari Nuan, lalu anang ngemelu aku ari kesuh seput Revelasyen Nuan ba pengayan bebendang panchar mua Nuan. Bekuasa meh Nuan ngereja nama ti ngelantangka Nuan. Nadai utai ulih nyekat peneka Nuan, enda mega deka nyelunganka utai ke udah dituku Nuan ngena kuasa Nuan.

Nadai Petara bukai tang Nuan, ti Pemadu Tegap, ti Pemadu Pintar.

#12717
- Bahá'u'lláh

 

O Tuhan aku enggau Pengandal aku! Tulung bala ti dikerindu Nuan nyadi teguh dalam Sempekat Nuan ti tegap, seruran taluk ngagai Pengawa Nuan ti pegari, lalu ngereja semua jaku tangkan Nuan ti endang ditaga Nuan ke sida dalam Bup Penampak Nuan; awakka sida tau nyadi menira pengiring enggau lampu Raban di atas, telaga ai pemintar Nuan ti nadai tatak, lalu nyadi bintang ti ngemalin nuju pemetul, lebuh maya sida manchar ari langit kudus.

Amat bendar, Nuan meh ti Nadai Ulih Laban, ti Pemadu Tegap, ti Pemadu Bekuasa.

#12718
- `Abdu'l-Bahá

 

O Petara ti penyinu! Terima kasih ke Nuan laban Nuan udah ngenani lalu ngasuh aku ngeleda. Nuan udah meri aku mata ti lansik sereta nyikap aku enggau pending ti ninga; udah nguluka aku ngagai Perintah Nuan sereta ngiring aku ngagai jalai Nuan. Nuan udah nunjukka aku arus ti betul lalu ngasuh aku nepan ba Bandung Pengelepas. O Petara! Wan aku awakka tegap lalu gaga aku teguh sereta ganggam. Jaga aku ari penguji ti balat lalu ibun aku sereta lindung aku dalam kota Penyanggup enggau Sempekat Nuan ti teguh. Nuan ti Bekuasa! Nuan ti Ngemata! Nuan ti Ninga!

O Nuan Petara ti Penyinu! Sikap ba aku ati ti baka cheremin, ngambika diterang ngena panchar pengerindu Nuan, lalu beri aku penemu ti tau nukar dunya tu nyadi kebun bungai ros ngena panjah penyayau kudus.

Nuan ti Penyinu, ti Pengasih! Nuan meh Petara Pemadu sayau!

#12719
- `Abdu'l-Bahá

 

Gaga teguh singkang kami, O Tuhan dalam menasan

Nuan lalu keringka ulih Nuan ati kami ngasika Nuan. Kuingka mua kami ngadap pemajik penyatu Nuan, lalu kelantangka ruang ati kami ngena semua tanda suchi penyerakup Nuan. Iyas tubuh kami ngena kelambi pemisi Nuan, lalu kesai ari mata kami tirai dosa, lalu beri kami jalung berekat Nuan; awakka ayu semua pengidup tau menyanyika puji Nuan ba mua perening pemesai- kuasa Nuan. Udah nya pegarika Nuan Empu, O Tuhan, ngena sada pengasih Nuan enggau misteri pengidup pengudus Nuan, awakka pengelantang sambiang ti kudus tau ngemenuhka semengat kami—sambiang ti ngelui ari leka jaku enggau urup lalu ngilah semua rentak enggau munyi—awakka semua utai tau betampil nyadi lela ba mua revelasyen bebendang Nuan.

Tuhan! Tu bala pengasuh ti seruran tegap sereta teguh dalam Sempekat Nuan enggau Penyanggup Nuan, ti udah bepegai rat ba tali penetap dalam Pengawa Nuan lalu bepagut ba rambu kelambi pemesai- kuasa Nuan. Saup sida, O Tuhan, ngena berekat Nuan, tetapka sida ngena kuasa Nuan lalu keringka punggung sida dalam ngasika Nuan.

Nuan ti Penembang, ti Bepengasih.

#12720
- `Abdu'l-Bahá

 

TIKAH

"Tikah Bahá’í ianya tampil pengerindu enggau penyerakup ba dua piak.Taja pia, sida mesti berati enggau bejimat lalu beteleba enggau perangai pangan diri. Tanggam ti meruan tu patut diikat enggau sempekat ti teguh, lalu tuju ia patut kena ngemansangka pemaik, bekaban enggau penyerakup lalu tulihka pengidup ti meruan belama.”

Sumpah tikah, genteran ti disebut siku-siku seduai ti deka jadi melaki- bini ba mua enda kurang ari dua iku saksi ti dikemendarka Raban Gelumu Sambiang Menua, baka ti dipadah dalam Kitab-i- Aqdas:

"Semua kami deka, amat bendar nitihka Peneka Petara"

O Tuhan aku, O Tuhan aku! Dua igi perenching segala tu ditikah dalam pengerindu Nuan, betampil gawa ba Pemetung Pengudus Nuan, serakup dalam menyalaika Pengawa Nuan. Asuh ulih Nuan tikah tu nyadi baka benang pemayuh penampak berekat Nuan, O Tuhan aku, ti Pemadu Pengasih, sereta perenching pijar penyikap Nuan, O Nuan ti Penyaup, ti Seruran Meri, awakka ari nya tau nereki dan ari kayu ti tegap ke deka mansang galak sereta rinda nengah tepa ti dipanjah ke baruh ari mua-hari berekat Nuan.

Amat bendar, Nuan meh Mentas. Amat bendar, Nuan meh Pemadu Tegap. Amat bendar, Nuan meh ti Penyinu, ti Pemadu Pengasih.

#12721
- `Abdu'l-Bahá

 

Mulia meh Nuan, O Petara aku! Amat bendar, pengasuh

Nuan tu enggau pengasuh indu Nuan tu udah begempuru di baruh kelemayang pengasih Nuan lalu seduai iya beserakup ngena bantu enggau penelap Nuan. O Tuhan! Saup seduai dalam dunya Nuan tu enggau ba Perintah Nuan lalu ungkupka seduai iya semua pemanah ngena pementas enggau berekat pengasih Nuan. O Tuhan! tetapka seduai iya nyadi pengasuh Nuan lalu saup seduai iya dalam kereja Nuan. Asuh seduai iya nyadi tanda nama dalam dunya Nuan sereta jaga seduai ngena penyikap ti enda nemu abis dalam dunya tu enggau dunya ti deka datai. O Tuhan! Seduai besampi enggau pemaruh ati ngadap perintah pengasih Nuan lalu minta kasih ngadap maligai penyerakup Nuan. Amat bendar, seduai iya jadi laban ngasika jaku-tangkan Nuan. Gaga seduai iya nyadi tanda penyerakup ati lalu segulai nyentuk ke pengujung maya.

Amat bendar, Nuan meh Pemadu Bisa, Selalu bisi sereta Pemadu Tegap!

#12722
- `Abdu'l-Bahá

 

Occasional

AYYÁM-I-HÁ

(Ayyám-i-Há patut nyadi maya endur nyendia diri ngintu puasa, maya endur nyamu orang, chariti, sereta beberi tepa.)

Petara aku, Api aku enggau Penampak aku! Hari ti diberi

Nuan nama Ayyám-i-Há dalam Kitab Nuan udah berengkah, O Nuan Raja ke semua nama, lalu puasa ti udah ditetapka Pen Nuan ti pemadu tinggi ngagai semua ti dalam perintah tempa Nuan diasuh intu nyau semak. Aku minta enggau pemaruh ati ngagai Nuan, O Tuhan aku, ke hari tu enggau sida ke ngelamatu udah betanggam teguh ngagai rambu tangkan Nuan, lalu bepegai ba ulu lalau Nuan, awakka ngemendar ngagai tiap iku semengat tau diagihka siti tempat dalam kandang balai Nuan, enggau siti penuduk ba pemansut penerang rampa-mua Nuan.

Tu, O Tuhan aku, bala pengasuh Nuan ti nadai ditekul runding jai ari utai ti udah diturun Nuan dalam Kitab Nuan. Sida udah ngundukka diri ba Pengawa Nuan, sereta nerima Kitab Nuan enggau pemutus ati baka ke pegari ari Nuan, lalu ngasika semua ti udah ditaga Nuan ngagai sida, lalu udah milih deka nitihka utai ti udah diturun Nuan.

Nuan meda, O Tuhan aku, baka ni sida udah ngelala sereta nyanggup semua utai ti udah dipegari dalam Tulis Nuan. Beri sida ngirup, O Tuhan aku, ai pemeruan Nuan ari jari berekat pengasih Nuan. Lalu, tuliska sida upah ti udah diletak iya ti udah nyelamka diri ke dalam tasik penatai Nuan, lalu tulihka ai anggur ti chulin betunga enggau Nuan.

Aku minta ari Nuan, O Nuan Raja ke semua raja, sereta Nuan ti siruka bala ti dikemaruh, ngeletakka sida pemanah dunya tu enggau dunya ti deka datai. Nambahka nya, tulis ke sida, utai ti nadai kala ditemu bala ti ditempa Nuan lalu sengkaum sida enggau bala ti udah ngelingi Nuan, enggau sida ti mindah di dalam maligai Nuan dalam tiap- tiap dunya ba semua dunya Nuan.

Nuan, endang amat, ti Chukup Tegap, ti Nemu Semua, ti Ngelala Semua.

#12725
- Bahá'u'lláh

 

HUQÚQU’LLÁH

Ungkup Petara

Huqúqu’lláh tu endang undang undang Petara ti bekuasa. Enda tau enda semua dipinta ngaga pemeri tu, laban tu nyadika pun penatai berekat, pengaya, enggau semua pemanah. Tu meh pemeri ti meruan bisi ba tiap tiap semengat dalam tiap tiap dunya ba semua dunya Petara, ti Bempu Semua, ti Pemadu Kaya.

Dikemesai meh Nuan, O Tuhan ke semua utai tempa, Nuan Siku meh alai semua mesti ngadap. Ngena dilah aku ti di dalam enggau dilah ti di luar, aku nyadika saksi ianya Nuan udah ngayan sereta mansutka Diri empu, ngirum ke baruh tanda-tanda Nuan, lalu nerantangka testimoni Nuan. Aku besaksi ke pengumbas pemisi Nuan ari semua utai semina Nuan, enggau pengudus Nuan ngelui semua utai bumi tu. Aku minta Nuan ngena pengelebih mulia Pengawa Nuan enggau peninggi pemisa Leka Jaku Nuan ngemendarka penetap ngagai iya ti ingin deka meri utai ti udah ditaga Nuan ke iya dalam Kitab Nuan lalu ngasika utai ti deka ngelekaika rengut penerima Nuan. Amat bendar Nuan meh Pemadu Tegap, ti Pemadu Mentas, ti Ngampun Semua, ti Pemadu Nelap.

#12723
- Bahá'u'lláh

 

Dikemulia meh Nuan, O Tuhan aku ti penyinu ! Aku minta kasih Nuan nengah gelinggang tasik sada kudus Nuan, enggau nengah pemayuh tanda kuasa-raja Nuan ti pemadu tinggi, enggau kelai Pengudus Nuan ti nyemetak, enggau misteri lalai ti dipelam dalam penemu Nuan, beri ngagai aku berekat Nuan gawaka Nuan enggau bala ti dipilih Nuan, lalu kemendarka aku ngasi meri ngagai Huqúq Nuan ke udah diletak Nuan dalam Bup Nuan.

Aku tu siku, O Tuhan aku, ke udah ngengkahka pengerindu iya ba dunya mulia Nuan, lalu udah bepegai teguh ba rambu pementas Nuan. O Nuan Siku ti Tuhan ke semua pengidup enggau Raja ke dunya semua nama, Aku minta enggau pengambis ati ba Nuan anang ngemeluka aku utai ti dikembuan Nuan, anang mega matak ari aku utai ke udah diletak Nuan ke bala ti dipilih Nuan.

Aku bebendar minta Nuan, O Tuhan ke semua nama enggau Penempa ke semua serega, bantu aku nyadi tegap dalam Pengawa Nuan, nengah pengering berekat Nuan, ke alai semua igau dunya enda mega deka ngelindung aku baka tirai, enda mega disekat ketegal penyarut ti balat datai ari bala ti ngereja penyai ke udah angkat nguluka mensia Nuan tesat dalam hari Nuan. Nya alai tagaka aku, O Pengingin ati aku, pemanah dunya tu enggau dunya ti deka datai. Amat bendar Nuan meh bekuasa ngereja utai nitihka peneka Nuan. Nadai Petara bukai tang Nuan, ti Seruran Pengampun, ti Pemadu Mentas.

#12724
- Bahá'u'lláh

 

NAW-RÚZ

(Naw-Rúz meh hari keterubah ba taun Bahá’í)

Puji meh Nuan, O Petara aku, laban Nuan udah ngeletak

Naw-Rúz nyadika pengerami ke sida ti udah ngintu Puasa ketegal pengerindu sida ke Nuan lalu nagang diri ari semua utai ti kamah ba Nuan. Kemendarka, O Tuhan aku, api pengerindu Nuan sereta pengangat ti dikeluar ari Puasa ti diasuh Nuan tau ngemauka sida dalam Pengawa Nuan, lalu ngasuh sida kiruh enggau puji Nuan sereta pengingat Nuan.

Laban Nuan udah ngiyas sida, O Tuhan aku, ngena ngepan Puasa ti udah diungkup Nuan ke sida, penyamai pemanah nya alai iyas sida mega ngena ngepan penerima Nuan, nengah berekat enggau pemayuh pengasih Nuan. Laban kereja mensia endang semua bepanggai ba Nuan, lalu nitihka tangkan- atur Nuan. Sema Nuan ngeletak iya ti udah ngelanggar Puasa sebaka enggau sida ti udah ngintu nya, mensia ti baka nya deka diterima baka sida ti ari jeman kelia ti seruran ngintu Puasa. Lalu sema Nuan ngeletak iya ti udah ngintu Puasa lalu ngelanggar nya, orang nya deka disengkaum enggau sida ti udah ngasuh Kelambi Revelasyen Nuan dipechik abu, lalu udah diiyar jauh ari ai kristal Tengkeching pengidup tu.

Nuan meh Iya lalu nengah Nuan menira "Pemadu dipuji meh Nuan dalam semua kereja Nuan" udah ditegika, lalu tikas "Dititih meh Nuan dalam tangkan-atur

Nuan" udah dikerembaika. Asuh temu pangkat Nuan tu, O Petara aku, ngagai bala pengasuh Nuan, ngambika sida tau diasuh nemu pengelati semua utai bepanggai ba pinta Nuan enggau leka jaku Nuan, lalu pemadas tiap-tiap pengawa nitihka pemendar Nuan enggau pemanahpenyamai peneka Nuan, lalu tau ngelala kemudi pengawa mensia endang dalam genggam penerima Nuan enggau tangkan-ajar Nuan. Asuh tu temu ba sida, ianya nadai utai tau nutup sida ari Pemajik Nuan, ba hari tu ke alai Christ nyapa: "Semua pegai-kuasa enggi Nuan, O Nuan ke Pemansut Roh (Jesus)"; enggau Pangan Nuan (Muhammad) nyada: "Mulia meh Nuan, O Nuan ti Pemadu Dikerindu, ketegal nya Nuan udah ngayanka Pemajik Nuan, lalu udah nulis ke bala ti dipilih Nuan utai ti deka ngasuh sida tulihka penuduk ba revelasyen Nama Nuan ti Pemadu Tebangkar, lalu nengah nya semua mensia udah merampau kelimpah ari sida ti ngingkas diri empu ari semua utai kelimpah ari Nuan, lalu nguingka sida empu nuju Iya Siku ti Pemansut Nuan-empu enggau Pengayan semua penau Nuan."

Iya Siku ti Dan Nuan enggau semua raban Nuan, O Tuhan aku, udah nembuka puasa sida ba hari tu, udah ke ngibun ia dalam kandang balai Nuan, sereta dalam pengeransing sida deka ngenyamaika Nuan. Uji Nuan ngeletak ke Iya, enggau ke sida, sereta ke semua sida ti udah masuk betemu enggau Nuan ba hari nya suba semua pemanah ti udah ditaga Nuan dalam Kitab Nuan. Lalu, bekal sida, ngena utai ti deka nguntung sida, dalam kedua- dua pengidup tu enggau pengidup ti dudi.

Nuan, endang amat, ti Nemu Semua, ti Pemadu

Pintar.

#12733
- Bahá'u'lláh

 

PUASA

Dalam Kitab-i-Aqdas bisi disebut: Kami udah nangkan kita besambiang enggau bepuasa berengkah ari umur maturiti (15 taun): tu udah diletak Petara, Tuhan nuan enggau Tuhan aki-ini nuan …. Orang ke bejalai jauh, ke sakit, indu ke ngandung enggau nusuka anak, dikelaung ari bepuasa…. Anang makai tauka ngirup, berengkah ari matahari tumbuh nyentuk ngagai maya matahari padam, lalu bejaga enggaika pengingin nagang kita ari ke ditetap dalam Kitab.

Kandang maya puasa ianya dalam bulan ‘Alá’ (Peninggi).

Tu meh ia, O Petara aku, keterubah ba hari ke endur

Nuan udah merintah sida ti dikerindu Nuan ngintu Puasa. Aku minta ari Nuan nengah Nuan Empu enggau iya ke udah bepuasa ketegal pengerindu ke Nuan enggau ke penyamai pemanah Nuan—lalu ukai ketegal diri empu enggau pengingin, ukai mega ketegal nangika pengeringat Nuan—lalu ngena semua Nama Nuan ti pemadu lati enggau penau ti pemadu tinggi, nuchi bala pengasuh Nuan ari pengerindu ke utai bukai kelimpah ari Nuan lalu narit sida besemak ngagai Palan Penurun penampak rampa-mua Nuan enggau Penuduk maligai penyatu Nuan. Terangka ati sida, O Petara aku, ngena penampak penemu

Nuan lalu tampakka mua sida ngena panchar

Bintang-siang ti manchar ari bingkai-langit Peneka Nuan. Kering meh Nuan ngereja utai ti dikedeka Nuan. Nadai Petara bukai tang Nuan, ti Pemadu Bemulia, tulung Iya endang dipinta ulih semua mensia.

Saup sida, O Petara aku, mantu pemenang Nuan lalu ngeninggika Leka Jaku Nuan. Nya alai, sukung sida, nyadi baka jari dalam Pengawa Nuan ba semua pengasuh Nuan, lalu asuh sida nyadi pengayan agama Nuan enggau ke tanda Nuan ba raban mensia, awakka enggau pemintar semua dunya tau diisi enggau pengingat sereta puji Nuan ngena penerang enggau tanda pengamat Nuan. Nuan sigi, amat bendar, ti Pemadu Pemisi, ti Pemadu Tinggi, ti Bekuasa, ti Tegap, sereta Pengasih.

#12726
- Bahá'u'lláh

 

Dalam Nama Iya Siku ti udah disemaya ba semua Bup

Petara, ti Nemu Semua, ti Dipadah Semua! Hari endur bepuasa udah datai ke alai bala pengasuh ti ngelingi maligai Nuan sereta udah datai ba pemisi Nuan udah bepuasa. Sebut: O Petara ke nama enggau penempa serega enggau bumi! Aku minta ari Nuan ngena Nama Nuan, ti Pemadu Mulia, nerima puasa ari sida ti udah bepuasa ketegal pengerindu ke Nuan enggau ketegal ke penyamai pemanah Nuan lalu sida udah bejalaika tangkan Nuan ti di dalam Bup enggau Papan Tulis Nuan. Aku minta pengasih Nuan nengah sida awakka mantu aku dalam ngerembaika Pengawa Nuan lalu asuh aku tegap dalam pengerindu ke Nuan, ngambika singkang kaki aku enda tekelinchir ketegal kachau-regau utai tempa Nuan. Amat bendar, Nuan ti bekuasa atas semua utai dikedeka Nuan. Nadai Petara bukai tang Nuan, ti Ngidup, ti Pemadu Bekuasa, ti Pemadu Pemisi, ti Hari Jeman.

#12727
- Bahá'u'lláh

 

Puji meh Nuan, O Tuhan Petara aku! Aku minta ngagai

Nuan nengah Revelasyen tu ke alai pemetang udah ditukar enggau penampak, ke alai Kaaba Penyuah udah didirika, lalu Papan Tulis udah dipegarika, lalu Gulung Pengerembai udah dibuka, ngirum ke baruh ngagai aku enggau ngagai sida ti dalam raban aku utai ti deka ngasuh kami terebai ngagai serega ngelui mulia Nuan, lalu deka meresi kami ari pechik pengakang ti udah nekul orang ti sangka masuk ngagai panggau penyerakup Nuan.

Aku tu meh siku, O Tuhan aku, iya ti udah ngenggam rat tali pengerindu-penelap Nuan, lalu bepagut ba rambu pengampun enggau pengasih Nuan. Uji Nuan ngeletakka aku enggau bala ti dikerindu aku pemanah dunya tu enggau dunya ti deka datai. Udah nya, bekal sida, enggau Tepa Pelalai Nuan ti diletakka bala ti dipilih ari semua utai tempa Nuan.

Tu meh, O Tuhan aku, hari ti alai Nuan merintah bala pengasuh Nuan ngintu Puasa. Berekat meh iya ti ngintu Puasa semina ketegal Nuan lalu enggau naka pengingkas ari semua utai bukai kelimpah ari Nuan. Saup aku lalu saup sida, O Tuhan aku, ngasika Nuan lalu nitihka semua ajar Nuan. Nuan, amat bendar, ngembuan kuasa ngereja utai ti dipilih Nuan.

Nadai Petara bukai tang Nuan, ti Nemu Semua, ti Pemadu Pintar. Semua puji ke Petara, Tuhan ke semua dunya.

#12728
- Bahá'u'lláh

 

Tu meh, O Petara aku, hari alai Nuan udah ngeletak bala pengasuh Nuan ngintu Puasa. Ngena nya Nuan udah ngiyas jaku pemuka ba Bup Adat Nuan ti dipegarika ngagai semua utai tempa Nuan, lalu udah ngayanka Tibang jaku-tangkan Nuan dipeda semua ti diau di serega Nuan enggau di bumi Nuan. Nuan udah nyikap genap jam ba semua hari tu enggau pemanah ia empu, ke enda ditemu semua semina Nuan, penemu Iya nyerangkung semua utai tempa. Nuan udah, mega, nagaka ngagai genap semengat sebagi ari pemanah tu nitihka dalam Papan Tulis letak-tangkan Nuan enggau Kitab pemutus ukum Nuan ti enda ulih diubah. Tiap lambar ba Bup enggau Kitab tu Nuan udah, nambah mega, ngagihka ngagai genap iku mensia enggau raban bansa di dunya.

Ngagai bala sulu Nuan ti chukup dikerindu, Nuan udah, nitihka letak-tangkan Nuan, ngungkupka, ba tiap pagi, changkir pengingat Nuan, O Nuan Siku Raja ke semua raja! Tu meh sida ti udah gian laban ai anggur pemayuh pemintar Nuan ke alai sida ninggalka padung-peninduk sida ketegal pengingin sida deka ngerami puji Nuan enggau nerantangka pemanah Nuan, lalu berumban angkat ari tinduk ketegal pengeran sida deka mansang ngagai pemisi Nuan lalu bulih pemeri Nuan. Ba tiap maya, mata sida udah dikedang ngagai Terebak-tawas pengerindu-penelap Nuan, lalu mua sida dikuing nuju Pun Panchur peransang Nuan. Udah nya, perujanka, ba kami enggau ba sida ari mua-hari pengasih Nuan utai ti ngakun ba serega pemeri enggau berekat Nuan.

Puji meh nama Nuan, O Petara aku! Tu meh jam maya Nuan udah muka pintu pemisi Nuan ba mua semua utai tempa Nuan, lalu udah nelenga besai jalai penama nuju penyiru pengasih Nuan ngagai semua ti nguan bumi Nuan. Aku minta Nuan, nengah semua sida ke alai darah sida udah digenselan ba menasan Nuan, ti, ketegal pengeran sida ke Nuan, ngelepaska diri empu ari semua tanggam ngagai sebarang utai tempa Nuan, lalu udah chukup tetarit ngagai pemanis rengut peransang Nuan alai genap perengka tubuh sida menanyika puji Nuan lalu begegar laban pengingat Nuan, anang matak ari kami utai ke udah tetap diletak Nuan dalam Revelasyen tu— siti Revelasyen ti ngembuan pemisa ke udah ngasuh genap pun kayu nyeruka utai ti diterantang Api Babas dulu suba ngagai Moses, Siku ti berandau enggau Nuan, siti Revelasyen ti udah ngasuh genap kereping batu kerangan berenaingka baru puji Nuan, baka batu ti ngemuliaka Nuan dalam hari Muhammad, Pangan Nuan.

Tu meh bala, O Petara aku, sida ke udah enggau pengasih Nuan diasuh bekaban enggau Nuan sereta berandau enggau Iya Siku ti Pemansut Nuan Empu. Ribut peneka Nuan udah ngelekaika sida jauh semadi meh Nuan ngelumuka sida begulai di baruh kelemayang Nuan, lalu ngasuh sida masuk ngagai kandang balai Nuan. Diatu laban Nuan udah ngasuh sida diau di baruh ayung kanopi pengasih Nuan, uji Nuan mantu sida bulih pengakun pangkat ke chukup tinggi. Anang ngasuh sida, O Tuhan aku, diitung enggau sida ti, taja ulih besemak enggau Nuan, udah ditagang ari ke ngelala mua Nuan, enggau sida, taja betemu enggau Nuan, dikemelu ari penatai Nuan.

Tu meh bala pengasuh Nuan, O Tuhan aku, ke udah masuk sama enggau Nuan dalam tu, Rumah Jil ti Pemadu Tegap, udah ngibun Puasa di dalam nya nitihka ti udah diperintah Nuan ngagai sida dalam Papan tulis letak-tangkan Nuan enggau Bup tangkan-atur Nuan. Ari nya, kirum ke baruh, ngagai sida utai ke tau meresi lengis semua pengamah ti dipegedi Nuan, ngambika sida tau angkun penuh ngagai Nuan, lalu sida tau ngetas abis sida empu ari semua utai kelimpah ari Nuan Empu.

Nya alai, perujanka, ba kami, O Petara aku, utai ti patut ke berekat Nuan sereta ngakun ke pemeri Nuan. Udah nya, kemendarka kami, O Petara aku, idup dalam ngingatka Nuan lalu mati dalam pengerindu ke Nuan, lalu bekal kami enggau tepa penatai Nuan dalam semua dunya Nuan pengudah tu—dunya ke enda dipereti ulih semua kelimpah ari Nuan. Nuan meh Tuhan kami enggau Tuhan ke semua dunya, enggau Petara ke semua ti di serega enggau semua ti di bumi.

Nuan meda, O Petara aku, utai ke udah ninggang bala ti dikerindu Nuan dalam hari Nuan. Mulia Nuan nyadika saksi aku! Sabak merampau bala ti dipilih Nuan udah didinga ba serata dunya Nuan. Sekeda sida diamba ulih orang ke enda arap ba tanah Nuan, lalu diempang ulih sida ari ti mansang semak nuju Nuan sereta datai ba balai mulia Nuan. Sekeda ti bukai ulih datai besemak enggau Nuan, tang ditagang ari ke meda mua Nuan. Bisi mega sekeda ti bukai dikemendar, ketegal pengeransing sida deka meda Nuan, masuk ngagai kandang balai Nuan, tang sida ngemendarka tirai igau sengapa utai tempa Nuan enggau penyalah ti dikenataika bala penekan ba mensia Nuan udah nyelapat sida ari Nuan.

Tu meh jam, O Tuhan aku, ke udah diberi Nuan lebih lati ari genap jam ti bukai, lalu udah ngaul nya ngagai ia ti pemadu dipilih ba semua utai tempa Nuan. Bebendar aku minta ngagai Nuan, O Petara aku, nengah Nuan Empu enggau nengah sida, awakka ngeletak sepemanjai taun tu utai ti deka ngangkatka bala dikerindu Nuan. Uji Nuan, nambahka nya, ngeletak-tangkan dalam taun tu utai ti tau ngasuh Terebak-tawas kuasa Nuan manchar terang ari atas bingkai-langit mulia Nuan, lalu merenchingka penegap kuasa-raja Nuan, ba selampur dunya.

Kemenangka Pengawa Nuan, O Tuhan aku, lalu kemaruhka ulih Nuan bala munsuh Nuan. Tuliska, udah nya, ngagai kami pemanah ba pengidup tu enggau pengidup ti deka datai. Nuan endang Amat, Siku ti nemu utai ti dilalai. Nadai Petara bukai tang Nuan, ti Seruran Ngampun, ti Pemadu Pemisi.

#12729
- Bahá'u'lláh

 

Tau disebut sebedau muka puasa

Puji meh ngagai Nuan, O Tuhan Petara aku! Kami udah ngintu Puasa nitihka pinta Nuan lalu muka ia diatu nengah pengerindu Nuan enggau pemanah-penyamai Nuan. Terima meh, O Petara Aku, pengawa ti udah dikereja kami ba menasan Nuan semina ketegal pemajik Nuan lalu mua kami ditunga ngagai Pengawa Nuan, lepas ari semua utai tang Nuan. Sikap meh, udah nya, pengampun Nuan ba kami laban udah arapka Nuan, enggau aki ini kami, enggau semua ti udah pechayaka Nuan enggau tanda Nuan ti tegap ba maya ti pemadu besai, Revelasyen ti pemadu bemulia tu. Bekuasa meh Nuan milih utai ti dikereja Nuan.

Nuan, amat bendar, ti Pemadu Tinggi, ti Pemadu Tegap, ti Nadai Penekul.

#12730
- Bahá'u'lláh

 

Puji meh Nuan, O Petara, Petara aku! Tu meh hari alai

Nuan udah ngeletak bala ke dipilih Nuan, bala ke dikerindu Nuan enggau bala pengasuh Nuan ngintu Puasa, alai Nuan udah ngaga penampak ke bala ba perintah Nuan, sebaka enggau Nuan udah ngaga sambiang obligatori nyadi tangga dikena sida ti udah nerima penyerakup Nuan. Aku minta Nuan, O Petara aku, ngena dua tiang pemun ti tegap tu, ke udah diletak Nuan nyadika mulia enggau basa ke semua mensia, nyaga pengelikun pengarap Nuan ari kachau penyai nadai arapka Petara enggau kereja kutuk tiap iku orang ti jai. O Tuhan, anang ngelindung penampak ti udah diayanka Nuan ngena pengering Nuan enggau pemisa-kuasa Nuan. Udah nya, bantu, bala sida ti udah amat arapka Nuan nengah roh bala ti dipeda enggau ti enda dipeda ngena jaku-tangkan Nuan enggau kuasa-raja Nuan. Nadai Petara bukai tang Nuan, ti Pemadu Tegap, ti Pemadu Bekuasa.

#12731
- Bahá'u'lláh

 

O Pemekal Kudus! Laban aku tu mentin diri ari semua pengingin tubuh lalu enda ngiruh diri makai enggau ngirup, ari nya tuchi sereta kuduska ati aku ari pengerindu ke orang bukai kelimpah ari Nuan, lalu terabai sereta jaga semengat aku ari pengingin jai enggau perangai sitan, awakka roh aku tau berandau enggau seput pengudus lalu bepuasa nyebut semua utai bukai kelimpah ari Nuan.

#12732
- `Abdu'l-Bahá

 

RABAN GELUMU

Tiap kali masuk ngagai bilik aum, besampi ngena sambiang tu enggau ati ti keketap ketegal pengerindu Petara sereta dilah ti dituchi ari semua utai kelimpah ari pengingat Iya, awakka Iya ti Pemadu Bekuasa tau enggau pengasih mantu kita bulih pemenang ti pengambis tinggi.

O Petara, Petara aku! Kami tu pengasuh Nuan ti udah nunga enggau pengangkun ngagai Pengudus Mua Nuan, ti udah ngingkas diri empu ari semua utai kelimpah ari Nuan ba Hari ti bemulia tu. Kami udah begempuru ba Gelumu Sambiang tu, beserakup dalam penemu enggau runding kami, lalu tuju kami segempung deka ngangkatka Leka Jaku Nuan ba bansa mensia. O Tuhan, Petara kami! Gaga kami nyadi tanda Pengudus Iring Nuan, nyadi Tikas peninggi Pengarap Nuan ba mensia, nyadi pengasuh ngagai penegap Sempekat Nuan. O Nuan Tuhan kami ti Pengambis Tinggi, pengayan ke Pengudus Penyerakup Nuan ba Perintah Abhá Nuan, lalu bintang ti beperenching manchar ba semua bengkah menua. Tuhan! Bantu kami nyadi tasik ti ngelegua ngena kelebung pemanah Berekat Nuan, nyadi sungai ti anyut ari Tuchung semua pemulia Nuan, nyadi buah pemanah ba Kayu Pengawa serega Nuan, nyadi kayu ti leliuk dipuput ribut Pemeri Nuan dalam Kebun anggur serega Nuan. O

Petara! Asuh semengat kami bepanggai ba Genteran

Suchi Penyerakup Nuan, ati kami gaga laban tengkujuh Berekat Nuan, awakka kami tau berakup baka gelumbang ba siti tasik lalu begulai sejantil baka panchar Penerang Penampak Nuan; awakka runding kami, penemu kami, perasai ati kami tau nyadi siti pemendar, ngayanka roh penyerakup di selampur dunya. Nuan ti Pengasih, ti Pemisi, ti Penyikap, ti Pemadu Tegap, ti Pengampun, ti Penyinu.

#12734
- `Abdu'l-Bahá

 

Datai meh kita begelumu dalam pengaga ti tulin, lalu dikena ngepunka aum, sebut kita sambiang tu:

O Nuan Tuhan ke Perintah Petara! Taja pen tubuh kami begelumu ditu, tang ati kami tebuka ditarit ulih pengerindu Nuan, taja pia kami mega udah ditaban ulih panchar perenching mua Nuan. Taja kami tu lemah, kami nganti pengayan penegap enggau kuasa Nuan. Taja kami tu umang, nadai reta tauka daya, agi meh kami ngambi pengaya ari tibang reta Perintah Nuan. Taja kami tu setitik, agi meh kami ngauk ari penalam tasik Nuan. Taja pen kami tu baka debu, agi meh kami bekebelik dalam mulia bebendang Matahari Nuan.

O Nuan Pemekal kami! Kirum ke baruh bantu Nuan, awakka tiap iku ti begelumu ditu tau nyadi lilin ti udah ditungkun, tiap iku nyadi pusat penarit, tiap iku nyadi pemanggil ngagai dunya serega Nuan, nyentuk ke kami ulih ngaga dunya tu nyadi cheremin Serega Nuan.

#12735
- `Abdu'l-Bahá

 

Sambiang disebut ba penutup aum Raban Gelumu

O Petara! O Petara! Ari perintah penyatu Nuan ti enda dipeda kemata kami ti begelumu dalam aum semengat tu, arap ba Nuan, andal ba semua tanda Nuan, teguh ba Sempekat enggau Penyanggup Nuan, tetarit ngagai Nuan, ditungkun ngena api pengerindu Nuan sereta lurus ati dalam Pengawa Nuan. Kami tu pengasuh dalam kebun anggur Nuan, pengerembai agama Nuan, penyembah ti angkun ba rampa-mua Nuan, baruh ati ngagai bala ti dikerindu Nuan, nyerah diri ba pintu Nuan, lalu minta kasih Nuan netapka kami gawaka bala ti dipilih Nuan, nyukung kami enggau raban malikat Nuan ti enda dipeda, ngeringka punggung kami dalam gawa ke Nuan lalu asuh kami nyadi rayat ti ngunduk sereta sayau berandau enggau Nuan.

O Tuhan kami! Kami tu lemah, lalu Nuan meh ti Tegap, ti Bekuasa. Kami tu nadai pengidup, lalu Nuan meh Roh ti meri pengidup ti besai. Kami tu seranta, lalu Nuan meh ti Penyukung, ti Bekuasa.

O Tuhan kami! Kuingka mua kami nunga rampa-mua pengasih Nuan, tupi kami ari meja serega Nuan enggau pemayuh pengasih Nuan, bantu kami enggau raban malikat Nuan ti pemadu tinggi lalu tetapka kami nengah bala ti kudus ba Perintah Abhá.

Amat bendar, Nuan ti Mentas, ti Pengampun. Nuan meh ti Pengempu pemisi ti mayuh, lalu, amat bendar, Nuan meh ti Penyayau sereta Pengasih.

#12736
- `Abdu'l-Bahá

 

Tablets

Genteran ari sekeda Papan Tulis ‘Abdu’l-Bahá

O Nuan ti benung nungaka mua ngadap Petara! Pejamka mata nuan ngagai semua utai bukai, lalu penchelakka sida ngagai dunya ti Semua Penampak. Pinta sebarang ti dikedeka nuan semina ari Iya aja, giga sebarang ti digiga nuan semina ari Iya aja. Ngena sekali perening Iya ngemendarka seratus ribu pengandal, ngena sekali tinjau Iya ngeraika seratus ribu penyakit ti enda ulih diubat, ngena sekali jeling Iya nyumanka tiap telih, ngena sekali anggut Iya ngelepaska semua ati ari penusah. Iya ngereja nitihka kereja Iya, lalu nama kuasa milih ba kitai? Iya bejalaika Peneka Iya. Iya ngeletak utai ti dikedeka Iya. Ari nya, manah nuan ngundukka pala diri alah, lalu panggaika pengarap ati nuan ba Tuhan ti Kasihka Semua.

#12747
- `Abdu'l-Bahá

 

O nuan ti nguing ngadap Perintah Petara!

Aku bisi dipadah pasal undan surat nuan ti amat lati lalu besampi ngagai Pemetung Kudus, Keliling Malikat Tinggi, minta nuan dibaptisa ngena ai penemu enggau api pengerindu Petara lalu ngasuh nuan nyadi pengasuh ti betul sereta taluk dalam Kebun Iya ti Tebangkar, awakka nuan tau manjah kayu pengerindu Petara dalam Serega Abha; lalu ngaga nuan nyadika tanda pemaruh ati enggau ensuruk diri dalam raban pengasuh indu Petara sereta ke penerantang Pengawa Iya ba menua ke besai sereta luas.

#12748
- `Abdu'l-Bahá

 

Genteran diambi ari Gleanings Tulis Bahá’u’lláh

Pemajik Jeman udah ngemendarka diri dirantai ngambika bansa mensia tau dilepas ari kungkung ia, lalu udah sanggup dijil dalam Kubu ti pemadu tegap tu ngambika serata dunya tau tulihka pengelepas ti bendar. Iya udah ngirup nyentuk ngagai buntung dalam jalung penusah, ngambika semua mensia di dunya tau tulihka pengelantang ti meruan, sereta penuh laban pengaga. Tu meh pengasih Tuhan Nuan, ti Penyinu, ti Pemadu Pengasih. Kami udah ngemendarka diri dikemaruh, O kita ti arap dalam Penyerakup Petara, ngambika kita tau disagu, lalu udah ngasaika pemayuh pemedis, ngambika kita tau kaya sereta maju. Iya ti udah datai deka nirika dunya ti baru, peda, bakani sida udah masuk kunsi enggau Petara lalu udah mejal Iya diau ba nengeri ti pemadu singgang!

#12744
- Bahá'u'lláh

 

Nyadi mentas dalam pengeraja, lalu beterima kasih dalam penusah. Nyadi lumau dikandal orang ti diau besemak enggau nuan, lalu perening iya ngena mua ti tampak sereta rindu. Nyadi pesaka ke orang ti seranta, ke pengerawan orang ti kaya, nyaut sabak orang ti suntuk, pengintu pemendar semaya nuan. Nyadi lurus dalam pemutus runding nuan, lalu belalau dalam jaku nuan. Nyadi anang bingkuk enggau orang, lalu pandangka ati ti baruh ngagai semua mensia. Nyadi lampu ke sida ti bejalai dalam pemetang, pengaga ke sida ti merampau, tasik ke sida ti aus, tempat pengenduh ke sida ti kena penusah, pengering enggau penyaga ke sida ti kena perinsa. Beri integriti enggau pengerentang ditunjuk dalam semua kereja nuan. Nyadi rumah ke temuai, ubat ke sida ti merinsa, tiang pengagah ke sida ti diburu. Nyadi mata ke sida ti buta, lalu penampak pengiring ke kaki ti salah pejalai. Nyadi pengiyas ke rampa-mua pengamat, maskota ke kening sida ti arap, tiang pemun ke rumah pengerentang, seput pengidup ke tubuh mensia, tambai ke bala pengelurus, bintang-penerang atas bingkai- langit pemanah, ambun ke tanah ati mensia, bandung ke tasik penemu, mata hari dalam serega pemisi, intan ba labung pemintar, penampak pemanchar dalam penegap peturun nuan, buah ke kayu pemaruh ati.

#12745
- Bahá'u'lláh

 

Ungkup kereja ti keterubah sereta pemadu dulu ti udah dipadah ngagai mensia, pengudah ngelala Iya Siku ti Pengamat Meruan, ianya ungkup kereja tegap dalam Pengawa Iya. Bepagut nuan ba nya, lalu nyadi sida ke ngembuan runding ti ditanggam teguh sereta dientapka ba Petara. Nadai pengawa, enda ngira pemanah, udah tauka ulih manding ngagai nya. Ia nyadi raja ke semua pengawa, lalu ngagai tu Tuhan nuan, ti Pemadu Tinggi, ti Bekuasa, deka besaksi.…

#12746
- Bahá'u'lláh

 

Genteran diambi ari Papan Tulis Ridvan

Dalam nama Iya Siku ti udah mancharka bebendang Iya ari atas semua utai tempa!

Musim Bungai Kudus diatu udah datai, O Pen Pemadu

Bekuasa, laban Gawai ke Semua-Bepengasih nyau jampat deka datai. Gerak diri empu, lalu kemesaika, ba mua semua utai tempa, nama Petara, lalu ngerami puji Iya, ke alai semua utai tempa tau diidup lalu dikemaruka. Bejaku, lalu anang nuan diau aja. Bintang-siang pemadu pengaga udah manchar ari bingkai-langit nama Kami, ti Naka ia pengaga, laban dunya semua nama Petara udah diiyas ngena keresa nama Tuhan nuan, ti Penempa semua serega. Angkat ba mua semua menua di dunya, lalu ngepan diri empu ngena kuasa Nama ti Pemadu Tebangkar tu, lalu anang nyadi sida ti agi betangguh…(1)

Tu meh Hari alai dunya ti enda dipeda udah nyada: “Besai meh berekat nuan, O bumi, laban nuan udah digaga nyadika pelasar Petara nuan, lalu udah dipilih nyadika penuduk maligai Iya ti tegap.” Dunya mulia udah nyapa: “Sema nyawa aku ulih nyadika genselan ke nuan, laban Iya Siku Dikerindu ti Pemadu Bepengasih udah nudukka kuasa-raja ba nuan, nengah kuasa Nama Iya ti udah dipekat ngagai semua utai, sekalika ia ti dulu tauka ia ti deka datai”…(5)

Angkat lalu padah ngagai semua utai tempa berita pasal Iya ti Pemadu Bepengasih udah nujuka singkang Iya ngagai Ridvan lalu masuk kia. Udah nya, iring, semua orang ngagai kebun pengerindu ti udah digaga Petara nyadi Maligai Serega Iya. Kami udah milih ia nyadika Trumpet Kami ti pemadu inggar, lalu munyi letup ia deka nanda pengidup baru ke semua mensia… (10)

Tarit ati semua mensia, nengah kangau Iya, Siku aja ti Dikerindu. Sebut: Tu meh Sada Petara, enti nuan deka dingaka. Tu meh Terebak-tawas ke Revelasyen Petara, tang nuan patut nemu tu. Tu meh Palan Penurun Pengawa Petara, enti nuan deka ngelala ia. Tu meh Penatai jaku tangkan Petara, nya alai nuan patut ngakim ia enggau rentang. Tu meh Lalai ti ayan enggau dipelalai: ngambika nuan ulih nangkap reti ia. O mensia ba dunya! Buai semua, dalam Nama Aku ti ngelui ari semua nama bukai, utai ti dikemisi nuan, lalu selamka diri empu ke dalam Tasik tu laban ba penalam nya bisi dipelalai mutiara pemintar enggau leka jaku, tasik ti ngelegua dalam nama Aku, ti Pemadu Bepengasih. Bakanya meh perintah Iya ngagai nuan ti ngembuan Indu Kitab…(16)

Siku ti Pemadu Dikerindu udah datai. Ba jari kanan Iya Ai Anggur ti dichap nama Iya. Lantang meh mensia ti ngadap Iya, lalu ngirup ungkup diri, lalu nyebut: “Puji meh ke Nuan, O Pengayan semua tanda Petara!” Ngena pengerentang Iya ti Pemadu tegap! Semua utai ti dipelam udah diayanka nengah kuasa pengamat. Semua pengasih Petara udah dikirum ke baruh, ti nyadika tanda pengasih Iya. Ai pengidup ti meruan belama, dalam pemenuh ia, udah diberi ngagai mensia. Tiap-tiap changkir udah disadung ulih jari Iya ti Amat Dikerindu. Nganjak semak, lalu anang betangguh, taja pen sekejap aja…(17)

Andal meh enggau naka pengaga, O orang Bahá, lebuh kita ngingatka Hari ti penuh pengelantang, Hari alai Dilah Hari Jeman udah bejaku, lebuh Iya ngejangka Rumah Iya, nuju Dasan ke alai Iya manchar ngagai semua utai tempa bebendang nama Iya, ti Pemadu Mentas. Petara meh saksi Kami. Sema Kami deka ngayanka penyelai ti dipelam gaya Hari nya, semua ke diau di dunya enggau di serega deka luput lalu mati, semina sida ti deka diibun ulih Petara, ti Pemadu Tegap, ti Nemu Semua, ti Pemadu Pintar… (19)

#12742
- Bahá'u'lláh

 

Ba hari keterubah Pemajik Jeman niki Maligai Iya ti

Pemadu Bekuasa dalam kebun ti digelar Ridván, Dilah Mulia bisi nyadaka tiga leka jaku ti beberekat. Keterubah, ianya dalam Revelasyen tu adat pedang udah dipadam.[3] Kedua, ianya sebedau pengambis satu ribu taun sebarang sapa ti ngambu diri nabi endang bula. Reti ia “taun” ianya setaun penuh, lalu nadai penerang tauka salin dikemendar dalam pekara tu. Lalu ketiga, ianya ba jam nya Petara, tinggi meh Mulia Iya, mancharka penuh bebendang semua nama Iya ba semua utai tempa.

. Genteran nangkanka tu dipegarika pengudah nya, taja pia Iya madahka ianya tu patut ngembuan penuduk sama peninggi enggau tiga ti bukai: ianya lebuh nama sebarang sapa, sekalika iya agi idup tauka mati, disebut ba mua Iya, semengat nya amat bendar udah bulih sebut ba Raja jeman kelia. Beberekat meh sida ti udah tulihka nya!

#12743
- Bahá'u'lláh

 

PAPAN TULIS AHMAD

Papan Tulis Ahmad

"Semua sambiang obligatori, begulai enggau sekeda sambiang bukai ti nyengala, baka Sambiang Pengerai, Papan Tulis Ahmad, udah disikap Baha'u'lláh ngena pemisa enggau reti ia empu, Ialu patut diterima baka nya lalu patut disebut bala ti arap enggau pengarap sereta pengandal ati ti tunggang, awakka nengah nya sida tau masuk lebih semak ngagai randau enggau Petara, lalu ngasuh sida lebih agi dikelala ketegal nitihka adat enggau ajar Iya."

— Ari siti surat ditulis ngarika Shoghi Effendi.

Iya meh Raja, ti Nemu Semua, ti Pintar!

Peda, Burung Bul-Bul ari Serega belagu di atas pating Kayu ti Meruan, ngena pelandai ti kudus sereta manis, nerantang ngagai bala ti lurus berita pengaga penyemak Petara, ngangau bala ti arap dalam

Penyerakup Suchi ngagai balai Penatai Siku ti Mentas, madah ngagai bala ti udah ngingkaska diri pesan ti udah dipegari Petara, ti Raja, ti Bemulia, ti nadai ulih Banding, ngiring bala ti dikerindu ngagai penuduk ti tuchi sereta ngagai Pemajik ti beperenching tu.

Amat bendar tu meh Pemajik ti Pemadu Besai, dipadah dalam semua Kitab bala Seruan, nengah Sida semua pengamat deka dikelala ari penyalah lalu pemintar tiap jaku- tangkan deka diuji. Amat endar Iya meh Kayu Pengidup ti mansutka buah Petara, ti Tinggi, ti Bekuasa, ti Gagah.

O Ahmad! Nuan meh nyadika saksi ianya amat bendar Iya meh Petara lalu nadai Petara kelimpah ari Iya, ti Raja, ti Penyaga, ti Nadai Banding, ti Pemadu Bisa. Lalu Siku ti udah dianjung Iya ti benama Ali* endang Siku ti amat ari Petara, ke alai jaku-tangkan Iya diturut semua kitai.

Sebut: O mensia ngasika undang-undang Petara, ti udah ditetapka dalam Bayán ulih Iya ti Mulia, Siku ti Pintar. Amat bendar Iya meh Raja ke semua Seruan lalu Kitab Iya meh Indu Kitab nya alai kelala ulih kita.

Baka nya meh Burung Bul- Bul nyadaka kangau Iya ngagai nuan ari rumah jil tu. Iya mesti ngenataika pesan ti nyemetak tu. Sebarang sapa ti deka, awakka iya limpang ari lalau tu, lalu sebarang sapa ti deka awakka iya milih menasan nuju Tuhan iya.

O mensia, enti kita nyangkal genteran tu, nama penerang dikena kita udah arapka Petara? Bantaika ia, O raban kita ti salah.

Ukai, ba jari Iya Siku ti ngembuan semengat Aku, sida enda, lalu tetap enda ulih ngereja tu, taja pen sida begulai nyaup pangan diri.

O Ahmad! Anang enda ingat ke semua pemisi Aku lebuh Aku nadai. Kingatka hari Aku lebuh maya hari nuan, sereta pemerinsa Aku enggau diburu ke dalam rumah jil ti jauh tu. Lalu chukup tegap meh nuan dalam pengerindu ke Aku awakka ati nuan enda rawan, taja pen pedang munsuh berujan mepat nuan lalu semua serega enggau dunya angkat ngelaban nuan.

Uji nuan baka daun api ngagai bala munsuh Aku lalu sungai pengidup ti meruan ngagai bala ti dikerindu Aku, lalu anang baka sida ti kakang.

Báb

Lalu enti nuan tejanggal laban pemedis dalam menasan Aku, tauka dikemalu ketegal Aku, anang meh nuan tusah ketegal nya.

Bepanggai ba Petara, Petara nuan sereta Tuhan ke apai- indai nuan. Laban mensia tesat dalam menasan igau sengapa, nadai pengelansik meda Petara ngena mata sida empu, tauka ninga Pelandai Iya ngena pending sida empu. Baka nya meh Kami udah nemu sida, baka ti dipeda

Nuan.

Baka nya meh pengarap ngapa sida udah nyadi tirai antara sida enggau ati sida lalu ngelimpang sida ari menasan Petara, ti Tinggi, ti Gagah.

Uji nuan tetap ba diri empu ianya amat bendar, iya ti ngerarika diri ari Pemajik tu udah mega ngerarika diri ari bala Seruan ti dulu lalu mandangka penyumbung ngagai Petara ari jeman kelia nyentuk ke jemah ila.

Pelajar bebendar Papan Tulis tu, O Ahmad. Besampi ngena tu lebuh maya hari nuan lalu anang matak diri ari nya. Laban amat bendar, Petara udah ngeletak ngagai orang ti besampi nya, upah seratus genselan- pengarap enggau pengawa dalam kedua- dua dunya. Semua pengasih tu udah dichiri Kami ba nuan nyadi ke pemeri ari Kami sereta pengasih ari penatai Kami, awakka nuan nyadi sida ti beterima kasih.

Nengah Petara! Enti sema iya siku dituntung pemedis tauka penusah macha Papan Tulis tu enggau naka ia pengelurus ati, Petara deka muai penusah iya, mutarka penanggul iya lalu munaska pemerinsa iya.

Amat bendar, Iya ti Pengasih, ti Penyinu. Puji meh ngagai Petara, Tuhan ke semua dunya.

#12737
- Bahá'u'lláh

 

Papan Tulis Api

Dalam Nama Petara, ti Pemadu Jeman, ti Pemadu Tegap.

Sigi amat ati orang ti lurus udah angus diempa api ketegal beserara: Dini bebetau penampak Rampa-mua Nuan, O Siku dikerindu semua dunya?

Orang ke besemak enggau Nuan udah ditempaya dalam pemetang pemunggur: Dini perenching pagi begulai baru enggau Nuan, O Dikingin semua dunya?

Tubuh bala orang ti dipilih Nuan nyau betegitik begaring ba padang pasir ti jauh: Dini tasik Penatai Nuan, O Pemerindang semua dunya?

Jari-jari peminta benung diangkat ngagai langit penelap enggau pementas: Dini ujan pemeri Nuan. O Penyaut semua dunya?

Bala ke enda arap udah angkat enggau naka pemangah ari tiap sukut: Dini kuasa pemejal pen pengeletak Nuan, O Penyerang dunya?

Salak bala uduk inggar ari tiap piak: Dini singa kampung penegap Nuan? O Pengukum dunya?

Penyelap udah ngenggam semua mensia: Dini pengangat pengerindu Nuan, O Api dunya?

Rabat besai udah datai ba legit ia: Dini tanda-tanda pengesah Nuan, O Penyelamat dunya?

Pemetang udah mungkur mayuh orang: Dini bebendang penampak Nuan, O Pemerenching dunya?

Rekung bala mensia nyau jejengau ketegal bedengki: Dini pedang pengelaban Nuan, O Pengerusak dunya?

Pemaruh udah datai ba buntut penalam ia: Dini pesindang mulia Nuan, O Pemulia dunya?

Penusah udah ngemediska Pengayan Nama Nuan, ti Pemadu Bepengasih: Dini pengaga Terebak-tawas Pemandang Nuan, O Pengagit dunya?

Pemedis udah ninggang semua mensia di bumi: Dini lambang pemagak Nuan, O Pengaga dunya?

Nuan meda Palan Penurun tanda-tanda Nuan udah dilindung ulih penemu jai: Dini tunjuk jari penegap Nuan, O Penguasa dunya?

Pengaus balat udah ngalahka semua mensia: Dini sungai pemeri Nuan, O Pengasih dunya?

Pengamu udah merekuh semua mensia: Dini kereban pengingkas, O Tuhan semua dunya?

Nuan meda Siku ti Dipesalah tu seilu-ilu diburu jauh: Dini raban malikat serega Jaku-Tangkan Nuan, O Kuasa-raja semua dunya?

Aku udah diburu ngagai menua bukai: Dini pesindang penaluk Nuan, O Pengandal dunya?

Pemerinsa pemati udah nguasa semua mensia: Dini alun gelumbang tasik pengidup Nuan ti meruan, O Pengidup semua dunya?

Telai Sitan udah dikesuhka ngagai semua utai idup: Dini gelembung api Nuan, O Penampak semua dunya?

Pemabuk pengamah ati udah nesatka mayuh mensia: Dini terebak-tawas penuchi, O Dikingin semua dunya?

Nuan meda Siku ti Dipesalah tu disengkabung pemangah bansa Syria: Dini perenching palan penampak Nuan, O Penampak semua dunya?

Nuan meda Aku dipantang mansutka jaku: Enti bakanya ari ni panchur nyawa Nuan deka pegari, O Burung Bul-bul semua dunya?

Mayuh mensia dibalut mimpi enggau igau sengapa: Dini bala penyukung penetap Nuan, O Penentu semua dunya?

Bahá benung lemas dalam tasik penusah: Dini Bandung Penyelamat Nuan, O Penyelamat semua dunya?

Nuan meda Terebak-tawas jaku Nuan di dalam pemetang utai tempa: Dini matahari serega pengasih Nuan. O Pemeri Penampak semua dunya?

Lampu pengamat enggau penuchi, penaluk enggau basa, udah dipadam: Dini tanda sumpah pengeringat Nuan, O Penginsit semua dunya?

Bisi Nuan tepedaka sapa ti udah negika Nuan Empu, tauka sapa ti mikirka utai ti ninggang Iya dalam jalai pengerindu Nuan? Diatu pen Aku udah ngetu, O Siku dikerindu semua dunya.

Mayuh dan Kayu-Buah Petara udah patah laban biau balai penentu: Dini tambai pengesah Nuan, O Penegi semua dunya?

Mua tu dipelam dalam debu petenah: Dini ribut penyinu Nuan, O Pengasih semua dunya?

Kelambi pengudus udah dikamah ulih orang ti penipu: Dini baju pengudus Nuan, O Pengiyas semua dunya?

Tasik pengasih udah letung ketegal kereja jari mensia: Dini gelumbang pemeri Nuan, O Pengingin semua dunya?

Pintu nuju ngagai Penatai Pengudus udah dikunchi ketegal pemangah bala munsuh Nuan: Dini kunchi penyiri Nuan, O Pemuka semua dunya?

Mayuh daun nyau kuning ketegal rachun angin pemenchi: Dini ujan mua-hari pemisi Nuan, O Pemeri semua dunya?

Singka miga udah petang laban debu dosa: Dini ribut pengampun Nuan, O Pengampun semua dunya?

Nembiak tu silu-ilu ba menua kusi: Dini ujan berekat serega Nuan, O Penyiri semua dunya?

O Pen ti Pengambis Tinggi, Kami udah ninga kangau Nuan ti pemadu manis ba dunya ti meruan belama: Dinga ulih Nuan utai ti disebut Dilah ti Besai Kuasa, O Siku ti Dipesalah semua dunya!

Enti nadai penyelap, bakani ku pengangat jaku Nuan ulih pegari, O Pengelandik semua dunya?

Enti nadai rabat besai, bakani ku matahari penyabar Nuan tau manchar, O Penampak semua dunya?

Anang merampau ketegal orang ti jai. Nuan udah ditempa ngasai sereta ngenat, O Penyabar semua dunya.

Naka pemanis terebak bingkai-langit Sempekat Nuan ba bala pengasut pemenchi, enggau pengeran Nuan ke Petara, O Pengerindu semua dunya.

Nengah Nuan tambai meredeka udah dientakka ba semua tuchung ti pemadu tinggi, lalu tasik pemeri udah ngelegua, O Penyamai semua dunya.

Nengah Nuan aja Matahari Penyatu udah manchar, lalu nengah Nuan ti diburu tanah Penyerakup udah diiyas. Sabar meh, O Nuan Buru semua dunya.

Kami udah ngaga pemaruh nyadi kelambi ti mulia, lalu pemerinsa nyadi pengiyas kening Nuan, O Pemegah semua dunya.

Nuan meda ati penuh laban gelegis, lalu Nuan anang ibuh, O Nuan Pemelam dosa semua dunya.

Lebuh pedang dikitau, mansang ke mua! Lebuh sangkuh ditikau, terujuka! O Nuan Genselan semua dunya.

Patutka Nuan nyabak, tauka Aku nyabak? Kebendar Aku patut nyabak meda pemimit bala bulu balang Nuan, O Nuan ke udah ngasuh semua dunya nyabak.

Amat bendar, Aku udah ninga sada Nuan, O Siku dikerindu Pemadu Mulia; lalu diatu mua Bahá nyau nyeru laban pengangat penasah enggau api perenching leka jaku Nuan, lalu Iya udah angkat enggau naka penunggang ba kelang genselan, nyadang penyamai Nuan, O Pengeletak semua dunya.

O ‘Alí-Akbar, beterima kasih ngagai Tuhan nuan ke Papan Tulis tu lalu ari nya nuan ulih menseputka rengut pemaruh Aku, lalu nemu nama ti udah ninggang Kami dalam menasan Petara, Iya ti Disembah semua dunya.

Enti sema semua pengasuh macha lalu beperagamka tu, dia urat darah sida deka ditungkun ngena api ti deka ngemauka semua dunya.

#12738
- Bahá'u'lláh

 

Papan Tulis Karmil

Semua mulia ngagai Hari tu, Hari ke endur rengut pengasih udah ditiup ngagai semua utai tempa, Hari ti pemadu diberekat ke alai rambau enggau beratus taun ke dulu enda ulih nanding ia, Hari ke endur rampa-mua Hari Jeman udah ngadap penuduk Iya ti kudus. Arinya sada nyawa semua utai tempa, enggau ngelui ari sida bala Malikat di Atas, bisi didinga inggar minta: “Berumban nuan, O Karmil, lalu peda, penampak rampa-mua Petara, Raja ke Perintah semua Nama enggau Penukuh semua serega, udah diengkahka ba nuan.”

Ditaban enggau naka pengaga, lalu ngeradakka nyawa iya, lalu iya manjung: “Awakka nyawa aku nyadika genselan ngagai Nuan, laban Nuan udah netapka perening Nuan ba aku, udah nyirika pemeri Nuan ngagai aku, lalu udah nujuka singkang kaki Nuan ngagai aku. Beserara ari Nuan, O Nuan Pun Penatai semua pengidup ti meruan belama, nyau deka ngeluska aku, lalu penyauh aku ari Nuan udah nganguska semengat aku. Semua puji ngagai Nuan laban udah ngemendarka aku ninga kangau Nuan, laban aku udah dibasa enggau tujah kaki Nuan, lalu udah ngidupka semengat aku nengah rengut pengidup Hari Nuan sereta munyi cherik Pen Nuan, munyi ti udah diletak Nuan nyadika kangau trumpet Nuan ba bala rayat Nuan. Lalu lebuh maya Pengarap Nuan ti enda ulih tagang dipegarika udah datai, Nuan udah ngesuhka seput Roh Nuan ngagai Pen Nuan, lalu peda, semua utai tempa udah begegar nyentuk ke pelasar ia, ngarakka ngagai mensia semua misteri ke dipelam dalam tibang pesaka Iya Siku ti Ngempu semua utai tempa.”

Tekala nya nyawa iya didinga ari Dasan ti tinggi lalu Kami nyaut: “Beri terima kasih ngagai Tuhan Nuan, O Karmil. Api ti nyerara nuan ari Aku udah jampat ngeluska nuan, lebuh tasik penatai Aku udah ngelegua ba mua nuan, ngelantangka mata nuan enggau semua utai tempa, lalu ngiri pengaga ngagai semua utai ti dipeda enggau enda dipeda. Gaga, laban Petara ba Hari tu udah nudukka ba nuan maligai Iya, lalu ngaga nuan nyadika palan penurun semua kelai Iya enggau terebak-tawas ke tanda pengamat Revelasyen Iya. Lantang meh iya ti bejalai ngelingi nuan, ti nerantangka pegari pemulia nuan, lalu nyeritaka pemeri ari Tuhan Petara nuan ti udah dipanjah ba nuan. Rampas ulih nuan Jalung Pengidup Meruan Belama dalam nama Tuhan nuan, ti Pemadu Bemulia, lalu beterima kasih ngagai Iya, laban Iya, ke tanda pengasih Iya ngagai nuan, udah nukar penusah ati nuan ngagai pengelantang, lalu ngubah penyinu nuan ngagai pengaga. Iya, amat bendar, rinduka dasan tu ti udah digaga nyadi penuduk maligai Iya, ti udah ditujah singkang kaki Iya, ti udah dibasa enggau penatai Iya, tempat endur Iya manjungka kangau Iya, lalu ba nya mega ai mata Iya udah bekeberai.

“Kangauka ngagai Zion, O Karmil, lalu padahka berita pengaga: Iya ti dipelam ari mata mensia udah datai! Perintah pemunggur Iya udah pegari; bebendang Iya ti mungkur semua udah ayan. Bejaga enggaika nuan kakang tauka ngetu. Berumban lalu bejalai ngelilingi Nengeri Petara ti udah diturunka ari serega, Kaaba pengudus ti selalu dikelilingi sembah orang ti dipilih Petara, ti ngembuan ati ti tuchi, enggau raban bala malikat ti pemadu tinggi. Oh, naka meh pengeran Aku deka madah ngagai tetiap tempat ba mua bumi, lalu mai ngagai tiap buah nengeri, berita pengaga Revelasyen tu— Revelasyen ti endur ati Sinai udah tetarit, lalu dalam nama iya Api Babas udah nyapa: Enggi Petara, Tuhan ke semua Tuhan, bempu perintah di dunya enggau di serega.” Amat bendar tu meh Hari alai tanah enggau tasik udah gaga ninga kangau tu, Hari ti endur semua utai udah dianchau ulih Petara, lalu nengah nya pemeri ti ngelui peragam ati enggau runding mensia, ti udah ditaga ke pemadah tu. Enda lama agi Petara deka belayarka Bandung Iya ba atas nuan, lalu deka ngayanka orang Bahá ke udah disebut dalam Bup Semua Nama.”

Kudus meh Tuhan ke semua mensia, lebuh ti nyebut nama Iya semua atom dalam dunya udah begetar, lalu Dilah Iya ti Besai Kuasa udah diasuh mansutka utai ti udah lama dibungkus dalam penemu Iya lalu ditaruh dalam tibang pesaka penegap Iya. Iya, amat bendar, nengah pemisa Nama Iya, ti Tegap, ti Pemadu Bekuasa, ti Pengambis Tinggi, nguasa semua ke diau dalam serega enggau semua ti diau ba bumi.

#12741
- Bahá'u'lláh

 

Papan Tulis Pengabas ‘Abdu’l-Bahá

(Sambiang tu, dipegari ulih ‘Abdu’l-Bahá, dibacha ba Sungkup Iya. Tau mega diguna maya sambiang kediri)

"Barang sapa nyampika sambiang tu enggau pemaruh ati sereta enggau ati ti ngundukka diri ia deka mai pengaga enggau pengelantang ngagai Pengasuh tu: ianya asai ke betemu betunga mua enggau Iya."

Iya meh Pemadu Bemulia!

O Petara, Petara aku! Baruh sereta enggau sabak, aku ngangkatka jari peminta aku ngagai Nuan lalu ngundukka mua aku ba abu Pemetung Nuan, tinggi ngelui ari penemu orang ti bepelajar, lalu ari semua puji ngemuliaka Nuan. Enggau pengasih kemataka pengasuh Nuan, ngunduk sereta meremi ba pintu Nuan, ngena kilas perening mata pengasih Nuan, lalu selamka iya ke dalam Tasik berekat Nuan ti meruan.

Tuhan! Iya tu pengasuh Nuan ti seranta sereta baruh, tetarit sereta minta ngagai Nuan, dikurung dalam jari Nuan, besampi bebendar ngagai Nuan, arap ba Nuan, enggau sabak ba mua Nuan, ngangau Nuan sereta minta ngagai Nuan, lalu nyebut:

O Tuhan, Petara aku! Beri aku pengasih Nuan gawaka bala ti dikerindu Nuan, keringka aku dalam gawa bebendar ke Nuan, tampakka kening aku ngena panchar penyayau ba balai pengudus Nuan, lalu nyadi ke sambiang ngagai perintah Nuan ti besai kuasa. Tulung aku awakka enda ngira diri ba mua pintu serega Nuan, lalu bantu aku ngetas diri ari semua utai dalam kandang kudus Nuan. Tuhan! Asuh aku ngirup ari jalung enda ngira diri sekali kali, ngena kelambi ia gari aku, lalu dalam tasik ia selamka aku. Gaga aku baka abu ba menasan ditujah bala ti dikerindu Nuan, lalu kemendar awakka aku tau nyerahka semengat aku ke tanah ti dimuliaka ketegal indik bala ti dipilih Nuan dalam menasan Nuan. O Tuhan ke Mulia ti Pemadu Tinggi.

Ngena sambiang tu pengasuh Nuan ngangau Nuan, lebuh dini- hari enggau lebuh maya malam. Penyadika niat ati iya, O Tuhan! Terangka ati iya, kelantangka ruang dada iya, tungkun api iya, awakka iya tau gawaka Pengawa Nuan enggau ke bala pengasuh Nuan.

Nuan meh ti Penyikap, ti Penyiru, ti Pemadu Pemisi, ti Pengasih, ti Pengampun, ti Penyinu!

#12740
- `Abdu'l-Bahá

 

Papan Tulis Pengabas Bahá’u’lláh enggau Báb

Papan Tulis tu dibacha ba Sungkup Bahá’u’lláh enggau Sungkup Báb. Ia suah mega diguna kena ngintu pengerami ngingatka Seduai Iya.

Puji ti udah pegari ari Nuan Empu ti pemadu dipebasa, lalu mulia ti udah manchar ari Pemajik Nuan ti pemadu beperenching, dipanggai ba Nuan, O Nuan Siku ti Pengayan Peninggi Kuasa, sereta Raja Pemeruan Belama, sereta Tuhan ke semua ti di serega enggau di dunya! Aku besaksi ianya nengah Nuan kuasa-raja Petara enggau pegai- kuasa Iya, sereta kuasa-perintah Petara enggau peninggi- kuasa Iya, udah dipegari, lalu Bintang- Siang ti bebendang ari kelia udah mancharka penerang sida dalam serega perintah Nuan ti enda ulih ubah, lalu Pemajik ti Enda Dipeda udah manchar ari atas bingkai-langit utai tempa. Aku besaksi, kelebih agi, ianya ngena, tang semina sekali kinsit Pen Nuan, peminta Nuan "Nyadi meh Nuan" udah dipejalaika, lalu Penyelai lalai Petara udah dibungkar, lalu semua utai tempa udah diberi pengidup, lalu semua Revelasyen udah diturunka.

Aku besaksi, kelebih agi, nengah pemajik Nuan pemajik Siku ti Disayau udah dipandang, lalu nengah mua Nuan mua Siku ti Dikingin udah manchar, lalu nengah seleka jaku ari Nuan, Nuan udah mida semua utai tempa, ngasuh sida ti angkunka Nuan niki ngagai tuchung mulia, Ialu sida ti enda pechaya labuh ngagai buntut penyai.

Aku besaksi ianya iya ti udah ngelala Nuan udah ngelala Petara, lalu iya ti udah betunga enggau Nuan udah betunga enggau Petara. Nya alai, besai, meh berekat iya ti udah arapka Nuan, sereta arapka semua tanda Nuan, lalu udah ngemaruhka diri empu ba mua kuasa-raja Nuan, lalu udah diberi basa betemu enggau Nuan, lalu udah tulihka pemanah-penyamai peneka Nuan, lalu udah ngelingi meling Nuan, lalu udah bediri ngadap maligai Nuan. Penusah ngalun iya ti udah ningkah ngelaban Nuan, lalu udah nulak Nuan, lalu udah ngenggaika semua tanda Nuan, lalu udah mantah kuasa-raja Nuan, lalu udah angkat ngelaban Nuan, lalu mandangka pengelawa ba mua Nuan, lalu nyangkal penerang Nuan, lalu udah limpang ari atur Nuan enggau pegai-kuasa Nuan, lalu udah disengkaum enggau sida ti enda pechaya ke alai nama sida udah diukir ulih tunjuk tangkan-atur Nuan ba Papan Tulis kudus Nuan.

Udah nya, tiup begadai-gadai, ba aku, O Petara aku enggau Siku dikerindu aku, ari jari kanan pengampun Nuan enggau pengerindu-penelap Nuan, seput kudus pengasih Nuan, awakka nya tau narit aku ari diri empu enggau ari dunya tu ngagai balai penyemak Nuan enggau penatai Nuan. Bisa meh Nuan ngereja utai ti ngelantangka Nuan. Nuan, endang amat, tinggi ngelui semua utai.

Pengingat Petara enggau puji Iya, sereta mulia Petara enggau bebendang Iya, dipanggai ba Nuan, O Nuan Siku ti Pemajik Iya! Aku nyadi saksi ianya mata utai tempa nadai kala merening siku ti dipesalah baka Nuan. Nuan udah diselam ba semua hari pengidup Nuan di dalam tasik pemerinsa. Sekali Nuan dikungkung sereta dirantai; sekali agi Nuan dikeremba ngena pedang bala munsuh Nuan. Tang, taja semua tu, Nuan udah ngasuh semua mensia ngasika utai ti udah ditagaka Nuan nengah Iya Siku ti Nemu Semua, ti Pemadu Pintar.

Awakka roh aku tau nyadika genselan ke semua penyalah pemedis Nuan, lalu semengat aku nyadika penebus semua penusah ke ditapi Nuan. Aku minta ngagai Petara, nengah Nuan enggau nengah mua sida ti udah beperenching laban bebendang penampak rampamua Nuan, enggau sida, ketegal pengerindu ke Nuan, udah ngasika semua utai ti diasuh ba sida, ngesaika semua tirai ti udah nyelapat Nuan enggau utai tempa Nuan, lalu mekal aku enggau pemanah ba dunya tu enggau dunya ti deka datai. Nuan, endang amat, ti Pemadu Tegap, ti Pemadu Tinggi, ti Pemadu Mulia, ti Seruran Ngampun, ti Pemadu Penyinu.

Berekat ulih Nuan, O Tuhan Petara aku, Kayu-Buah Petara enggau daun ia, enggau dan besai ia, enggau dan ia, enggau pating ia, enggau sumbuk ia, seagi agi semua gelar Nuan ti pemadu lati meruan bisi sereta pemanah pemeri Nuan ti pemadu dipebasa meruan belama. Udah nya, jaga ia, ari kachau orang ti jai enggau raban mangah merintah. Nuan, endang amat, ti Pemadu Tegap, ti Pemadu Bekuasa. Berekat ulih Nuan, mega, O Tuhan Petara aku, bala pengasuh Nuan sereta bala pengasuh indu Nuan ti udah datai ba Nuan. Nuan, endang amat, ti Pemadu Pemisi, berekat Iya ti nadai tatak. Nadai Petara bukai kelimpah ari Nuan, ti Seruran Ngampun, ti Pemadu Mentas.

#12739
- Bahá'u'lláh

 

Penuchi enggau Pemeresi

O Penginang Kudus! Sikap Nuan penulin enggau pemeresi ke semua utai ba orang Bahá. Awakka sida tau lepas ari semua pengamah, lalu lepas ari semua gian. Selamatka sida ari ti ngereja pengawa ti dikeji, ketas sida ari rantai semua perangai sitan, awakka sida ulih idup tuchi sereta tuas, bepengerai sereta beresi, lumau gawa ba Pemetung Suchi Nuan lalu tau bekaul enggau Tuhan sida.

#12749
- `Abdu'l-Bahá

 

Nguji bebendar meh kita, awakka penuchi enggau pengudus ngelui ari semua utai, ti endang diasi ulih ‘Abdu’l-Bahá, deka ngasuh orang Bahá jelai agi: ba semua macham pengelati orang Petara ngeluah ari semua mensia; ianya di luar enggau di dalam sida patut lebih manah agi ari orang bukai; lalu ba penuchi, penulin, pengalus enggau nyaga pengerai, sida deka nyadi ketuai pengeluan ke mereti. Nya alai nengah pengelepas ti nadai dikungkung, pemandai sida, pengenan nagang diri, sida deka nyadi orang keterubah ba antara orang ti tuchi, ti ngati kediri enggau ti pintar.

#12750
- `Abdu'l-Bahá